Read Gangte NASEPTE 8 Bible Online

NASEPTE 8 - Gangte bible

NASEPTE 8

¹Saul chun le a thih chuh a ki-awi a. Zie ni chun, Jerusalem khuo a Sapchuom um haw chun sukgimtheihna nasatak a thuok pan tau a. Sawlchakte tihloh, gingtu dang chengcheng chuh, Judea leh Samari gam khuo tin ah a dalh vek tau hi.

²Chun, Pathien ngaihsak kuote a him in Stephan chuh a vui u a, nasatak in a kah u a.

³Saul chun la, Sapchuom haw chuh a sugimthei mah mah a, In tin ah a lut a, a mei a pan a kaidawk a, suongkul ah a khum zel ta a.

⁴Tichun, a tai zakte chuh khuo tin ah a chieh u a, thu a gen zel tau a.

⁵Chun, Philip chuh Samari khuo ah a va chieh a, a kawm u ah Krista thu a tângsap pih a.

⁶Chun, thitha buokte chuh, mi tamtak, a matteu sung apat aw ngeihtak a kikoa a pawt ziek u leh,

⁷zeng leh kêngbâi tamtak te le a dam tâk ziekun, mipite’n a thu a zak u a, a thilmak hih haw a muh un, Philip thugen chuh lungkiguol takin a khawksak u a.

⁸Chun, zie khawpi achun kipahna nasatak a um ta a.

⁹Zie tak achun, mi khat Simon kiti a um a, amah chun, Mi lien ka hi, ti’n, masang in zie khuo a chun dawi mang in Samari mite chuh maksa takin a bawl sek a,

¹⁰Tichun, mi chengcheng, a neupen apat a lienpen tiengin, “Zie pa hi, Pathien thilhih theihna, ‘Lopi’ a tih u khah ahi hi,” ti’n a thu a limsak sek u a.

¹¹Hun sawt tak, a dawi manga maksa taka mi a siem sek ziekin, a thu a limsak sek uh ahi.

¹²Himahlele, amau haw chun, Pathien Gam Chanchin Pha leh, Isu Krista Chanchin Pha Philip in a gen chuh a ginchak phet un, a mei a pa’n baptistma a chang tau a.

¹³Simon ngêi chun le a hun gingcha ta a, chun, baptistma a chan zawhin, Philip kawmah a um zing a, melchikna leh, thilmak kihihte a muh in mak a sa mah mah a.

¹⁴Chun, sawlchak, Jerusalem khuo a umte khan, Samari khuo a mite’n Pathien thu a awi ui tih a zak un, a kawm u ah Peter leh Johan chuh a sawl u a.

¹⁵Ziete chuh a va tun u chun, Thagau Thiengtho a muh theih na dingun a paucham sak u a.

¹⁶Zie ma chun a lak u a kuomah chungah a na tung puoi; Lal Isu min in baptistma a chang hâm uh ana hii.

¹⁷Tichun, Peter leh Johan chun a chungu ah a khut uh a ngau a, chun, Thagau Thiengtho a chang tau a.

¹⁸Chun, sawlchakte khut ngak zieka Thagau Thiengtho piek ahi tih, Simon in a muh in,

¹⁹“Zie tawbang thuneihna hi kei le nei pieu in, kuo chung hi taleh, khut ka ngakna takin Thagau Thiengtho a muh theih na dingun,” ti’n, a kawm u ah dangka piek a guo ta a.

²⁰Himahlele, Peter in a kawmah, “Na dangka hi nang tawh mang khawm hen, Pathien thilpiek dangka suma châwk na guot ziekin!

²¹Zie thu haw a hin nang na tel puoi, chan le na nei diek puoi; na lungthim Pathien ngaih in a dik puoi.

²²Zieziekchun, na gitloh hi lunghei inla, LALPA kawmah paucham ah, khutichun, na lungthima na ngaihtuoh hi a hun ngaidam mawh die!

²³Mitthîpna khatak leh gitloh sala tâng na hi tih ka hêi,” a ti a.

²⁴Chun, Simon in, “Na thil gen u hi ka chunga bangmah a tun lohna dingin, nangun LALPA kawmah ei paucham sak un,” ti’n a dâwng a.

²⁵Khutichun, amau chun LALPA thu chuh a hetsak u a, a gen zawh un, Jerusalem khuo ah a kîkkit u a; Samari gama khuo tamtak ah Chanchin Pha chuh a gen zel tau a.

²⁶Chun, LALPA vânsâwlchâk khatin Philip chuh a hopih a. “Kipan inla, simlam a Jerusalem khuo apat a Gaza khuo vak sun, lampi akhan chieh ah; zie lampi chuh gamgawa chiehpai ahi,” a ti a.

²⁷Tichun, a kipan a, a chieh ta a. Chun, ngaitie! Ethiopia gama mi khat, Ethiopia lengnu Kandaki nuoia mi tilgeh lal tak, a go chengcheng vawppa, Jerusalem khuo ah Pathien ho dingin a va chieh a.

²⁸A hung kit lam chun, a kangtalaia a chut kawm chun, thiemgau Isai lehkhabu a sim a.

²⁹Chun, Thagau chun Philip kawmah, “Zie kangtalai khuh va naih inla, a kawmah va um ah,” a ti a.

³⁰Tichun, Philip chuh mitilgeh kawm achun a va tai a, thiemgau Isai lehkhabu a sim lai chuh a za a, a kawmah, “Na sim khah a umzie na he?” a ti a.

³¹Chun, amah chun a kawmah, “Kuomah ei hilhchet loh in bangti’n a ka het theih ding?” a ti a. Chun, a kawma chu dawk dingin Philip chuh a chiel ta a.

³²Chun, lehkhabu a sim lai chuh ziehi ahi: “Thah dingin belam guolin amah chuh a pui u a; Belamno a mulmetpa maa a thip kêi guolin, Ama’n le a kam a ka puoi;

³³A tawm lai in a vaihawmna lak mang in a um; A suonte chanchin kuo’na a hun gen ding? khawvel apat in a hinna a lâksak ngâl u a,” tih hi.

³⁴Chun, mitilgeh chun Philip kawmah, “Thiemgau in zie thu haw hi kuo chungchâng a genna ahi, amah thu ahi, mi dang thu? Ka hun dawt na hii,” a ti a.

³⁵Philip chun a gen pan a, zie Pathien lehkha thu chuh a bul ah a pan a, Isu chanchin chuh a kawmah a gen ta a.

³⁶Chun, lampi a a chieh lai u chun, tui umna mun khat hi a tung u a, chun, mitilgeh chun, “Entie! taka hin tui a um, baptistma channa ding bangin ei dal hi?” a ti a.

³⁷Philip in a kawmah, “Na lungthim cheng chenga na ginchak chun, baptistma chang thei inla,” a ti a. Amah chun, “Ka gingchâi, Isu chuh Pathien Chapa ahi tih ka gingchâi” ti’n a dâwng a.

³⁸Tichun, kangtalai chuh a din sak a, a nih un Philip chu tawh tui achun a va chieh khawm u a, chun, Philip chun amah chuh a baptist ta a.

³⁹Chun, tui lak apat a pawt toh phet u chun, LALPA Thagau in Philip chuh a la mang ta a; tichun, mitilgeh chun amah chuh a mu kit ta puoi, himahleh, lampi achun kipâk takin a chieh zel ta a.

⁴⁰Himahleh, Philip chuh mi’n, Azotas khuo ah a mu kit tau a, chun, a chieh pai a, Kaisari khuo a tun tiengin, khaw tin ah Chanchin Pha chuh a gen zel a.