Read Gangte 1 KORINTH 10 Bible Online

1 KORINTH 10 - Gangte bible

1 KORINTH 10

¹Suohpihte, ziehi na hetzing uh ka nuom hi: Mosi puihna nuoia, ei uh ei suonte chunga thiltung chengcheng khah. A bawn un, meipi puihna nuoi ah a um u a, chun, a bawnu a, Tuipi San bit taka a kaih suok kêi na thuu khah.

²Mosi zuia, a bawn u a, meipi leh Tuipi a baptist a a um u kha.

³Chuleh, a bawn u a, thagau lam an leh,

⁴thagau lam tui a dâwn chiet u khah. Amau haw zuipa, thagau lam suongpi a khah a dâwn chiet u a, zie chuh Krista ahi.

⁵Himahlele, khutisa chun le, a lak uh a mi tamzaw chunga khan Pathien a kipâk puoh a; khutichun, a luong hawu chuh thalek gam ah a kithehdalh ta kha.

⁶Tuhin, ziehaw chengcheng chuh, eihaw a dingin, thil gilo a hih guol uh utcha lo a,

⁷a lak uh a khenkhat in milim a ho guol u a I hih lohna dingun etsakna ahi tai. Lehkhabu thiengtho in, “Mipite chuh ne leh dâwn dingin a chuu a, chun; a kipan u a, ginglote umdan in a um tau hi,” tih a gen guol khan.

⁸A lak uh a khenkhat te’n, nungak a deihchau a, ni khata sing nih leh sang thum in a thih lawh guol u khan, kideihcha puoi tiu.

⁹A lak uh a khenkhat in, LALPA a patep u a, gul a sukmangthai a a um lawh guol u khan, LALPA chuh zedap puoi tiu.

¹⁰A lak uh a khenkhat a phunchiek u a sumangthaipa, sukmangthai a a um lawh guol u khan, phunchiek puoi tiu.

¹¹Ziehaw chuh etsakna dingin a chung u a hungtung ahi kha; ei uh, hun tâwp hungtunna dingte ding hin le ei hilhna ding u a zik ahi.

¹²Zieziekchun, dinga kingaihtuoh chuh chingthei hen; khutilochun, puk kha’na.

¹³Mihiem thuok theih bang ngâllo chuh, thepna himhim na chungu ah a tung kha ngâl puoh a. Pathien in a thutiem chuh a vawp zing a, na thuok theih val u chuh, na chung u a thepna a tun phal puo’n a; thepna na tuok phat u leh, zie do zawhna ding chun hatna hun pie’n tin, tichun, taih dawkna ding hun siem sak zaw’na.

¹⁴Zieziekchun, ka deihtakte haw, milim ho hi haihsan un.

¹⁵Miching te kawma thugen guola ka hun gen ahi a, ka thugen hi ngaihtuoh phau in.

¹⁶LALPA nitâk ankuong a khawn manga, Pathien kawma kipahthu I gen sek u a; zie a I dâwn tak u chuleh, Krista thisan kikawppih hilo I hiu hi? Chângthâk I phelsuoh u a, I nek tak u leh, Krista sapum kikawppih hilo I hiu hi?

¹⁷Ei uh, mi tamtak hi chângthâk tang khat, sapum khat I hiu a; I bawn un chângthâk tang khat apat I chang chiet ngâl u a.

¹⁸Israel mite hi ngaihtuoh tiem u; kithawihna sa nete chun, maichâm ah, Pathien kawma nasepna achun chan a nei tho uh ahi.

¹⁹Banga ka gen leh? milim ahim, a kawma an thillat ahim chuh bang thil ahi tih, ka gen hi?

²⁰Jentel te kithawihna chuh Pathien kawmah hilo in, thithate kawmah ahi zawi tih ka gen zawk ahi. Nang haw vang chun, thithate na kikawppih uh ka hun deihsak puoi.

²¹LALPA khawn leh thitha khawn dâwn kawp thei puo’n lau; LALPA dawhkhâng leh, thithate dawhkhâng achun le ne kawp thei diek puo’n lau.

²²A hihloh leh, LALPA chuh itthik dinga chawhtho I guot uh ahi maw? Amah sangin I hatzawu a ahi?

²³Thil cheng hih keia dingin a thieng a, himahlele, thil cheng hih a pha khel puoi. Thil cheng hih a thieng a, himahleh, thil chengcheng hihin mi a siempha khel puoi.

²⁴Kuo’n le, eimah phatna ding mai hawl lo in, mi dangte phatna ding le hawl zaw hen.

²⁵Sa dawl a a zawk taphawt u chuh, na sie leh pha hetna ziek u a bangmah dawng khel lo in ne mai un.

²⁶Lehkhabu thiengtho in, “Leisiet leh a sunga um chengcheng hi LALPA a ahi,” a ti ngâl a.

²⁷Awilo mi laka kuo ahim khatin, an ne dinga a hun chiel chun, sie leh pha hetna zieka bangmah dawng khel lo in, a hun luihsak u chuh ne mai un.

²⁸Himahlele, kuo ahim khatin, “Ziehi kithawihna sa ahi,” ti a a hun hilh chun, a hun hetsakpa ziek chun leh, na sie leh pha hetna vang u chun ne kiu un.

²⁹Zie chuh, nangmah sie leh pha hetna ti ka hi puoh a, midang sie leh pha hetna gen ka hi zawi. Mi kuo ahim khatin, “Bang zieka, midang te sie leh pha hetna zieka ka zalenna chuh awihmawh a um a?

³⁰Ka an nek ding chunga Pathien kawma kipahthu ka gen phawt chun, bang zieka midang in ka an nêk ding chunga kipahthu ka genna chunga chuh ei awimawh ahi?” ti maithei ahi.

³¹Khutichun, na nek un le, na dâwn un le, na thilhih chengcheng u chuh, Pathien lopina ding ngenin hih un.

³²Judate ahim, Grikte ahim, leh Pathien sapchuom haw dingin le, a pukna dingun bangmah hih kiu.

³³Ken, keimah phatna ding mai hawl lo a, hukdam a hih theihna dingun, mi chengcheng phatna ding ngaihtuoh zaw a, ka thilhih chenga mi chengcheng sukkipak ka guot guol hin hih un.