Read Gangte ROME 7 Bible Online

ROME 7 - Gangte bible

ROME 7

¹A hih leh, suohpihte. Dan chun mi a dam sungin a chungah vai a hawm sek hi tih helo na hiu hi? (Dan he mite kawma ka gen ahi hi).

²Numei pasal nei chuh, a pasal damlai cheng a pasal ah kân tawm in a um sek: himahlele, a pasal chuh a thih phat leh, pasal lam ah Dan apat chuh thah dawkin a um sek hi.

³Khutichun, a pasal dam sunga mi dang a neih chun, zawlsai nu ti’n au; a pasal a thih chun chuh, dân apat chuh thah dawkin a um a, tichun, mi dang nei mah lele zawlsai a hi ta puoi.

⁴Khutichun, suohpihte, mi dang, Pathien lama I gah theihna dingun, mithi lak apat kaihthawhpa mawng khah na neih theihna dingun, Krista sapum vangin Dan lam ah suklup in na um tau hi.

⁵I mihinnau ngeina dana I hin lai u khan, Dan chun gitloh utchakna te hun chawktho in, I taksau ahin a hun sem a, tichun, thihna nasem ding chun I na phachuom mah mah sek uh ahi.

⁶Tuhin vang chuh, ei uh ei na tupa, Dan chuh thihsan in, I suokcha tau a. Lehkhazik lui mai banga nasem lo in, Thagau thak in I sem zaw tau hi.

⁷Banga I gen tâk dinguh? Dan chuh gitloh ahim leh? Naisai lo e. Himahlele, Dan chuh gitloh ei hetsak ahi zawi. Dan chun, “Awtcha kih” ti kileh, awhchâk hi helo ding ka hi ngâl a.

⁸Himahlele, gitlohna’n thupiek ziek chun hun lemchâng mu’n, ka sung ah awhchâkna tin cheng a umsak a. Dan lo chun gitlohna chuh a thi ahi.

⁹Keimah ngêi le, makhan danlo in ka hing a, himahlele, thupiek chuh a hung um phetin, gitloh chuh a hung halh a, kei chuh ka thi ta a.

¹⁰Tichun, hinna dinga thupiek chuh thihna ding ahi zawi tih ka hun mudawk ta a.

¹¹Gitlohna’n thupiek vang chun hun lemchâng a mu a, tichun, ei thêm ta a; thupiek chuh mang in ei suklup ahi tai.

¹²Zieziekchun, Dan chuh a thiengtho ahi, thupiek chule a thiengtho a; a diktat in a pha ahi.

¹³A hih leh, thilpha chun kei dingin thihna ahun tun ahi leh? Naisai lo e. Gitlohna chuh kei dingin thihna ahung hi zaw ta a; gitlohna chuh gitlohna ahi tih a lat theihna dingin, thilpha chuh mang in ei suklup zawk ahi. Khutichun, thupiek chuh mang in, gitlohna chuh gitlohna nasatak ahi tih a hun sulang zaw tai.

¹⁴Dan chuh thagau lam thil ahi tih I he ngâl u a, kei vang chuh, phehlevo lama mi, gitloh suok a khawtsa ka hi.

¹⁵Thil ka hih sek hi a lawh ngaihna ka he puoh ngâl a; ka thilhih sek hi, ka thilhih nawp lam a hi puoh ngâl a, ka thil hawt lam tak chuh ka hih zaw sek ahi.

¹⁶Ka hih nawp loh lam thil ka hih ngâl chun, Dan chuh a phai ti a ki-awi ka hi puoh die.

¹⁷Zieziekchun, ka thilhih hi keimah hih ahi puoh a, gitlohna keimah a um hin a hih ahi zawi.

¹⁸Keimah ah, (zie chuh ka phehlevo ah tihna ahi) thilpha him a um puoi tih ka hêi; thilpha hih nawpna chuh keimah ah a um na a, thilpha hihna vang chuh a um diek puoi.

¹⁹Phatna hih ka nawp hi ka hih puoh a, ka nawp loh hi ka hih zaw sek ngâl a.

²⁰Ka nawp loh lam ka hih ngâl chun, a hih chuh kei ka hi ta puoh a; gitloh keimah a um chuh ahi zawi.

²¹Khutichun, Dan chuh bang ahih ka he ta a; thilpha hih ka nawp lai in, gitlohna ka kawmah ahung um sek hi.

²²Ka lungthim taktak chun vang Pathien Dan chungah ka kipâk sek a.

²³Himahleh, ka sapum kahaw ahin dân lamdang tak a um tih ka hêi, zie chun ka lungthim in pha a sak dante chuh a do sek hi. Tichun, gitlohna dân, ka sapum kahaw a nasem sek kawm achun suok in ei pui sek hi.

²⁴Mi gimthei ka hi na lâwm lâwm e! Zie thihna sapum laka hin kuo a ei hukdawk ding!

²⁵Isu Krista, I Lalpau vangin, Pathien kawmah kipahthu ka gen hi. Khutichun, keimah mawng in ka lungthim in, Pathien Dan na ka sem sek a, ka phehlevo vang chun gitlohna dân na ka sem sek hi.