Read Gangte 1 KORINTH 16 Bible Online

1 KORINTH 16 - Gangte bible

1 KORINTH 16

¹Tuhin, Judai gama Pathien sapchuom umte dinga tuoklawm dawl ding na hun zikna thuu akhan; Galati gama sapchuomte kawma ka gen guol khan hih un.

²Ni sagih ni masapen achun, mitin in, vangsakna a muh bang zelin, a na kikawih chuom chiet unla; kei ka hung tieng leh, tuoklawm dawl himhim a um lohna dingin.

³Chun, ka hung tieng chuleh, ginchak um, set theih na sak pên u chuh, na sum tuok u chuh Jerusalem a va thak dingin. lehkha tawh sawl na’ng ka.

⁴Khutilo a, kei chieh a kilawm ding lele, amau haw chuh kei tawh kitawn na’ng kau.

⁵Chun, Makedonia gam ka tawh suok tieng leh, na kawm u ah hung ing ka; Makedonia gam chuh ka tawh suok ding him ahi ngâl a.

⁶Nang haw kawma vang chawmkhat châm ing ka; phalbi sung cheng bawn châm ing ka; khawitak hileh, ka chiehna ding lama chuh nei thak theihna dingun.

⁷Tuchung a pahlam maia kimuhtuoh ka nuom puoh a, LALPA’n lem a sak chun, sawt deuh châm ka kinem ngâl a.

⁸Himahlele, Pentekost tiengin, Ephesi khuo a hin châm ing ka.

⁹Ei dodal tamtak um mahleu, nasepna dinga hun pha leh lemchâng, kawt lientak a kihawng ngâl a.

¹⁰Chun, Timothe khah a hungtun chun, lînglau lo a na lak uh a a um theihna dingin, a na chingthei un; keimah bang hin. amah chuh LALPA nasem ahi ngâl a.

¹¹Zieziekchun, kuoma’n amah chuh musit kihen; ka kawma a hung theihna dingin, lungmuong takin thak zawu in; suohpihte tawh amah na muh ka kinem ngâl u a.

¹²I suohpihpau Apollos chanchin a hih leh, suohpih dangte tawh na kawm u a hung dingin ka chiel a, himahlele, tuchung hin vang, hung zieng a nuom puoh a; himahleh, hun lemchâng a neih tieng leh hung ding ahi.

¹³Kiveng unla, taksanna achun ding det unla; hangsan takin um unla, hât takin um un.

¹⁴Na hih takphawt u chuh, lungsietna zieka hih hi zel hen.

¹⁵Suohpihte, Stephan inkawte chuh Akaia gama awi masapente ahiu a, mi thiengthote zenviel dingin a kipieu hi tih na heu hi.

¹⁶Khutibang mite kawma leh, a nasep huhteu leh, semgim chengte kawma chuh kitulut dingin, ka hun nget na hiu hi.

¹⁷Stephan te, Phortunate, Akaika te a hung u hi, ka kipâk hi, na um loh u le kihe lo khawpa ei kawih ziek u hin.

¹⁸Amau haw hin, nang haw lungthim a sukhalh guol un, keihaw lungthim le a suhalh ngâl u a. Zieziekchun, khutibang mite hi, het ding kilawm mawng ahiu hi.

¹⁹Asia gama sapchuomte hin a hun chibai na hiu ui. Akuila leh Prisilla hin le, a In u a sapchuom kikhawmhaw hi tawh, LALPA achun, chibai phapen a hun pieu hi.

²⁰Suohpihte chengcheng hin a hun chibai na hiu hi. Kichawp thiengtho in kichibai chiet un.

²¹Kei Paul in keimah khut ngeia ziehi ka hun zik ahi:

²²Kuo’n le, LALPA a hehpih loh chun, hansie dawl in um hen. (Anathema) I Lalpau chuh a hung hi! (Maranatha)

²³LALPA Isu Krista hehpihna chuh na bawn u a chungah um hen.

²⁴Krista Isu a ka hun lungsietna chuh, na bawn u a chungah um ta he’n. Amen.