Read Gangte NASEPTE 9 Bible Online

NASEPTE 9 - Gangte bible

NASEPTE 9

¹Zie lai chun, Saul in LALPA sinsak haw chuh, thah dinga vauna thu a siet dawk khum matchet a. Thiempu Lienpen kawmah a chieh a,

²Chun, Damaska khuo a kikhawpna In cheng chenga mihaw kawma piek dingin lehkha a ngên a, ti a chu, mi kuole, LALPA Lampi zuia pang a muh chun, numei hileh, pasal hileh, Jerusalem khuo a kansa a a hun puih theihna dingin.

³Chun, a chieh lai in, Damaska khuo a tun ding kuon in, hatkhat in eng, van apat a vel ah a hung eng ta phut a.

⁴Tichun, tuol ah a puk a, chun, a kawmah aw khatin, “Saul, Saul, nangin bangati a nei sugimthei na him?” ti’n a za a.

⁵Chun, amah chun “LALPA, kuo na hi?” a ti a. Chun, LALPA chun, “Isu, na sukgimtheih hi ka hii; Sutna thikzum pêk chuh nanga dingin a na ie,” a ti a.

⁶Khutichun, lau leh kilîng kawmin, “LALPA bang hih dingin nei deih hi?” a ti a. Chun, LALPA’n a kawmah, “Tho inla, khuo ah lut ah; tichun, na hih ding hun na hilh un au,” a ti a.

⁷Chun, a kawma chiehte chuh tihna ding he lo in a ding u a, aw vang a za nau a, himahleh, kuomah la a mu puou a.

⁸Chun, Saul chuh tuol apat chuh a tho a; a mit a vak hak a, himahleh, bangmah a mu thei ta puoh a. Khutichun, a kai u a, Damaska khuo achun a kai lut tau a.

⁹Tichun, ni thum khuo mu lo in a um a, bangmah a ne’n a dâwn puoi.

¹⁰Chun, Damaska khuo achun, a min Ananias kiti, sinsak khat a um a. LALPA chun vaulam in a kawmah, “Ananias,” a ti a. Amah chun, “Entie, LALPA, taka hin ka um hi!” a ti a.

¹¹Chun, LALPA chun a kawmah, “Tho inla, ‘Kawtthêl Zang’ a tihnau achun chieh inla, Juda In ah, Tarsas khuo a um, a min Saul kiti dawng dawk ah; ngai tie, a paucham pêt ahi a;

¹²a min Ananias kiti mi khat a kawma lut a, a mit hih vak dinga, a chunga khut nga’n, vaulam in a mu ta ie,” a ti a.

¹³Chun, Ananias chun, “LALPA, zie pa chuh Jerusalem khuo a mi thiengthote chunga a hih gitloh tam zie thu, mi tamtak kam ah ka zai;

¹⁴Chuleh, taka hin le, na min sam ta cheng kânna dingin Thiempu Liente kawm apat thu a mu zing a puo,” a ti a, a dâwng a.

¹⁵Himahlele, LALPA chun a kawmah, “Chieh mai ah, Jentel te, lengte, Israel suonte kawma ka min puok lutna dinga ka bel guot ahi a puo!

¹⁶Ka min zieka dahum bangtia nasa a a thuok ding, amah hun hetsak ding ka hi,” a ti a.

¹⁷Khutichun, Ananias chuh a va chieh a, Saul umna In achun a lut a, chun, a chungah a khut a nga a, “Ka nau Saul, na mit vakna ding leh, Thagau Thiengtho a dima na um theihna dingin, LALPA, na hungna lampi a na kawma kilak ngêi Isu khan ei sawl ka hii,” a ti a.

¹⁸Chun, thakhat in, a mit apat phulip tawbang a kie ngâl ta a, a mit a vak kit ta a; chun, a tho a, baptistma a chang ta a.

¹⁹Tichun, an a ne a, a hung halh kit ta a. Chun, Damaska khuo a nungzui umte kawm achun ni bang zat ahim vel a um a.

²⁰Kikhawpna Inhaw achun, Isu chuh Pathien Chapa a hih zie thu chuh a tângsappih ngâl ta a.

²¹Chun, a thu zate chengcheng chun mak a sa ten u a, “Zie pa hi, Jerusalem khuo a, zie min lote sugimthei sek kha hilo ahim? Ziete haw chuh kansa a, thiempu Liente kawma puih chuh a hung lawh pên ahi ngâl a,” a tiu a.

