Read Gangte ROME 11 Bible Online

ROME 11 - Gangte bible

ROME 11

¹A hih leh, Pathien in a mite chuh a paih tha a ahi leh? Naisai lo e. Kei ngêi le Israel mi, Abraham suon, Benjamin nam a mi ka hi ngâl a.

²Pathien in a tung apat a mi telte chuh a paih tha puoi. Pathien Lehkha thu’n Elija thu a gen hi helo na hiu hi? Amah chun Israel mite chungchâng thu Pathien kawmah a tun a:

³“LALPA, na thiemgaute a sulum u a. Na maichâmhaw le a suchim tau a; Keimah mai ka um ta a, Keile ei suklup guo nalai ahiu ui,” a tih khah.

⁴Himahlele, Pathien in bangti’n a a dâwn khah? “Baal maa khupdin ngeilo mi sang sagih keimah adingin ka kawih zing hi,” ti’n a dâwng a.

⁵Khutibang mah chun, tulai hin le, a lungsietna zieka Pathien in a tel, tawmcha ana um uh ahi.

⁶Amah mi tel dân chuh thilhih a kinga ahi puoh a, amah hehpihna a kinga ahi zawi. Pathien hehpihna chuh, mite thilhih a kinga hita leh, a hehpihna chuh hehpihna dik hita lo ding ahi ngâl a.

⁷Bangti ahi ta die leh? Israel mite chun a hawl u chuh a mu puou a. Telte vang chun a muu a, a dang chengcheng te chuh a chavai zo tau hi.

⁸Pathien Lehkha thu’n, “Pathien in tuni tiengin, a kawm u ah vuonpaihna thagau a pie a, khuo muh theih lohna mitte leh, khuozak theih lohna bilte tawh,” ti a a gen guol khan.

⁹Chun, David ngêi inle: “A guolvaknau chuh amau dingin thang leh, piel leh Pukna leh ditthukna na hi he’n la;

¹⁰A muh theih lohna dingun a mit hawu na thim hen, Nangin a nungzang uh kun sak zing ah,” ti’n a gen a.

¹¹A hih leh, a kipal u chuh, a puk den na dinguh ahi leh? Naisai lo e! A puk ziekun Jentel te kawm achun hukdamna hungtung zaw ahi tai, Israel mite thîk sak na dingin.

¹²Tichun, a puknau bawn, vannuoi sukhauhsakna ahih a, a kiemnau le, Jentel te neihzawhna a hih chun, a bukimnau chuh a neihzawhna ahi na lâwm lâwm ding e.

¹³Khutichun, nanguh Jentel te kawma ka gen ahi. Kei Jentel te sawlchak ka hih ziekin, ka chipihte ka thîk sak theihna ding leh,

¹⁴A lak u a khenkhatte ka hukdam theihna dingin, ka zenvielna hi ka limbawl ahi.

¹⁵Amau haw paihthak na chuh, mihingte leh Pathien kicham kitna ahih chun, amau haw lawp kitna ding chuh, thihna apat hin kitna lo chuh banga hi ding?

¹⁶Chun, gah masa chuh a thientho chun a pum chule khutibang mah chun a thiengtho a; chun, a zung chuh a thientho chun a bâk haw chule a thiengtho hi.

¹⁷Chun, a bâk khenkhat chuh sukbawt a a um leh, nang olive lêm hi chin a, amau haw laka zawpmat a na um a, olive thinga phatna zung kikawppih na hih tâk leh, bâk dangte lak achun kisuong kih.

¹⁸Kisuong leh chin le nang a zung khai na hi puoh a, a zung chuh nang hun khai ahi zawi.

¹⁹Himahleh, nangin, “Zawpmat a ka um theihna dingin bâkhaw chuh sukbawt a um ahi a puo,” ti’n na tin.

²⁰Ahi, a ginchak loh ziekun sukbawt in a um u a, nang na taksanna vangin na hing ahi.

²¹Kiletsak ki’n la, lau zawh; Pathien in bâk takte chuh a hawih loh ngâl chun, nang le hun hâwi diek puo’n a.

²²Khutichun, Pathien phat dân leh a ningkhel dân chuh ngaihtuoh in; a kipukte ding chun a ningkhel a, nang ding vang chun a phai, a phatna a na um zing chun. Himahlele, khuti banga chuh na um zing loh chun, nang le hun sat tha ding ahi ngâl a.

²³Chun, amau haw chule, gingcha lo a a um zing loh u chun, zawpmat in um un au; Pathien in amau haw a zawmmat kit thei ngâl a.

²⁴Nang, olive lêm apat satsum bawn, pien dân loh guola olive thing pha a zawpmat a na um chun, zie a bâk takte chuh, amau haw olive thing ngêi mah achun zawpmat ahi na ding u e!

²⁵Suohpihte, zie thuguk hi na hetloh uh ka deih puoi; khutilochun, kichitsak kha’n lau. Jentel te bukimna a hungtun ma’n, Israel mi khenkhatte chung achun châtvaihna a hungtung tadih ahi, tih hi.

²⁶Chun, ziehi, Israel mi chengcheng hukdama a umdan ding u chuh ahi: “Zion apat Hukdampa chuh hung pawt intin, Jakob kawm apat Pathien khawksaklohna chuh sumang ina.

²⁷Zie chuh a kawm u a ka thugawlh ding chuh ahi, A gitlohna hawu ka lâkmang tieng leh,” ti a Pathien Lehkha thu’n a gen guol khan.

²⁸Chanchin Pha lam ngaihtuoh chun, nangmau haw ziekin Judate chuh Pathien melma ahiu a, tel thu lam ngaihtuoh vang chun, suonte vangin hehpihte ahiu hi.

²⁹Pathien in a thil thawnpiek leh a sapna lam achun lung a hêi ngei puoh ngâl u a.

³⁰Ma khan nanguh Jentel te hin Pathien thu na zawp puou a; himahlele, tuhin vang, Judate thu ngaih loh ziekin Pathien hehpihna chuh na chang tau hi.

³¹Khutibang mah chun, Pathien in a hun khuotuoh ziek hin, khuotuohna a muh theihna dingun, amau haw chun thu a na awih loh uh ahi.

³²Chun, mi chengcheng chunga Pathien in a khuotuohna a latsak theihna dingin, mi chengcheng chuh thu awihlohna achun a na khakkhum vek tai.

³³Pathien chitna leh hetna hauh dân chuh a nasa na e. A vaihawm haw chuh het theih guol leh, sut theih guol ahi mawh na e,

³⁴“LALPA lungthim chuh kuo a he? Kuo a a lem guotsak a le pang kha?

³⁵A ditkit dingin le kuo a a kawma thil pie masa?”

³⁶Amah apat leh, amah vang leh, amah a dingin thil chengcheng hi hung um ahi ngâl a. Amah kawm achun kumkhuo’n lopina chuh um hen. Amen.