Read Gangte ROME 6 Bible Online

ROME 6 - Gangte bible

ROME 6

¹Bang I gen ta ding u leh? Lungsietna chuh a pun zawk theihna dingin gilo a I um zing dinguh ahim?

²Naisai lo e! ei uh gilo a thisa, gilo in bangti’n a I hin naklai dinguh?

³Ei uh Krista Isu tawh pumkhata baptistma chang ta cheng chun, a thihna ah baptist in I um ui tih he lo na hiu maw?

⁴Zieziekchun, a thihna a baptistma I chanu’n, a mah tawh vuih in I um tau a; Pa lopina’n mithi lak apat Krista a kaihthawh guol khan, ei u le hinna thak a I um theihna dingun.

⁵A thihna kibatpih a amah tawh I kizawp tâk ngâl u chun, a thawhkitna kibatpih inle kizawm hitiu.

⁶Ziehi he leuhing; I mihiem lui u chuh a mah tawh khetdên in a um ta a, gitloh puo sapum chuh sukmangthai a a um theihna dingin, tu a thak a gitloh suok a I um tâk loh na dingun.

⁷Kuole, thisa chuh, gitloh apat a pawt ta ngâl a.

⁸Chun, Krista tawh I thih khawm tâk ngâl u chun, amah tawh hing khawm hitiu tih I gingcha ngâl u a.

⁹Krista chuh mithi lak apat kaihthawh in a um a, thi kit ta puo’n a tih I he ngâl u a; thihna chun amah chungah thu a nei ta puoh ngâl a.

¹⁰A thihna chuh gitlohna lam ah kumkhuo a dingin khatvei mai thi ahi a, a hinna vang chuh Pathien tawh kipawlkhawmna a hing ahi tai.

¹¹Khutibang mah chun, nang haw le gitlohna thihsan a, Krista Isu tawh pumkhat in Pathien a dinga hing ka hi tau hi; ti’n kingai un.

¹²Zieziekchun, na sapum utnateu na zawp na dingun, na sapum thi thei hawu achun gitlohna’n vaihawm kihen.

¹³Na sapum bâkkaiteu le diktatlohna hiem mata dingin gitlohna kawmah pie phal diek kiu in. Zieziekchun, mithi lak apat a hing kit guolin, Pathien kawmah kipieu inla, na sapum bâkkaiteu chule diktatna hiem mat dingin Pathien kawmah pie phal zawu in.

¹⁴Gitlohna’n na chungu ah thu nei ding ahi ta puoh ngâl a, Dan vaihawmna nuoia um na hi ta puou a; lungsietna vaihawmna nuoia um na hi zaw ta ngâl u a.

¹⁵Bangti’n ahi ta die leh? Dan vaihawmna nuoia um I hih loh u a. lungsietna vaihawmna nuoia um I hih zawk ziek u hin I gitloh dinguh ahi dem? Naisai lo e;

¹⁶Kuo kawm hita leh, a thuu ngai dinga a suok a na lut u chun thihna kham a gitloh suok ahim, diktata simna kham a suok ahim hi lele, a thuu na ngaihpau suok a um chuh na hiu ui tih na kihe puou maw?

¹⁷Pathien chuh pahchak in um hen. Khatvei chuh nang haw gitloh suok na hiu a; himahlele, sinsak a na um nau ah, thudik chuh na lungthim chengcheng u a na na zawp uh ahi tai.

¹⁸Gitloh suok apat pawt in, diktatna suokte na hung hi tau hi.

¹⁹(Na phehlevo uh hatlohna ziekin, mihing dân in thu ka gen ahi); na sapum kahawu chuh pawlhchehna kawm leh, sukkhelhna dingin, sukkhelhna kawma suok a na piek phal guol u khan, tuhin, na sapum kahawu chuh thienthona dingin, diktatna kawmah suok in pie phal un.

²⁰Gitloh suokte na hih lai u khan, diktatna lak a pat in na kikiengkawih u a.

²¹Tu a na thil zahpih hawu ahin, zielai khan gah bang ahim na muh sek uh leh? Zie thil haw tawpna khah thihna ahi sek a puo.

²²Himahlele, tuhin chuh gitlohna lak apat kithiel dawkin, Pathien suokte na hung hih phet u hin, thienthona mu kham in, gah na hun nei tau apuo, a tawpna kumkhuo a hinna ngêi chuh.

²³Gitloh man chuh thihna ahi ngâl a, Pathien thil thawnpiek vang chuh, I Lalpau Isu Krista zal chun kumsawt a hinna ahi.