Read Gangte 1 KORINTH 7 Bible Online

1 KORINTH 7 - Gangte bible

1 KORINTH 7

¹Tuhin, ka kawma na thil zik hawu kha gen ta leng: Pasal dingin, numei khawih loh a phâi.

²Himahleh, kideihchakna a um sek ziekin, pasal in zi chuom nei chiet u henla; numei inle pasal chuom nei chiet u hen.

³Khutichun, Pasal chun a zi kawmah a chan ding kilawm chuh pie hen; khutibangmah in zi chun le a pasal kawmah a chan ding kilawm chuh pie thuk hen.

⁴Zi chun amah sapum chungah thu a nei puoh a, a pasal in thu a nei zawi; khutibang mah chun, pasal inle, amah sapum chungah thu a nei puoh a; zi chun thu a neih zawk ahi.

⁵An ngâwl a paucham dinga na kipiek theih na ding u leh, na kipawl kit theih na dingun, sawtlo cha a dingin pha na sak gêl gêl ngâlloh u chun a kuomah zawk kisudawng kiu in.

⁶Himahlele, zie thu hi, thupie lam sanga ka gen ahi puoh a, phalsak lam thu a ka gen ahi zawi.

⁷Mi chengcheng keimah guol tak hin um suok vek leu ka nawp ahi a, himahlele, mitin in, Pathien kawm apat thilpiek chuom chiet a dawng u a, khatin thilpiek khat a dawng a, a dangin thil dang khat a dawng ngâl a.

⁸Himahlele, zi neilote leh meithaite kawm achun hiti hin ka tih ahi: Keimah guol tak hin um chiet leu amau a dingin pha ding ahi.

⁹Himahlele, kidêk theihna a neih loh ngâl u chun, kichêng u hen; hûk a zawnthanghuoi a um sangin, kichên chuh a phazaw ngâl a.

¹⁰Chun, kichêngsate kawm achun thu ka piek ahi; keimah piek hilo in, LALPA apat ahi zawi; zi chun a pasal kikhenpih kihe’n;

¹¹A kikhenpih ngâl chun, pasal nei ta lo in um ngâl ngâl he’n, ahihloh leh, a pasal mah tawh kicham kit u he’n; chun, Pasal chun le a zi ma kihe’n.

¹²Mi dang kawma vang chuh, LALPA hilo in, keimah ngêi in ka gen ahi: Suohpih kuo’nle, awilo mi zi’n nei taleh, amah chun a kawma um zing a lung hih chun, ma kiheh.

¹³Chuleh, numei le, pasal awilo mi tawh a kichên chun, a pasal in a kawma um zing a lung hih chun, kikhenpih kihen.

¹⁴Pasal awilo mi chuh, a zi tawh pumkhat a hihna zal u chun, Pathien pawm tâk ahi a; zi awilo chule, a pasal tawh pumkhat a hihna zal u chun, Pathien pawm tâk ahi ngâl a; khuti hi kileh, a chateu chuh awilote cha tawbang hi ding ahiu a; himahlele, a hihna bangun, Pathien pawm tâk ahi ngâl u a.

¹⁵Himahlele, awilo zaw chun, mâk a nawp chun, ma mai he’n, khutibang thila chun pasal ahim, zi ahim chuh kân ahi puoi. Pathien in kicham diel a cheng khawm dingin a hun sap uh na hi ngâl u a.

¹⁶Zie tawbang thil ahin, nang zi, gingcha mi zaw chun, na pasal na hukdam ding leh hukdam loh ding, bangti’n a na het theih ding? chun, nang pasal, gingcha mi zaw’nle, na zi na hukdam ding leh hukdam loh ding bangti’n a na het theih ding?

¹⁷Bang hitaleh, mi tin, LALPA’n thilpiek a piek bang chiet leh, Pathien in a sapna bang chiet u ah um chiet u he’n. Zie tawbang tak chuh ahi, sapchuomte chengcheng kawma ka sinsak sek chuh.

¹⁸Zektansa sap a um u? A zektan melchiknau chuh sukmang guo chuom kiheh. Zektan loh sap a um u? Zektan guo diek kihe’n.

¹⁹Pathien thupiek zawp ngâllo chuh, zektan chuh bangmah ahi puoh a, zektan loh le bangmah ei chuom diek puoi.

