Read Gangte ROME 10 Bible Online

ROME 10 - Gangte bible

ROME 10

¹Suohpihte, ka lunggil ut lam leh, ka mite dinga Pathien kawma ka paucham lawh pên chuh, hukdama a hung um theihna dinguh ahi.

²Pathien lam ah phachuom a ngai ui tih ka hetpih a; himahlele, a phatchuom ngaihnau chuh hetna diktak ziek ahi puoi.

³Pathien diktatna helo in, amau haw diktatna sukdet guo’n, Pathien diktatna nuoia a kitulut ngâl puou a.

⁴Krista chuh a gingchate cheng dingin, diktatna a muh theihna dingun, Dan suhaipa ahi ngâl a.

⁵Mosi chun, “Dan thupiek banga diktaka hihte chuh, zie diktatna vang chun hing un au,” ti’n a zik a.

⁶Taksanna zieka diktatna vang chun tihin a gen hi: “Na lungthim un, kuo a van a kal ding?” ti’n ahim, (zie chuh chunglam apat Krista puih suk ding tihna ahi),

⁷“Kuo a thampikuo-awnga kie ding?” (zie chuh mithi lak pata Krista puihtoh kit ding tihna ahi), ti kiu un, ti’n.

⁸Ahih leh, banga na gen: “Thu chun a hun naih hi; na kam leh na lunggil ale a um,” ti’n a gen zaw ahi. Zie chuh taksanna thu I gen sek uh hi ahi:

⁹“Na kam in Isu chuh LALPA ahi tih na phuon a, mithi lak apat Pathien in a kaitho hi tih, na lunggil a na ginchak chun hukdam in um inla,” tih hi.

¹⁰Mite’n lunggil in a gingchau a, diktatna a mu sek ui; kam in a phuong u a, hukdamna a mu sek ui.

¹¹Pathien Lehkha thu’n, “Kuole, amah gingcha ta chuh muolpho hiel puo’n au,” a tih ahi.

¹²Juda leh Grik mite chuh bangmah chan a lamdang chuom puoh ngâl u a. LALPA khat chuh abawn u a chunga LALPA ahi a; amah samte cheng chung achun phatna a hau ngâl sek a.

¹³“Kuole, LALPA min sam ta cheng chuh hukdam in um un au,” tih ahi ngâl a.

¹⁴A hih leh, a ginchak loh u chuh bangti’n a a sap dinguh? A thu a zak loh u chuh bangti’n a a ginchak dinguh? Thugen um lo in bangti’n a a zak dinguh?

¹⁵Sawl a hihloh u chun, bangti’n a thu a gen dinguh? “Thil pha chanchin kipah-um tunte keng chuh a hawih na e!” tih zik guol khan.

¹⁶Himahlele, Chanchin Pha chuh a bawn un a awi suok puou. Isai in. “LALPA, ka thugen uh kuo a gingcha?” a tih guol khan.

¹⁷Khutichun, ginchakna chuh, zakna vangin a hung um sek a, chun, zakna chuh Krista thu vangin a hung um sek hi.

¹⁸“A hih leh, a bil un a za puou a ahi? Za e, a thawm u chuh leisiet chung cheng chenga chun a thang a, A thuu chuh vannuoi kil tin ah a thang suok tai.”

¹⁹A hih leh, Israel mite’n a he puou a ahi leh? “Chi a gen kham loh te chuh mang in Nanguh hun thîk sak ing ka ting, Nam chinglote chuh mang in Nanguh hun sulungna’ng ka ting,” ti’n Mosi’n a gen masapen hi.

²⁰Chuleh, Isai inle hangsan takin, “Ei hawl lote muhin ka um a, Ei dâwp lote kawmah hetsak in ka um hi,” a ti a.

²¹Amahvang chuh, Israel mite chungchâng thu a chun, “Mi genhak leh nielhatte dingin ni tumin ka bân haw ka zak sek kha,” ti’n a gen a.