Read Gangte 1 KORINTH 9 Bible Online

1 KORINTH 9 - Gangte bible

1 KORINTH 9

¹Zalen hilo ka hi? Sawlchak hilo ka hi? I Lalpau Isu mu hi talo ka hi? Nang haw lawi chuh LALPA a ka nasep gah hilo na hiu hi?

²Mi dangin sawlchak in ei ngai kimahleu, nang haw bêkin nei ngaih dinguh ahi; LALPA dinga sawlchak ka hihna mawhuol chuh, nangmau haw hi na hi ngâl u a.

³Ei suohsalh te ka dawnna chuh ziehi ahi:

⁴Ka nasep zieka nek le châk pieka um hilo ka hi?

⁵Sawlchak dangte leh LALPA a suohpihte leh, Kiphas guol khan, zi, pui viel dingin thu neilo ka hi?

⁶A hihloh leh, Barnabas leh kei mai hi, nek kithalawh a nasem ding ka hiu hi?

⁷Sepaih kuo a, amah kivak a gâl kap sek? Kuo a, a gah ne sam lo a grep huon bawl sek? A hihloh leh, kuo a gan guol vak ngâla a nawitui nelo?

⁸Zie thu haw chuh mihiem thuneihna apat a ka gen ahi leh? Dan thu’n le zie thu ngêi chuh a gen sam hilo maw?

⁹Mosi Dan Lehkhabu achun, “Bâwngchal in buh a chil pet chun a mûk kân ki’n,” tih zik ahi ngâl a. Pathien in bâwngchal a ding mai ahim, a ngaihtuoh sak?

¹⁰Eimau haw a ding gen hilo maw? Hi e; eihaw dingin ahi a zik u chuh. Lokaipa chun kinepna nei a kaih ding ahi a, buh khenpa chun le, chan neih kinema khet ding ahi.

¹¹Kei un, thagau lam thilte chuh na kawm u a ka tuh u a. Nang haw apat a leisiet thila phatchuomna ka muh u chuh a taluo ahi dinga ahim?

¹²Mi dangte’n bawn zie tawbang thil chuh nangmau apat a a kinep u chun, kei un nei zawsem lo ding ka hiu hi? Himahlele, zie thuneihna chuh ka mang puou hi. Krista Chanchin Pha chuh dala a um lohna dingin, thil bang cheng ka thuok hâm hâm sek zawu hi.

¹³Pathien Ho-In a tawiviel te chun Pathien Ho-In apat nek ding a muu a, maichâm a kithawihna lânte chun, kithawihna sa lak apat nek ding chan a nei ui tih helo na hiu hi?

¹⁴Zie tawbang mah chun, LALPA’n Chanchin Pha gente chuh, Chanchin Pha gen chuh a nek muhna ding u a a guonggalh sak ahi.

¹⁵Himahlele, kei vangin, ziehaw chuh khat chale ka mat loh ahi; ka chunga khutibang chuh na hihna dingun le, zie thu haw hi ka hun zik ahi diek puoi. Kuo’n le, ka kisuonna ding dawl diktak hi, bangmahloa a chansak sang un, thi mai leng kei dingin a pha zawi.

¹⁶Chanchin Pha gen mahleng le, suon ding himhim ka nei puoi, hihmâkmawh ding ka chunga kinga ahi ngâl a. Chanchin Pha gen kileng lah, ka chung gik ding ahi ngâl a.

¹⁷Zie chuh keimah ut thu a ka hih chun, kipahman ka nei a; himahlele, mawhpuo banga ka sep ahi, Pathien in ka sep dinga ei piek a hih ziekin.

¹⁸Khutichuh a hih leh, ka muh ding bang ahi ta die leh? Man beia Chanchin Pha genna dinga hun pha; Chanchin Pha gen zieka ka muh ding kilawm mawng chuh ngek lo a ka umna hi ahi.

¹⁹Kuomah suok hi kimahlengle, mi tamzaw sem ka lâklut theihna dingin, mi chengcheng suok in ka kisiem sek hi.

²⁰Tichun, Judate ka lâklut theihna dingin, Judate kawmah Juda mi bangin ka um sek a, Dan nuoia umte kawmah Dan nuoia um bangin ka um sek.

²¹Khutibang mah chun, Jentel te laka na ka sep tieng leh, Jentel te ka lâklut theihna dingin, Judate Dan pawlama um bangin Jentel te umdan dân in ka um sek hi. Zie chuh, Pathien dân ka zawp lohna a hi puoh a, Krista dân nuoia um ka hi zaw bawn hi.

²²Zawngkhalte ka lâklut theihna dingin, zawngkhalte kawmah zawngkhal bangin ka um sek hi. Bang ahim ti a mite ka hukdam theihna dingin, mi chengcheng kawmah, bang cheng ka hi tai.

²³Ziehaw chengcheng chuh, kei le vangsakna ka chan theihna dingin, Chanchin Pha ziekin ka hih sek ahi.

²⁴Kitaihsiekte chuh a bawn un a tai u a, himahlele, khat mai in kipahman a mu sek tih helo na hiu hi? Na muh theihna dingun khutibang tak chun tai un.

²⁵Guolsiek bawlna haw achun a bawl hâm hâm ta chuh bangakai ah a kidêk sek ui; amau haw chun lallukhuk sie thei mu dingin a bawl u a; ei uh vang chun Lallukhuk sie theilo mu ding I hi ngâl u a.

²⁶Khutichun, bidawih nei in ka taisek hi,

²⁷Ka sapum ka thunun theihna dingin ka kilumziela, suok in ka siem sek; khutilochun, mi dangte kawma chanchin pha ka tângsappih nung in, keimah ngêi le ting lo na hi kha’ng ka.