Read Gangte ROME 8 Bible Online

ROME 8 - Gangte bible

ROME 8

¹Khutichun, tuhin vang Krista Isu a umte ding chun, mawh chansakna himhim a um ta puoi.

²Krista Isu a hinna thagau dân chun, gitlohna leh thihna dân apat chuh ei pawtsak ta ngâl a.

³Phehlevo zieka Dan chuh a hatloh a, a hih theih guol loh chuh, Pathien in amah Chapa ngêi, phehlevo gitloh bang pu’n, gitloh thawihna dingin a hun sawl a, phehlevo a gitlohna um chuh mawh a hun chansak ta a:

⁴phehlevo dân hawh lo a, thagau dân hawh zawte eimau ahin, Dan in a ngek thilte chuh muolsuoha a um theihna dingin Pathien in zie chuh ahih tai.

⁵Phehlevo dana umte chun phehlevo lam thilte a lunggulh sek u a; thagau dana umte vang chun chuh thagau lam thilte a lunggulh sek ui.

⁶Phehlevo lam thilte lunggulh chuh thihna ahi himahleh, thagau lam thil lunggulh vang chuh hinna leh lungmuonna ahi.

⁷Phehlevo lunggulh lam chuh Pathien dona ahi a, zie chuh Pathien dân ah a um puoh ngâl a, um le a um thei lo him ahi.

⁸Zieziekchun, phehlevo a umte chun, Pathien a sukipak thei puou hi.

⁹Himahlele, Pathien Thagau nangmau a a um tak zet chun, phehlevo a um na hita puou a, Thagau a um na hi zawu hi. Amahvang chuh, kuole, Krista Thagau neilo chuh amah mi ahi puoi.

¹⁰Krista chuh nangmau a a um chun, gitlohna zieka sapum thi ding himahleu chin, Pathien masanga thiemchang na hih tâk ziekun, Thagau chuh nang u a dingin hinna ahi.

¹¹Himahlele, mithi lak apat a Isu kaitho kit pa, Pathien Thagau chuh nangmau a um Thagau zal chun, na sapum uh thi theite chuh suhing ina.

¹²Zieziekchun, suohpihte, bat I nei ui; phehlevo dana um dingin, phehlevo lak achun a hi puoi.

¹³Phehlevo dana na um u chun thi tei ding na hiu hi; himahlele, sapum thilhihte Thagau a na suklup u chun hing un lau.

¹⁴Pathien Thagau puih a um ta chuh Pathien chate ahi ngâl u a.

¹⁵Lau a um kit dingin suok hihna thagau mu na hi puou a, cha hihna thagau mu na hi zaw ngâl u a; zie thagau zal chun “Abba, Hepa” ti’n I kiko sek uh ahi.

¹⁶Thagau mawng chun, eimau haw thagau tawh, Pathien chate I hiu hi, tih ei hetpih sek hi.

¹⁷Khutichun, chate I hih tâk u chun, go luohpihte I hiu a; Pathien go luohte, Krista luohpihte I hiu hi; a thuoknate I thuokpih u chun, a kawmah limbawl in um ngêi hitiu.

¹⁸Tulai a thawkna haw hi, dana I chung u a lopina suklat ding chu tawh tehkal kham in ka ngai puoi.

¹⁹Thilsiem chengcheng te chun, ngaklah tak mai in, Pathien chate kilâkna ding chuh a ngak ngâl u a.

²⁰Thilsiem chengcheng te chuh, thil manloh thu thu a um dingin a um tau a, zie chuh amau ut thu hi ta lo in, Pathien deih bang ahi zaw ngâl a. Himahlele, kinepna khat a nei na lai uh ahi,

²¹thilsiemte chuh muot mang mai dinga a saltannau apat chun ni khat tei, zalenna muu un tin uh; Pathien chate zalenna lopi tak zal chuh zo un au.

²²Thilsiem chengcheng te chuh tu chan hin, tau leh, nauhanatna thuokin a um ui tih I he ngâl u a.

²³Zie mai chuh ei puoi, eihaw ngêi le, Pathien thilpiek masa Thagau neite hin le, I sapum tatnau chuh ngak in, ei u nasan le I lungthim un I tau uh ahi.

²⁴Zie kineppih dinga chuh hukdama um I hiu hi, himahlele, muh theih zing kinepna hi kinepna dik ahi puoi. Mi’n a muh zingsa chuh, bangti’n a a na kinep theih ding?

²⁵I muh loh chuh I kinep le vang chuh I ngak tuntun sek ui.

²⁶Khutibang mah chun, Thagau chun I zawnkhalna teu ei panpih sek a; bangtia paucham ding ahim tih I he ngâl puou a; himahlele, Thagau chun, tau gen theih loh khawp in ei uh ei paucham sak sek hi.

²⁷Chun, Pathien, lunggil en pa chun Thagau lunggulh chuh a he a, khutichun, Thagau in amah deihdan bangin, eihaw a dingin Pathien kawmah ei ngetsak sek hi.

²⁸Chun, Pathien hehpihte, amah guot guola a sapte ding chun, a phatna dingun bang chengah a sepsak sek hi tih I heu a;

²⁹Pathien in a telte chuh amah Chapa bang taka um dingin a guotlawk a, a Chapa chuh suohpih tamtak te laka Cha masapen a hung hih theihna dingin.

³⁰Chun, a guotlawkte chuh a sama, chun, a sapte chuh thiem le a chansaka, chun thiem a chansakte chuh a limbawl hi.

³¹Zie thu haw achun banga I gen tâk ding u leh? Pathien ei u lama a pan chun kuo a ei do thei ding?

³²Amah chapa ngêi le sit lo a I bawn u a sika piepa chun. thil chengcheng le a thawn in ei pie tello ding ahi a ahim?

³³Pathien mi telte chuh kuo a hêk ding? Thiemchan sakpa chuh Pathien ahi ngâl a.

³⁴Kuo a mawh chansak ding? A thi khah Krista Isu ahi ngâl a. Ahi, thihna apat a tho kit a, Pathien changlama um a, ei gensak pa mah kha ahi.

³⁵Krista hehpihna apat chun kuo a ei khen ding? Dahumna’n ahim, lungkhamna’n ahim lauh-umna’n ahim, sukgimtheihna’n ahim, kiel in ahim, sangawnna’n ahim, lauh-umna’n ahim, chemzâm in ahim ei khen ding?

³⁶Pathien Lehkha thu’n, “Nang vangin ni tum in thah in ka um sek ui; Belam thah dingte guola ngaih ka hiu,” ti a a gen guol khan.

³⁷Khen lo e! ziehaw chengcheng achun, ei hehpihpa vang chun, lopi taka zote I hiu hi.

³⁸Thihna te, hinna te, vânsâwlchâkte; lalnate, thil umsa te, thil hung um ding te, thilhih theihna te, sanna te, thukna te,

³⁹Thilsiem dang him himte’n le, I Lalpau Krista Isu a um, Pathien hehpihna apat chun, ei khen thei puo’n a tih dik takin ka he ngâla.