²²Saul thugen chuh a hung hât zaw deuh a, Isu chuh Krista ahi takzet hi tih a hilhchien a, Damaska khuo a Juda umte chuh a niel dawng hieu ta a.

²³Chun, ni sawttak nung chun, Judate chun Saul thahna ding dân chuh a ngaihtuoh u a,

²⁴Himahlele, amah chun a thil sawm u chuh a na he ta a. Chun, thah dingin, kulh kawtpi tin achun, a sun a zan in a chânggu sek u a.

²⁵Himahleh, zan khat chuh, a nungzuite chun a pui u a, kulh kawtcha ah bawm in a khâi tha tau a.

²⁶Chun, Saul chuh Jerusalem khuo a tun phetin, sinsakte lawi chuh kivawppih a guo a, Himahleh, sinsak hi dinga a ginchak loh ziekun a bawn u chun a lau u a.

²⁷Ziephet chun, Barnabas chuh a hung a, sawlchakte kawm achun a pui ta a. Lampi a LALPA a muh a, a hopih dante, Damaska khuo a Isu min a hangsan taka thu a gen ziehaw chuh a kawm u ah a hilh ta a.

²⁸Khutichun, Saul chuh Jerusalem khuo achun, a kawm u a lut sek pawt sek in a um ta a, LALPA min in hâng takin thu a gen viel sek a.

²⁹Chuleh, Grik Judate kawma le thu a gen a, a niel a, amau haw chun la thah a guo ngâl u a.

³⁰Chun, suohpihte chun zie chuh a het phet un, Kaisari khuo ah a puisuk u a, Tarsas khuo lam ah a sawl mang tau hi.

³¹Khutichun, Sapchuomte chuh Judai gam vel ale, Galili gam vel ale, Samari gam vel haw achun a det deuh deuh tau a, muong takin a um tau hi. LALPA limbawl in, Thagau Thiengtho lungmuon in, a um u a, a hung pung tiltil tau hi.

³²Chun, Peter in gambung cheng a fan kawmin, Ludda khuo a mi thiengtho umte kawm ale a va chieh a.

³³Zie tak achun mi khat Ainis kiti, a zen zieka kum giet zâlkhun a kuol zing a mu a.

³⁴Chun, Peter chun a kawmah, “Ainis, Isu Krista chun a hun hihdam hi, tho inla, na puonphah ziel ah,” a ti a. Tichun, a tho ngâl ta a.

³⁵Khutichun, Ludda khuo leh Sharon phai a um cheng chengte chun Ainis chuh a muu a, LALPA lam a nga tau a.

³⁶Chun, Joppa khuo a chun a min Tabitha kiti, sinsak khat a um a, (Tabitha umzie chuh Grik pau in Dorkas ahi a, zie chuh sazuknu tihna ahi); zie nu chun thilhih phat leh thilpiek dawk a hau ten a.

³⁷Zie lai chun a dam puoh a, a thi ta a; chun, a silngim u a, indan chungnung ah a siel tau a.

³⁸Chun, Ludda khuo chuh Joppa khuo kieng a hih ziekin, sinsakte chun Peter tak achun a um hi tih a heu a, “Sawt hal lo in ka kawm u ah hung ah,” ti a hah nget a ngên dingin a kawmah mi nih a sawl u a.

³⁹Tichun, Peter chuh a kipan a, a kawm u ah a chieh ta a. A tun phetin indan chungnung achun a puito u a; meithai chengcheng chuh a kienga dingin, Dorkas a kawm u a a um laia, a puonâk khuih haw chuh etsak kawmin a kap u a.

⁴⁰Himahlele, Peter chun a bawn un a pawtdawk sak vek a, a khupdin a, a paucham ta a; chun, luong lam chuh a nga a, “Tabitha, tho ah,” a ti a. Tichun, a mit a hun hak a, Peter chuh a muh phetin, a chu dawk ta a.

⁴¹Chun, Peter chun a khut a vak pie a, a kaitho ta a. Chun, mi thiengthote leh meithai chengcheng chuh a sama, dam in a kâwkmuh ta a.

⁴²Zie chuh Joppa khuo a um chengcheng chun a he vek tau a; mi tamtakin LALPA chuh a gingcha tau hi.

⁴³Chun, Peter chuh Joppa khuo a, savun siempa Simon In achun ni tamtak a châm ta a.