²⁰Mi tin, Pathien in a sap laia a umna chiet u achun um chiet u hen.

²¹Suok a na um laia sap na him? Zie chuh buoipih se kih, amahvang, na pawt theih ding chun, mang zaw’n.

²²Suok a um, LALPA sapte chuh, LALPA pawtsak ahi a; khutibang mah in, suok hilo a, LALPA sapte chule, LALPA suok ahi.

²³Pathien in mana a hun châwk na hi tau a; khutichun, mihiemte suok in lut kit ta kiu un.

²⁴Ka suohpihte haw, mi tin, sap a a um laia a umna ngêi mah achun, Pathien tawh kipawl khawm in um chiet zing zawu he’n.

²⁵Tuhin, nungak thiengtho chung thu a na hun zik hawu khah gen ta leng: LALPA apat thupiek ka nei puoh a; himahlele, LALPA apat khuotuohna mu ka hih ziekin, ka ngaihtuoh dân hun gen ing ka.

²⁶Tulai a gimtheihna ziek hin, ziehi pha dingin ka ngaihtuoh hi; mi, a um ngei mah bang u a um hih.

²⁷Zi a kân a um na him? Kisûtna hawl kih. Zi a kân a umlo na him? Zi hawl diek kih.

²⁸Himahlele, zi na neih tâk chun, thil na hihkhiel puoi, nungak in le pasal a neih chun, thil sukhiel ei diek puoi. Amahvang chuh, khutibang mite chun, taksa ah gimtheihna chuh thuok un au; ken vang, hun thuok loh sak ka guot zawk ahi.

²⁹Himahlele, suohpihte, ziehi ka tih ahi: Tu a kipat hin, zi neite chuh neilo guola a umna ding u leh;

³⁰kapte chuh, kap lo guola a um theihna ding u leh, tu a nui te chuh, kipâk lo guola a um theihna ding u leh, a chawte chuh neilo guola a um theihna ding u leh;

³¹Van nuoi thila kimangte chuh, kimang taluo lo a a um theihna dinguh hun chuh, hun saupi a um ta puoi. Tu a khawvel umdan hi, hun sawt ding ahi ta puoh ngâl a.

³²Himahlele, lungngaihna neilo a na um uh ka hun deihsak na hiu hi. Zi neilo chun, LALPA sukkipah na dân ding ngaihtuoh in, LALPA lam thil chuh a khawksak sek hi.

³³Zi neite vang chun, a zi sukkipah dân ding ngaihtuoh in, vannuoi thil lam mai a khawksak zaw sek ui.

³⁴Chun, pasal nei leh nungak lai chuh akibang kit zel puoi. Pasal neilo chun, a taksa leh thagau chuh thiengtho taka a um theihna dingin, LALPA thil lam chuh a khawksak sek a; pasal nei vang chun chuh, a pasal sukkipah dân ding ngaihtuoh in, vannuoi thil lam chuh a khawksak zaw sek hi.

³⁵Zie thil haw chuh, nang haw phatna dinga ka gen ahi a; na chung u a khapna chuh gen guo ka hi puoh a, thil dik leh hawihte na hih theihna dingun leh, LALPA na chuh sit bei keia kipie a, nasep theihna dingun ka gen zawk ahi.

³⁶Amahvang chuh, kuo’nle, a cha nungak lengkul hiela a kawih a; hih diklo a a kihet a, pasal neih sak a nawp leh, pha a sak bangin hih hen, thil a hihkhiel puoi.

³⁷Himahlele, lungthim dettak pu a, khawksalo a, amah lungthim kithunun zo a, chuleh, amah utna kithunun zo kêi a, amah lungthima hih dingte supuk zo keia a um chun, zi a neih loh chuh thilpha ahi.

³⁸Khutichun, zi nei chun thil a hih phai, himahleh, zi nei lo pa chun a hih phazaw sem hi.

³⁹Zi chuh, a pasal damsung chun kân ahi a; himahlele, a pasal a thih chun, a deih takphawt nei thei ina; amahvang chuh, LALPA a um mi a hih ding ahi.

⁴⁰Himahlele, kei ngaih in chuh, a um ngeia a um chuh phazaw’n ka hêi. Ken le Pathien Thagau nei in ka kihe ngâla.