Read Gangte 1 KORINTH 8 Bible Online

1 KORINTH 8 - Gangte bible

1 KORINTH 8

¹Tuhin, milim kawma An thillat thu a na hun ziknau thu a chun, A gen guol mah u khan, “I bawnchau in hetna I nei chiet ui,” tih chuh a dik hi. Zie tawbang hetna chun mi a uon sak sek a; himahleh, hehpihna vang chun mi a siempha sek hi.

²Kuo’n le, thil bang ahim he a a kiginchak chun, a het ding bang tak chuh a he nailo ahi.

³Amahvang chuh, kuo’nle Pathien a hehpih chun, zie pa mawng chuh amah het ahi.

⁴Chun, milimte kawma thillat nek thu achun: vannuoi ahin milim chuh bangmah ahih loh zieu leh, Pathien khat chauh a um hi tih I heu hi.

⁵Van ah ahim, lei chungah ahim, pathien min pu tamtak um u hen la; zie tawbang pathien leh lalpa kiti chuh tamtak um mahleu le,

⁶Ei u dingin vang chuh, Pathien khat mai, Pa chuh a um a, amah chuh Bangakai Siempa ahi a; amah dingin I hing u a, chun, LALPA khat mai a um a; Isu Krista chuh, thil chengcheng hi amah vanga siem a hi a, ei u le amah vangin I hing uh ahi.

⁷Himahleh, zie thudik chuh mi cheng chengin a he puou hi. Mi khenkhat chuh milim hona dinga nasa taka a na kimat tâk ziekun, tuni tieng hin le, zie tawbang chuh a nek tieng u leh, a an nek u chuh milim pathien a hi dingin a ngaihtuoh nalai uh ahi; a sie leh pha hetnau chuh a hât loh ziekin, zie an a nek u chun subuok in a kingaihtuoh sek uh ahi.

⁸Himahlele, neklechâk hin Pathien mit ei tunsak diek puoh a, ne kileuhing le I sie chuom diek puou a, ne leuhing le I pha chuom diek puou hi.

⁹Himahlele, chingthei un, khutilochun, ut ut a na tat theihnau chuh, bang em ti’n, mi hatlote dingin pukna hung hi kha’na.

¹⁰Nang, hetna nei mi, kuo’nle, milim hona ina, ankuong um a a hun muh chun, amau chuh mi hatlo na hi taleu, a sie leh pha hetnau chun milim laka kithawihna thil nek ngam lawh lo ding ahi?

¹¹Khutichun, na hetna ziek chun, mi hatlo suohpih khat, Krista’n a thih sik a thih sak pa chuh beimang ding ahi.

¹²Suohpihte chunga khutibang thila chuh na hih gitloh u chun, a sie leh pha hetnau hatlo chuh na sukliem naklai u chun; Krista chunga thilhih gilo na hiu hi.

¹³Zieziekchun, ka nek le châkin ka suohpih a sukpuk chun, ka suohpih ka sukpuk lohna dingin, kumkhuotuong in, sa himhim ne ta puo’ng ka.