Read Gangte ROME 1 Bible Online

ROME 1 - Gangte bible

ROME 1

¹Paul, Krista Isu suok, sawlchak hi dinga sap. Pathien in a Chanchin pha gen dinga a kawihchuompa chun:

²Zie Chanchin pha chuh, Lehkhabu thiengtho a a na kizik guol in, malaia kipatin Pathien in a thiemgaute mang in a na tiem ta a.

³Zie chuh, a chapa chanchin, I Lalpau Isu Krista: Phehlevo lam thu a chun David suona pieng ahi a,

⁴Thienthona thagau lam thu vang achun mithi lak apat thilhih theihna nasa taka kaihthawha a umna chun Pathien Chapa a hihna nasa takin a taklang hi.

⁵Khutichun, namtin in a ginchak u a, thu zawp a a um theihna dingun, Pathien in Krista ziekin sawlchak hihna ei pie ahi.

⁶Ziehaw lak achun nang u le Isu Krista a sap te na hiu hi.

⁷Pathien deihtak, mi thiengtho hidinga sap Rome khuo a um cheng chengte kawmah: Pathien I Pau leh Lal Isu Krista apat chun hehpihna leh lungmuonna na kawm u ah um hen.

⁸Khawvel pumpi a na taksanna thuu a kithan suok tâk ziekin, na bawn u a chunga ka kipahna thu a masapen in Isu Krista zalin Pa, Pathien kawmah ka gen hi.

⁹Ka pauchamna haw achun hai lo in na min uh ka lo sek hi.

¹⁰Tubek hin na kawm u ka hungna dingin, Pathien thu a zinna ding hun awngthawl ka muh theihna dingin ka ngên sek hi tih, lungthim taktak a a na ka sep sek leh, a Chapa Chanchin Pha ka gen sek Pathien chun ei hetpih ahi ngâl a.

¹¹Nang haw tawh thagau lam vangsakna I chan khawm theihna dingun leh, sukhat a na um theihna dingun nanguh hun muh ka nuom mah mah hi.

¹²Zie chuh, nang u leh kei taksanna lama I kilungmuon tuoh theihna dingun ka tihna ahi.

¹³Ka suohpihte haw, zie thu hi hezing un, tamtak vei na kawm u a hung ka guo ta a, himahlele, dala ka um ziekin ka hung thei ta puoi. Jentel te lak apat a gingthak ka lak lut zel bangin, nang haw lak apat in le gingthak ka la nuom ngâl a.

¹⁴A ziek chuh, kuo hi taleh, Grik mi leh namchawm mite kawmah bat ka nei hi, mithiem leh mimawlte kawm ale.

¹⁵Khutichun, nanguh Rome khuo a umte kawm ale Chanchin Pha ka zawh chana gen dingin ka kisazo zing hi.

¹⁶Chanchin Pha chuh ka zahchâkpih puoh ngâl a; kuole a gingcha tapohte dingin hukdamna dinga Pathien thilhih theihna ahi ngâl a, a tûngin Juda mite dingin ahi a, chun, Grik mite dingin a hung hi kit a.

¹⁷Zie mah achun taksan zawk diekna’n Pathien diktatna chuh ahung kilang a, “Mi diktat chuh ginna’n hing ina” tih zik guol khan.

¹⁸Thutak, takkhanlo taka dalte, Pathien khawksak lohna leh, takkhanlohna chengcheng chung achun, van apat in Pathien lungnatna hung kilak ahi;

¹⁹Pathien chuh amau haw kawmah a kihetsak ta a, Pathien chanchin a he thei ui tih a kichien ngâl a, zieziekchun Pathien in amau haw chuh gawt ngêi ding ahi.

²⁰Pathien in khawvel a siem a kipat, a thil muh theih loh, a kumkhuo thilhih theihna leh a Pathien zie chuh chientaka muhin a um ngâl a; thilsiem achun a kilang a, zieziekchun paulap ding a nei puou hi.

²¹Pathien he ngâl in, Pathien guolin a limbawl puou a, kipah thu le a gen diek puou hi; himahleh, thil manloh te ngaihtuoh in, a lunggil uh a hung thim ta a.

²²Ching a kingai in, mi ngawl a hung hi tau a,

²³Thithei lo Pathien lopina chuh thithei mihiemte leh, vachate, ganhing keng li neite, ganhingte lim bang a hih sak tau hi.

²⁴Zieziekchun Pathien in a sapum uh zahhuoi taka kisiem tuoh dingin leh, a lunggil utnau guola thil buok hih uh phal in a nungngat ta a.

²⁵Pathien thutak chuh lepchieh hihsak in, a Siempa ho sangin a thilsiem chuh ho in a zenviel zaw tau a. A Siempa zawk chuh kumkhuo a pahchak tâk ahi ngâl a. Amen.

²⁶Zieziek hin, Pathien in zahhuoi taka a hûk uh phal in, a nungngat a; a numei teu nasan inle, a numei pienpih u chuh ngeina danlo guola um dingin a kihihlamdang u a;

²⁷Khutibang chun, pasalte’nle numei dinmun ngeina dân chuh haihsan a, hûk in a ki-utchau a, pasal leh pasal melsie takin a kibawl u a, a thilhih gitlohna ziek u a gawtna chuh amau haw chung ngêi ah a kitut uh ahi.

²⁸Chun, a lungthim u a Pathien het a nawp loh ziekun, thil kilawmlo tak hih dinga a deihloh lam lungthim neih phalsak in, Pathien in a nungngat ta a.

²⁹Khutichun, diktatlohna chengcheng te, gitlohna chengcheng te, huoihamna chengcheng te leh hâmdâwkna chengcheng te bangin a hung dim tau a; kimitthipna te, tuolthahna te,

³⁰kimukphunna leh, kithepna leh, nunchan phatlohnate’n a hung dim tau a. Thuningkhel leh, mi gensiet hatna leh, Pathien zakdah lam leh, kilek leh, kiletsakna leh, mi-uong leh, thil gilo thak bawl dawk leh, nu le pa thu ngailo leh;

³¹lunggil sielepha hetna bei leh, thutiem susiete leh, mi dangte a dinga hehpihna pienpih neilo leh lungsietna neilote bang a hung hi tau hi.

³²Zie tawbang thilhihte chuh thi tâk ahi tih Pathien vaihawmna he ngâl in; amau bawl mai le hilo in, midang zie tawbang thilhihte chuh a kipahpih zaw sek nalai ui.