Read Gangte ROME 2 Bible Online

ROME 2 - Gangte bible

ROME 2

¹Zieziekchun, aw mihiem, mi awimawhpa kuo hileh chin le paulap na nei thei puoi; midang na awihmawhna achun, nangmah leh nangmah mawh kichansak na hi a puo. Nang mi awimawh hinle khutibang thil haw chuh na hih sek ngâla.

²Khutibang thilhih sekte chunga Pathien thutanna chuh a dik hi tih I he ngâl u a.

³Aw mihiem, zie tawbang thilhih sekte chunga thutan a pang sek ngâl in, nangin le zie thilte chuh na hih sek ngâl a. Pathien thutanna chuh pumpelh na kigingcha a ahim?

⁴A hihloh leh Pathien phatna’n lungheina dingin a hun pui sek hi tih helo in, a phatna hauh zie leh, a mi khuotuoh zie leh, a dawhtheih zie haw chuh na ngaidau ahi maw?

⁵Himahleh, na lochal leh na lungchang phat ziekin, lungnatna leh Pathien vaihawmna diktak hung kilat ni a ding chun, na chungah lungnatna na kikhawlkhawm ahi.

⁶Pathien chun mitin, a thilhih bang zel un ditkit ding ahi ngâl a.

⁷Thilpha bawl hâmhâm a, lopina leh limbawlna leh, manthai theih lohna hawlte kawm achun Pathien in kumsawt hinna pie’n tin,

⁸Amahvang chuh, thusie bawla, thudik zawp lo a, diktatlohna zawp zawte chung achun lungnatna leh lunggimna leh, dahumna leh lungkhamna nasatak hung um zaw’na.

⁹Mihiem thil gilo hih ta chengte chung achun gimtheihna leh natna hung um intin, Juda mite chungah um masa’n tin, chun Grikte chungah um ina.

¹⁰Chuleh, thilpha bawl ta chengte kawm achun lopina le limbawlna le lungmuonna le piek hi’n a, chun, Juda mite kawma piek masak hi’n tin, chun, Grik mite kawma piek hi’n a.

¹¹Pathien in mi deihsak chuom a nei puoh ngâl a.

¹²Kuole, dân neilo a thilhih gilo chuh, dân bei mah in mangthai un au; chun, kuole, dân nei a thilhih gilo chuh, Dana vaihawm khum in um un au;

¹³Dan thupiek zuih zieka Pathien masanga thiem chan ahi puoh a, himahleh, Dan dungzuia khawsa chuh mi dik hiding ahi.

¹⁴Dan neilo Jentel te’n a pienpih lungchang u ah Dan thupiekte a bawl u a, dân nei kimahleu, ziete chuh dân in a kineih kawm zel ui.

¹⁵Dan in a ngêkhaw chuh a lunggil u a zik ahi tih, a umchan hawu chun a sulang ngâl u a. Ziehaw chuh a sielepha hetnau in a hetpih a, a lungthim hawu chuh a kiniel a, mawh a kichansak vak sek u a, chuleh, thiem a kichansak vak kit zel sek uh ahi.

¹⁶Khutichun, Chanchin Pha ka gen guolin, mihiemte lunggil a thuguk te, Pathien in Isu Krista manga a hun vaihawm ni chu leh zie tawbang mah chuh hi ding ahi.

¹⁷Himahlele, nang Juda minpuo khat na hi ngâl a, Dan chuh na set a Pathien na suon a;

¹⁸Chuleh, a deih bang na he a, Dan thu sinsak in na uma, thilpha têlna dân na he a;

¹⁹Chun, nangmah ngêi chuh mitdûkte puipa, thim laka umte dingin vak leh,

²⁰Mingawlte suchingpa leh, mi mawlte sinsakpa hi’n na kigingcha a. Dan a chun hetna leh thutak a um hi tih na he vek hi.

²¹Zieziekchun, nang midang te sinsakpa, nang leh nang kihilh lo na hi maw? Nang midang te gucha lo dinga sinsakpa, nangin na gu sek maw?

²²Nang, mi zawlsai lo dinga gen pa, nangin zawl na sai sek maw? Nang, milim ho ding zadahpa, nangin milim ho-in a thil haw na gu sek maw?

²³Nang, Dan suongpa, nangin Dan sukkhelh ziekin Pathien na suminsie sek maw?

²⁴A zik guol ngêi u khan, Pathien min chuh nangmau ziekin Jentel te lak achun gensiet in a um tai.

²⁵Dan na zawpa a hih chun, zektan chuh nang dingin a phachuom hi; himahlele, Dan zawp lo na hih chun, na zektan chuh tan loh tawbang ahi.

²⁶Zieziekchun, zektan loh mi’n Dan thupiek zawp taleh, amah chuh zektansa banga ngaih hilo ding ahim?

²⁷Chuleh, pien dan a zektan loh te’n dân a zuih leh, nang lehkha thu leh zektan dân nei ngâla dân bawhsie chuh mawh hun chansak lo ding ahim?

²⁸Ahih leh, Juda mi, zektan diktak chuh kuo ahi leh? A pawlawng maia Juda mi hi chuh Juda mi tak ahi puoi, a pawlawng mai a zektan chuh zektan taktak ahi diek puoi.

²⁹Juda mi taktak chuh sunggil lama Juda mi hi chuh Juda tak ahi; chuleh zektan tak tak chuh lungthim lama zektan ahi. Lehkha thu mai hilo in, thagau ah ahi; amah pahchak lawh chuh mihing apat ahi puoh a, Pathien apat ahi zawi.