Read Gangte 1 KORINTH 15 Bible Online

1 KORINTH 15 - Gangte bible

1 KORINTH 15

¹Chun, suohpihte, tuhin, Chanchin Pha na kawm u a ka gen, zie chuh na na lawp u a; ginna det taka na dinnau ngêi khah hun hetsak kit ka nawp ahi.

²Zie chuh Chanchin Pha na kawm u a ka gensa khah ahi. Ka thu hun gen khah, na ginchak maimai uh hilo a, na pawm det uh a hih chun, zie mah achun hukdama um na hiu hi.

³A masapen in, ka muh mah khah ka hun hilh sawn na hiu hi: khati a, Krista chuh, Pathien Lehkha thu bang zela, I gitlohna hawu zieka a thih a;

⁴vuih a um a, Pathien Lehkha thu bang zela ni thum ni a kaihthawh a a um a; Kiphas kawma a hung kilak tâk thu kha;

⁵zie nung chun, sawm le nih te kawmah a kilak kit a.

⁶Zie nung chun, amah zuite zanga sanga tam zaw te kawmah a kilak kit a; a lak uh a khenkhat chuh tuhin le, a dam nalai u a, khenkhatte chuh a ipmu tau hi.

⁷Zie nung chun Jakob kawmah a kilak a, chun, zie nung chun sawlchak cheng chengte kawmah a kilak kit a.

⁸Chun, a nunung pên achun, chapang a hun lo a pieng tawbang, keimah ngêi kawma hin a kilak ta a.

⁹Kei vang, sawlchak laka neupen, Pathien sapchuom haw ka bawl gimtheih zieka, sawlchak min pu a vawh tâk le hilo ka hi ngâl a.

¹⁰Himahlele, Pathien lungsietna vangin, ka hih hih ka hi tai; chun, a lungsietna ei piek chuh, a thawn in a um puoi. Khutih malak in, sawlchak dangte cheng sangin ka sep gim zawk bawn ahi, himahleh, keima’n ka sem puoh a, Pathien lungsietna chun keimah a a sep zawk ahi.

¹¹Khutichun, kei apat hi leh. amau haw apat hileh, ka thugen hawu khah zie mah chuh ahi a, na ginchak u khale zie mah khah ahi zel hi.

¹²Ka thugen u chuh, Krista mithi lak apat a tho kit hi, tih a hih ngâl chun, bangti dana, na lak uh a mi khenkhat in, “Mithi thawhkitna a um puoi,” na tih uh a?

¹³Mithi thawhkitna a um loh ngâl chun, Krista khale kaihthawh in um puo’n a;

¹⁴chun, Krista kaihthawha a um loh ngâl chun, ka thugen u hile bangmah hi puo’n tin, na ginchak uh hile bangmah hi diek puo’n a.

¹⁵Khuti mai chuh hilo in, Krista chuh thihna apat Pathien in a kaitho hi tih ka gen ziek un, hetpih diklo a ngawh in ka um u a, Krista chuh tho kit lo hileh, a dik takin mithite chu le tho kit lo ding a hiu hi.

¹⁶Zieziekchun, mithite kaihthawha a um loh ngâl u chun, Krista khale kaihthawh in um puo’n a.

¹⁷Chun, Krista khah kaihthawha a um loh chun, na ginchak u chuh bangmahlo hi’n tin, gitloh a mangthai zing hin lau.

¹⁸Khuti a hih chun, Krista a na thisate kha, beimang hi ta’n au.

¹⁹Tu damsung maia dinga, Krista chunga kinepna nei I hih u chun, mi chengcheng laka, mi lungsiet-um pên hii tiu.

²⁰Himahlele, Krista chuh, mithi lak apat kaihthawh in a um hi tih hi thudik ahi a; mithite thawh mapuipa a hung hi tai.

²¹Mihiem zieka thihna a hung um guol mah hin, mihiem ziek mah in, mithi thawhkitna le hung um ahi ngâl a.

²²Adam a chuh, mi chengcheng a thih guol un, Krista a chun mi chengcheng sukhin a um ahi tai.

²³Himahlele, mitin, amah hun chiet zel ah hi’n tin; Krista chuh thawh mapuipa ahi a; zie nunga a hung kitna achun, amah a te chuh hung hi’n a.

²⁴Chun, a tawpna chuh hungtung intin, zie nung chuleh, vaihawmna cheng chengte, thuneihna cheng chengte leh thilhih theihna cheng chengte chuh, a sukbeih nung leh, Pathien lenggam chuh. Pa kawm ngêi achun pie’n a.

²⁵A melmate chengcheng a kêngpêk nuoia a kawih masang sieh, amah chun vaihawm ding ahi ngâl a.

²⁶Melma nunung pên, sukmang a um ding chuh thihna hi ahi.

²⁷Pathien Lehkha thu’n: “Amah chun a kêngpêk nuoi ah bangakai a kawih a,” tih a gen hin, “A nuoia bangakai kawih in a um,” tih hin, Krista nuoia bangakai kawihpa, Pathien mah chuh a tel puoi, tih a kilang him ahi.

²⁸Himahleh, Krista thuneihna nuoia, bangakai kawih a hih phat chuleh, amah, Chapa ngêi chule, bang cheng a nuoia kawihpa, Pathien nuoi achun kawih in um ta’n tin; tichun, Pathien chuh, thil bangakai chunga vaihawm hi ta’n a.

