Read Gangte 2 KORINTH 10 Bible Online

2 KORINTH 10 - Gangte bible

2 KORINTH 10

¹Kei Paul, na kawm u a um chenga nunnem tak leh zaidam taka um a; na kawm u a ka um loh tienga, nanguh a ding a hahkat taka pang sek pa hin, na kawm u ah ka hun ngên hi.

²A hung phat leh khauh taka ei bawl lo dingin ka hun nget na hiu hi, khawvel deih dana nasem na hiu hi, ei tite chuh khauh tak in ka bawl sek ngâl a.

³Khawvela cheng hi leuhing le, khawvel deih dana galdo I hi puou hi tih I he ngâl u a.

⁴Kidona a gâlvan ka mat sekteu hi, zie khawvel gâlvante hi ahi puoh a, himahleh, kulhpi dettak sukchimna dinga Pathien gâlvan thil bawlthei tak chuh ahi zawi. Zie chun, kinielna diklote ka susie sek uh a;

⁵Pathien hetna kalh lam a dodalna hung pawt taphawtte chuh ka hihchim sek uh a; ngaihtuohna tincheng chuh Krista thu awihna lam ah ka pui sek uh a.

⁶Khutichun, na thu-awihnau a bukim tieng leh chuh, thu awihlohna cheng chengte gawt dingin ka kisazo sek ui.

⁷A pawlama lang thilte mai chuh ahi, na et sek uh hi. Mi, amah mawng chuh Krista a ka hi ti a kingaihtuoh a um u? A phai, amah kingaihtuoh kit he’n; amah a hih guol mah chun, keihaw le Krista a ka hi ngâl u a.

⁸Ka thuneihnau, nangmau haw phietthâkna ding hilo a, siemphatna ding zawa, LALPA’n thuneihna ei piek hi, suong nasa zawsem leuhing le, zakcha ding ka hi puoh ngâl a.

⁹Ka lehkhathâk hin, nangmau haw hun suklauh guo banga ka lat ding ka nuom puoh ngâl a.

¹⁰Na lak uh a khenkhat in, “Paul lehkhathâk hi ana taluo’n, a khauh ten a, himahleh, I lak uh a a sapum a a um phat le la, a zawngkhal ten ngâl in; a thugen hile bangmah ahi puoi!” ti ding na hiu hi.

¹¹Khutibang mi chun, zie hi he hen, na kawm u a ka hung masang a, ka lehkhathawn a ka hun gen bang tak khan, ka hung tieng leh hih ding ka hi.

¹²Khutibang mi, amah leh amah kigenphate lak achun ka kisim tel ngam puou a, amau haw taw le ka kitehkal ngam diek puou hi: Mi ngawl ahi na mai zên u e! Zie tawbang mite chuh amau haw hindan a amau leh amau kitehkal in, amau haw phakna tieng chuh, thutanna dingin a mang ngâl u a!

¹³Kei uh vang chuh, ka hihna khel u chun uong puo’ng ka ting uh; Pathien in ka nasepna dinguh a ei piek gamgi, nang haw tieng ale hun huoppha, zie sung maia chun um zing ing kau.

¹⁴Zie gamgi sunga chuh nangmau haw le um na hih ziekun, Krista thu, Chanchin Pha gena ka hung tieng u leh amau haw chuh khawhkhel puo’ng kau.

¹⁵Ka sepna khel u a, mi dang nasepte chuh ka kisuonpih puou a, khutih malak in, Pathien in ei piekna sunga, na taksannau chuh a hung pun zawkna dingin, nasa zaw sema na lak uh a sep ka kinep zawk uh ahi.

¹⁶Zie zawh tak chuleh, nang haw umna khel lama gamdang ale Chanchin Pha chuh gen thei ka ting un, tichun, mi dangte na sepna chuh ka kisuonpih nuom puoh ngâla.

¹⁷Himahlele, Pathien Lehkhabu chun, “Kuole, kisuong taphawt chun, LALPA nasep chuh kisuonpih zaw hen,” a ti ngâl a.

¹⁸Eimah kigenphat chun pahchak a lawh puoh a; LALPA’n mi a gen phat chun, pahchak a lawh sek zaw ngâl a.