Read Gangte ROME 12 Bible Online

ROME 12 - Gangte bible

ROME 12

¹Khutichun, suohpihte, Pathien khuotuohna vang hin, kithawihna hing leh thiengtho leh, Pathien pawm tâk hiding in na sapum u chuh na piek dingun ka hun nget na hiu hi; zie chuh na sep ding mawng uh ahi.

²Zie vannuoi dân guol hin um kiu unla, Pathien deihlam, a pha leh, pawm tâk leh, phat bukim chuh na hetchil theihna dingun, na lungthim uh a thak a um in, lamdang zaw tau u.n.

³Pathien in ei piek lungsietna vang hin, na bawn u a kawmah ka gen ahi: Na lak u a kuomah, na kingaihlul ding val u a kingailul lo in, Pathien in mitin kawma taksanna kilawm a piek guol zelin, chil taka ngaihtuoh zaw dingin ka tih chiet na hiu hi.

⁴Sapum khat ah ka tamtak I nei u a, ka chengcheng thilhih vang chuh akibang chiet puoi.

⁵Khutibang mah chun, ei uh tamtak himahleu hingle, Krista achun sapum khat I hiu a; khat khata kika tuoh chiet I hiu hi.

⁶Lungsietna ei piek guol zelin, thil thawnpiek chuom chuom I nei chiet u a, thugen ding I hih chun I ginnau dungzui zelin gen hitiu;

⁷Sinsakna lam a hih chun, sinsak hiting un; mi hilhna lam a hih chun, mi hilh hitiu.

⁸Mi thil pie chun le, itlo in pie hen la, vaihawmte chun le taima takin vaihawm u hen la; mi khuotuoh chun le, maitai takin khuotuoh he’n.

⁹Hehpihna chuh gukhahna tello hi hen. Gitloh hawu unla, apha lam chuh tuchak un.

¹⁰Suohpihte, kihehpihna lam achun, kihehpih takin kilainat tuoh chiet un; kilimbawlna lam achun, kideihsak tuoh chiet un.

¹¹Taimatna lam achun, thadah kiu unla, lungthim pumpi a phachuomngai takin LALPA na chuh sem un.

¹²Kinepna lam u achun kipâk takin um unla; gimtheih thuokna lam achun, thuokhat takin um unla; pauchamna lam achun paucham tuntun un la,

¹³Na thil neihteu chuh, na unau tasamte kikawppih unla; malzinte lawp dân thiem takin um zingun.

¹⁴A hun bawl gimthei ta vangphat pieu inla; vangsak unla, hansie lawh kiu un.

¹⁵Kipakte chuh kipahpih unla, kapte chuh kahpih un.

¹⁶Lungthim munkhat in um chiet un. Kingaisang taluo kiu unla, mi neu neu kivawppih zawu in. Ching kisa taluo kih.

¹⁷Kuo gitloh hita leh, gitloh mah in dinthuk kiu. Mi chengcheng ngaih a thil kilawm ngaihtuoh khawl zawu in.

¹⁸A hih theih diek chun, nang haw lam bêk, mi chengcheng tawh kicham in um un.

¹⁹Deihtakte haw, kiphulak tuoh kiu in, Pathien lungnat awt zawu un, “Phuba himhim kei lak ding ahi, Keima’n dinthuk ing ka, LALPA’n a tii” tih zik ahi ngâl a.

²⁰Himahlele, na melma a gilkiel chun nek ding pie’h, a dangchâk chun, dâwn ding pie’h: khutibanga na hih chun, a luzâng a mei-âm suon sak hi’n la.

²¹Gitloh zawhin um ki’n la, phatna’n gitloh chuh zo zawh.