Read Gangte ROME 16 Bible Online

ROME 16 - Gangte bible

ROME 16

¹I suohpihnuu, Phoibi, Kenkria khuo a sapchuom haw zenvielnu hi, na deihsak un ti’n, ka hun nget na hiu.

²Pathien mite hih ding bang taka, amahnu hi LALPA min a na pawm ding leh, panpih a ngaihna chenga le na panpih dingin tawh; a ziek chuh, amahnu hi, mi tamtak dingin leh keimah a ding ngêi ale guolpha ahih ziekin.

³Prisilla leh Akuila, Krista Isu a ka naseppih, ka hinna hûkbitna dinga ngâwng dawh phalte nih kha.

⁴Nei hun chibai sak un. Kei mai hilo in, Jentel sapchuom haw lawi chengcheng in le, a kawm u achun kipahthu a gen ui.

⁵A In u a sapchuom kikhawmhaw mah kha le ei hun chibai sak un. Chuleh, ka cha deih tak, Epainetas, Asia gama Krista a gah masapen kha le nei hun chibai sak un.

⁶Nang haw dinga semgim nu Mari kha le nei hun chibai sak un.

⁷Chun, ka Juda chanpihte, Andronikas leh Junias, ka suongkul lutpihte khah nei hun chibai sak un; amau chuh sawlchakte laka minthang tak a hiu a, kei sanga Krista a um masa ahiu ui.

⁸LALPA a ka deihtak Ampiatas kha nei hun chibai sak un.

⁹Krista a ka naseppih, Urbanas leh, ka deihtak, Stakas khah nei hun chibai sak un.

¹⁰Krista a dinga mi ginum tak, Appetis khah nei hun chibai sak un. Aristobulas inkawte laka mite khah nei hun chibai sak un.

¹¹Ka Juda chanpih, Herodion khah nei hun chibai sak un. Narkissas inkawte laka mi, LALPA a umte khah nei hun chibai sak un.

¹²Truphainas leh Truphosas, LALPA a semgim sekte khah nei hun chibai sak un. Deihtak Persis, LALPA a semgim mah mah sek nu khah nei hun chibai sak un.

¹³LALPA telnu, Rufas leh a nu, kei nu le hi khah, nei hun chibai sak un.

¹⁴Asunkritas te, Phlegon te, Hermis te, Patrobas te, Hermas te leh a kawma suohpih umte kha tawh nei hun chibai sak un.

¹⁵Philogogas leh Julia, Nereas leh a suohpihnu Olimpas leh a kawm u a mithiengtho um cheng chengte kha tawh nei hun chibai sak un.

¹⁶Kichawp thiengtho in kichibai un. Krista a Sapchuom haw lawi cheng chengin a hun chibai ui.

¹⁷Chun, suohpihte, kithu-hilhna thu, nangmau haw na dawnsa ngei te, kalh lama kikhenna leh pukna siemte chuh vengpha ding leh nungngatsan dingin ka hun nget na hiu hi.

¹⁸Khutibang mite chuh, I Lalpau Krista nasem ahi puou a, amau haw gilpi ding sem ahi zaw sek ui. Tichun, a kamphatnau leh, a kam thiem un mi chinglote lungthim chuh a thempai sek u a.

¹⁹Chanchin Pha lama na ginum danteu chuh mi chengcheng het in a kithang suok ta ngâl a. Zieziekchun, nangmau haw chung thu achun ka kipâk hi. Zieziekchun, thilpha lama na chit theih u a, thil phalo lama na mawl uh ka deih hi.

²⁰Khutichun, chamna Pathien chun, chawmlo kalin, Setan chuh na kêngpêk nuoi u ah hun tawh den sak pai zieng ina. I Lalpau Isu Krista lungsietna chuh na kawm u ah um hen.

²¹Ka naseppih, Timothe leh ka inkawte Lukias te, Joson te, Sosipater te haw hin a hun chibai ui.

²²Kei, Tertias, zie lehkha zikpa hin, LALPA min in ka hun chibai na hiu hi.

²³Keimah leh sapchuom haw chengcheng tunna pa, Gaia chun a hun chibai na hiu hi. Khuo a sumvawppa, Erastas leh, suohpihpa Kurtas chun a hun chibai na hiu hi.

²⁴I Lalpau leh Isu Krista hehpihna na bawn u a chungah um hen. Amen.

²⁵Pathien chuh lopina piei tiu. Amah chun, Chanchin Pha, Isu Krista chanchin ka gen guol ngêi leh, tuma a pata na kisel gu, thudik hung kiphuong dungzui chun, na taksannau achun a hun sudet thei ngâl a.

²⁶Tuhin, zie thudik tak kiselgu chuh, kumsawt Pathien thupiek dungzui in, thiemgaute’n, a na zik hawu chuh hung kihawm zak in, mitin in a ginchak u a, a zawp theihna dingun namtin kawmah hetsak ahi tai.

²⁷Isu Krista min in, chitna bukim nei, Pathien kawma chun, lopina kumkhuotuong in um ta hen. Amen.