²⁹Khuti a hih loh chun, mithite ding tuma baptistma ana changte chuh, bang a lawh ta ding u? Mithite, kaihthawha a um loh hiel ding u chun, bang khawka, amau tuma dinga baptistma a na chang sek ahi ding u?

³⁰Chun, bang ziekin em, ei uh hile dâkkâl tina lauhthawng-um a I um sek uh?

³¹Suohpihte, nicheng in, ka thi sek hi! Nang haw ka hun kisuonpihna zieka, Krista tawh pumkhata I umna ziek un, zie thu chuh ka hun gen ahi.

³²Mihiem apat a phulna zieka, Ephesi khuo a sahangte khah suol ka hih chun, kei dingin banga phatchuomna um ding? Mithite kaihthawha a um loh ding u chun, I neu in, I dâwn ta puoh ding u leh, zing leh thi ding I hi ngâl u a!

³³Lem in um kiu in; “Guol gilo chun, nungchang pha a sukhawlo sek ui.”

³⁴Hetna chîm takin um unla; gilo ta kiu in; khenkhat in Pathien hetna him him na neih loh ziekun, na zahchâkna dingun ziehi ka gen ahi.

³⁵Himahlele, kuo ahim in. “Mithite chuh bangti’n a kaihthawha a um dinguh? Sapum bang tawbang pu’na a um dinguh,?” a ti hi’n a.

³⁶Nang mi ngawl! nangmah ngêi in le, thaichi mu na tuh sek hi, a thih zet loh chun sukhin in a um puoh a,

³⁷Na tuh sek hi, a sapum a um ding chuh na tuh puoh a: a changmai na tuh sek, buh chang ahim, chi dang ahim ahi thei hi.

³⁸Himahlele, Pathien in amah deih bang zelin sapum a pie sek; a chang tin kawm achun amau sapum ding chiet chuh a pie sek hi.

³⁹Hinna nei sapum chengcheng hi, pheh kibang ahi puou a; mihiem phehlevo a chuom a, vacha phehlevo a chuom a, nga phehlevo a chuom hi.

⁴⁰Van taksa a um a, lei taksa le a um hi; himahlele, van tak sa lopina chuh a chuom a, lei taksa lopina chuh a chuom hi.

⁴¹Nisa lopina a chuom a, tha lopina le a chuom hi; aksi lopina a chuom a, aksi leh aksi lopina chule akibang kit puoi.

⁴²Mithi thawhkitna hile khutibang mah chuh ahi. Muot theia tuhin a um a, muot theilo a kaihthawh a um ding ahi.

⁴³Limbawl loh a tuhin a um a, lopi taka kaihthawh a um dingin; zawngkhal taka tuhin a um a, thilhih thei taka kaihthawh a um dingin.

⁴⁴Mihiem taksa a tuhin a um a, thagau lam sapum a kaihthawh a um dingin. Mihiem lam sapum a um chun, thagau lam sapum le um ina.

⁴⁵Zieziekchun, Pathien Lehkhabu’n, “Mihing masapen Adam chuh, hinna nei a siem in a um hi,” ti a a gen chuh; Adam nunung zaw chuh hinna piepa thagau chuh ahi.

⁴⁶Himahlele, thagau lam chuh a um masa puoh a, taksa lam chuh a um masa a; zie nung chun, thagau lam chuh hung um ahi zaw ngâl a.

⁴⁷Adam masa chuh, leia siem, leisiet apat a um ahi a, Adam nihna chuh, van apat a hung ahi.

⁴⁸Leia umte chuh, leia siem haw mel mah bang a puu a, van a umte chuh, van apat a hung mah bang khah ahi.

⁴⁹Chun, leia siemte mel batna I put bang mah u hin, van apat a hungte mel bang chuh pu ding I hiu hi.

⁵⁰Suohpihte, “Phehlevo leh thisan hin Pathien gam luoh thei puo’n tin; muot thei hin, muot theilo le luoh thei diek puo’n a,” tih ka hun hilh na hiu hi.

⁵¹Ngaitiem u, thuguk ka hun hilh ding na hiu hi: I bawn un a na ipmu khel puoi ting uh, himahlele, I bawn un, pengkun nunung pên git tieng chuleh, chawmlo kalin,

⁵²mitphetkal lo in, sukdanglam in um vek tai tiu. Pêngkun a hung git tieng chuleh, mithite chuh, muot theilo a kaihthawh in um un tin uh; ei uh le sukdanglam in um vek tai tiu.

⁵³Zie muot thei hin, muot theih lohna a silh ding ahi a, zie thithei hin le, thih theih lohna a silh ding ahi.

⁵⁴Khutichun. zie muot thei hin, muot theih lohna a silh a, zie thithei hin, thih theih lohna a silh tieng chuleh; “Zawhna’n, thihna a valh zo tai!” tih Pathien Lehkhathu zik hi hungtung kim ta’n a.

⁵⁵“Aw thihna, na gu chuh khawi ah a um ta? Aw thân, na zawhna chuh khawi a um ahi ta?”

⁵⁶Thihna gu chuh gitloh ahi a; gitloh thilhih theihna chuh, Dan thu chuh ahi.

⁵⁷Himahlele, I Lalpau Isu Krista zâla zawhna ei piepa Pathien kawm achun kipahthu um hen.

⁵⁸Zieziekchun, ka suohpih deihtakte, dettak in, suktawih zawh loh in, LALPA na chuh phachuomngai taka sem in um zingun; na sepgimnau chuh LALPA achun a thâwn ngei puoi tih na he ngâl u a.