Read Gangte ROME 14 Bible Online

ROME 14 - Gangte bible

ROME 14

¹Chun, taksanna a zawngkhal mi chuh, a taksan lahnate chuh awimawh lo in lawp zawu in.

²Mi khat chun, thil bangakai ne thei dingin a kigingcha a, mi zawngkhal vangin chuh, ancheh-lohing mai a ne sek hi.

³Bangakai ne thei mi chun, a ne thei lo mi chuh musit kihe’n; a nelo mi’n le a ne thei mi chuh awimawh kihe’n; Pathien in amah chuh a lawp ta a puo.

⁴Mi dang suokte chunga vaihawm dingin, kuo na hi a ahi? A din leh a puk chuh a pu thu ahi ngâl a. Himahlele, amah chuh dinsak in um ina, LALPA chun a dinsak thei ngâl a.

⁵Mi khatin ni khat hi, ni dang cheng sangin a ngailul chuom sek a, mi dangin ni chengcheng hi kibang vekin a ngai sek hi. Mitin, amau lungthim ah kihechien chiet u hen.

⁶Ni chang pa chun LALPA limbawlna’n a chan sek ahi. Chuleh, bangakai ne pa chun, Pathien kawma kipahthu a gen a, LALPA limbawlna’n a ne sek hi.

⁷Kuomah, eimah dinga hing I hi puou a, kuomah, eimah a dinga thi le I hi diek puou hi.

⁸I hin un le, LALPA dingin I hing u a; I thih un le, LALPA dinga thi I hiu hi; zieziekchun, I hin un le, I thih un le, LALPA a I hiu hi.

⁹Krista thihna leh, a hung hin kitna ziek chuh, mihing leh mithite LALPA a hih theihna dingin ahi ngâl a.

¹⁰Himahlele, nangin bangati a na suohpih awimawh? Ahih loh leh, nangin, bangati a, na suohpih musit? Pathien vaihawmna chutphah masangah I bawn un ding ding I hi ngâl u a.

¹¹Pathien Lehkhabu ah: “LALPA chun, Mi tin cheng ka ma ah khun untin, Lei tin cheng le Pathien kawmah kiphuong un au ti a kihâksiel ka hi,” ti a zik ahi ngâl a.

¹²Khutichun, I bawn un Pathien kawmah, eimau chanchin gen chiet ding I hi ngâl u a.

¹³Zieziekchun, ki-awimawh ta puoi tingun, kuon le, amah suohpih dalna ahim, pukna ahim siem loh guo zawu hen.

¹⁴Amah zieng a chun bangmah thienglo a um puoi tih, LALPA Isu achun ka hechien mah mah a, thil khat thienglo a ngaipa ding chun chuh, amah a dingin vang a thienglo ahi.

¹⁵Na thil nek zieka na suohpih lungthim a nat chun, hehpih dân guol chuh na hawh ta lo ahi. A thih sik Krista’n a thih sakna chuh, na thil nek in sukmangthai sak kih.

¹⁶Khutichun, nang u ding a thilpha chuh, gitloh lama gen in um kihen;

¹⁷Pathien gam chuh nek le châk lam thu ahi puoh a, diktatna leh chamna leh, Thagau thiengtho akipahna haw ahi zaw ngâl a.

¹⁸Kuon le, zie tawbanga chuh, Krista na a sep chun, Pathien kipahlam leh mihiemte pahchak in a um sek hi.

¹⁹Zieziekchun, kichamna ding leh, kisukphatchuom tuohna ding thil haw chuh delh hitiu.

²⁰Na thil nek ziekin, Pathien nasep susie kih. Thil cheng chuh a thiengtho ngêi na a, himahlele, a bangkhat nek in mi a sukpuk chun, a ne pa dingin gitlohna ahi.

²¹Na suohpih pukna ding ahih chun, sa nek loh bang, uain dâwn loh bang, thil bang hitaleh, hih loh a phai.

²²Taksanna na neih chuh, Pathien ma ah nangmah chauh het in nei mai ah. Eimah sie leh pha hetna lama mawh kichansak loh chuh hamphat-um ahi.

²³Amahvang chuh, gingchalahpa’n a nek chun, taksanna a neih loh ziekin, mawhchang ahi; bang hitaleh, taksanna lo a thilhih chuh gitloh ahi ngâl a.