Read Gangte 2 KORINTH 11 Bible Online

2 KORINTH 11 - Gangte bible

2 KORINTH 11

¹Neukhat a na ngawl ka hih tâk lele, nei na ngaithiem leu chin ka nuom hi! Ahi, ngaih le nei na ngaithiem sam ui.

²Pathien thikna’n a puo, nanguh ka hun thik hi; nungak thiengtho; pasal khat maia dinga huol guolin, Krista dinga ka hun huol na hiu hi.

³Himahlele, gul in a chit gukhahna a Evi a thep guol khan, na lungthim ngaihtuohna teu chuh, bang-em ti’n, Krista kawma bukim tak leh thiengtho taka na kipiekna teu chuh suksiet in um kha’na tih ka lau hi.

⁴Chun, mi dang kuole, na kawm u a hung a, ka gen khâk loh uh, Isu dang a hung gen u a, kipâk takin na thuok uh a; chuleh. thagau leh Chanchin pha, keimau apat na muh uh hilo hielte, thagau leh Chanchin Pha a hung gen uh na na pawm zel ngâl uh a!

⁵Zie tawbang, “Sawlchak lien” na tihteu chuh, bang lam hileh, neuchah le phaklah ka kigingcha dang e!

⁶Thugen lama chun, pau mang thiem kimahleng. hetna lam achun khuti chuh ka hi kit puoi; ziehi, hun tin leh, bang chenga le, nang haw kawmah ka hun genchien zing sek ahi kha.

⁷Pathien Chanchin Pha na kawm u a ka gen phat leh, bangmah ka ngek sek puoh a; nang haw chawihsâna na um theihna dingun, keimah ka kingainiem zaw sek ahi kha. Aleh, zie chun thil ka hih diklo ahim leh?

⁸Na lak uh a ka sep lai khan, sapchuom dangte’n lawh ei pie sek uh a. Nang haw ka hun panpih theihna dingin, amau haw chuh ka gûk sak ahi, tih theih ahi.

⁹Chun, na kawm u a ka um lai khan, kuomah ka sugiksak puoh a; Makedonia gam apat a suohpih hungte khan, ka sum sinmawh cheng chuh ei hun puok sak zawu ahi kha. Hun chiehsa mah bang khan, hun hungtung dinga le um ka nawp ahi: Nang haw a dinga puokgik ka hih lohna dingin!

¹⁰Krista thutak, keimah a a um bang hin, Akaia gam, khawitaka le, zie ka kisuonna hi sukdaih in um puo’n a, ti’n ka tiem ngam ahi.

¹¹Ziehi, nang haw ka hun lungsiet loh zieka ka gen ahim? Ka hun lungsiet hi tih Pathien in a he ngâl a!

¹²Tu a ka thilhih bang hi. hih zawm zel ding ka hi: ti a chuh, “sawlchak ka hi” ti, mi dangte chun, kisuonna ding leh, a nasep bang u hi sem ka hi, ti a gen ding a neih lohna dingun.

¹³Khutibang mite chuh, sawlchak tak tak ahi puou a, lepchieh thu a a nasepteu gen a, Krista sawlchak diktak hite guola. amau kisiemkawmte ahi zawu hi.

¹⁴Ahi him hi, a mak lo ahi! Setan ngêi le, vânsâwlchâk tawbang in a kisiem sek ngâl a!

¹⁵Khutichun, a suokte chule, diktatna vak bangin kisiem lamdang mahleu le, thilmak ahi puoi. A tâwp leh, a thilhih bangmah u chuh mu ding ahi ngâl u a.

¹⁶Gen kit ing ka: kuoma’n, a ngawlin ei ngaihtuoh kiu he’n. Himahlele, a ngawl a nei ngaih ngâl u leh, neukhat bêk kisuonpih ding ka neih theihna dingin, a ngawl bangin nei sa’ng un.

¹⁷A hin la, tu a ka thugen hi, LALPA’n gen dinga ei deihsak vang ahi puoi; zie kisuonna thu ahin, mi ngawl bang takin ka gen zaw ahi.

¹⁸Himahleh, mi tamtakin, mihiem lama suon ding tamtak a neih ziek u hin, zie mah chuh ken le ka hih ding ahi.

¹⁹Nang haw mah hile na ching ten nau a, mingawlte na ngai thei ten kit uh ahi!

²⁰Mi’n suok in hun nei leu le, hun ne zo hiel leu le. salin hun man leu le; amau kilimbawl leu le, na ngeichang uh bêng leu le, na dawh sek ngâl u a.

²¹Khutibang thil hihna lam achun, I dawilawk taluou hi ti a gen chuh ka zakcha ngâl a! Himahlele, mi’n. thil bang ahim lama a kisuon chun ngawlhuoi takin hun gen leng: ken le ka ngam tho hi.

²²Hebrai mi ahiu maw? Kei le ka hi. Abraham suonte ahiu maw? Kei le ka hi.

²³Krista suokte ahiu maw? Mingawl guolin vak gen ta leng, Kei le ka hi zawsem hi! Gimna nasa zawsem in; tam zawsem suongkul a lut in, tamtak vei zêpna thuokin, thih vang hiel na le tam zawsem tuok in.

²⁴Judate khuta zêpna, sawmli titna ding khata vat ngavei ka tuok a:

²⁵Rome mite khuta thumvei zêpin ka um a: khatvei suong a sehna tawh. Kuong sietna thumvei ka tuok a, zan khat leh ni khat tuisuohgiet ah ka um hi.

²⁶Khuolzinna a, tui kinawk lak apat leh, suommangte apat, tamtak vei lauh-umna ka tuok a; ka chipihte lak apat lauh-um na leh, Jentel te lak apat lauh-umnate, khawpi sung leh gamthip a lauh-umnate, tuipi chunga lauh-umna leh, suohpih lêmte apat lauh-umna te.

²⁷Nasep gim leh chawlna leh, ihmut mawhna te ale; gilkiel leh dangchâk na te ale; nek ding tâksapna munte, vel tamtak umna ding leh silhlechen beia umna banga le.

²⁸Thil dang gen takloh inle, sapchuom cheng chengte ka ngaihtuohna ziekin, ni chenga puokgik tak ei delh zing hile a um nawn a.

²⁹Kuo ahim khat a hung zawnkhal tieng leh. ken le ka zawnpih a, kuo ahim khat gitlohna a a hung puk tieng leh, lungkhamna’n ka dim zel sek ahi.

³⁰Suong ding ka hih ngâl chun, ka zawnkhalna lam thil haw hi suong zaw ding ka hi.

³¹LALPA Isu Pathien leh Pa, min chuh kumkhuo’n pahchak in um hen! amah chun lepchieh ka gen puoi, tih a he ngâl a.

³²Damaska khuo a ka um lai khan. leng Aretas nuoia gam vaipawpa chun, ei man dingin khawpi kawtkhak achun mi a ven sak a.

³³Himahleh, bang vang kal a chun, bawm in ei khaithau a: tichun, a khut apat ka kigelhmang ta a.