Read Gangte ROME 3 Bible Online

ROME 3 - Gangte bible

ROME 3

¹Ahih leh, Juda mi chun Jentel te sangin banga phatchuomna a neih chuom diek? Zektan le banga a phatchuomna?

²Lam tina dingin a phachuom hi; a masapen in, Pathien in a thu haw chuh Judate kawmah a vawpsak masapen a.

³A lak u a mi khenkhat ginumlo in um mahleu bang a ti chuom dinga ahim? A ginum loh ziek u chun Pathien chuh ginumlo mai ding ahi a ahim?

⁴Naisai lo e! Mi chengcheng lepchieh himahleu le, Pathien chuh a dik zing ahi. “Nangin na thugena thiem na chan a, Vaihawm saka na um ale na zawh theihna dingin,” ti a Pathien lehkhabu’n a gen guol in.

⁵Himahlele, I diktat lohnau hin Pathien diktatna a suklat hawih zawk diek chun banga I gen dinguh? Pathien in mi a gawt hin, mi diktatlo ahi a ahim? (Mihiem dân guola ka gen ahi.)

⁶Naisai lo e! khuti a hih chun Pathien in bangti’n a khawvel vai a hawm ding?

⁷Himahlele, ka lepchieh thugen zieka, Pathien thu dik zie, amah sulopi kham hiela a kilat zawk diek ngâl chun, bangti’n a keile migilo guola mawhchansak a ka um naklai ding?

⁸Khuti a hih chun, thilpha hung pawt theihna dingin thil gilo bawl hi tiu ti leng phazaw lo ding? Mi khenkhat in nei hêk u a, khenkhat in ka gen loh hiel nei gensak u a; Zie tawbang mite chun mawh a chan u chuh adik ahi.

⁹Ahih leh, amau haw sangin I pha chuom diek u a ahim? Naisai lo e; Judate leh Grikte chule gitloh suok a um ahiu ui tih ka sulang zaw ahi.

¹⁰“Kuomah diktat himhim a um puou, Khatchale a um hiel puoi,

¹¹Kuomah hethiem himhim a um puou. Kuomah Pathien hawl himhim a um puou hi.

¹²Amau lampi chiet ah a petmang u a, A bawn un, panna bei a hung hi vek tau a; Kuomah thilpha hih himhim a um puou; Khatchale a um puou.

¹³A gawl hawm u chuh thân kihawng ahi a; A lei un milemna thu a gen u a, A mûk sung u ah gûlgu a um a.

¹⁴A kam u chuh hansie lawhna leh thu kha’n a dim a.

¹⁵A keng u chuh thisan suoh dingin a suon hât u a;

¹⁶A lampiu achun manthaina leh lunggimna a um a;

¹⁷Lungmuonna lampi le a he puou hi.

¹⁸A mitmuh u ah Pathien lauhna himhim a um puoi,” tih zik guol khan.

¹⁹Khutichun, Dan in thil bang hitaleh a gen ta chuh, kam tin cheng a thip theihna ding leh khawvel pumpi Pathien masanga thiemloh a chan theihna dingin Dan thu thu a umte kawma a gen ahi tih I heu hi.

²⁰Khutichun, Dan thilhih ziekin mi kuomah a mitmuh in thiem changin um puo’n au; Dan um ziekin gitloh hetna hung um ahi zaw ngâl a.

²¹Himahlele, tuhin, Dan leh thiemgaute hetpih guolin, Dan lo a Pathien diktatna chuh suklatin a um tai;

²²Zie chuh Pathien diktatna, Isu Krista taksan zieka gingcha ta chengte kawma suklata um chuh ahi; lamdanna himhim a um puoh a,

²³Mi chengcheng in thil a hih gilo vek tau a, Pathien lopina châng zo lo ahi tau hi.

²⁴Himahlele, Pathien thilthawnpiek hehpihna ziekin Krista Isu a um tatna zalin a thawna thiemchan sak in I um tau.

²⁵Pathien thuokhatna zâla malaia a gitlohna teu kihetloh sak a a um ziekin a diktatna etsakna dingin Krista Isu chuh a thisana ginna zieka suol thuphachawih na hiding in Pathien in a guot a.

²⁶Tuhin chuh amah diktatna etsakna dingin mihiemte gitlohna chungah thu a nei tai. Zie guol chun Pathien in a diktatna etsak in, Isu taksang taphawtte chuh thiemchanna a pie tai.

²⁷Ahih leh, kisuonna ding khawi ah a um hi? Pawlam a khâk khum in a um tai. Bang dân in ahi die leh? Thilhih dân in ahi die? Hilo e; taksanna dân in ahi zawi.

²⁸Khutichun, Dan thilhih hilo in, taksanna’n mi’n thiemchang in I ngai ui.

²⁹Pathien chuh Judate Pathien mai ahim? Jentel te Pathien le hilo ahim?

³⁰Hi e! zektante chuh a taksanna ziek u a thiemchan sak ding pa chuh Pathien khat mai a hih ngâl chun, Jentel te Pathien le hi ding ahi.

³¹A hih leh, taksanna ziekin Dan chuh bangmahlo in I siem dinguh ahi leh? Naisai lo e; Dan chuh I sukdet zawk uh ahi.