Read Gangte 2 KORINTH 12 Bible Online

2 KORINTH 12 - Gangte bible

2 KORINTH 12

¹Phatna bangmah um kilele, ka suon himhim ding ahi. Tuhin, LALPA’n ka kawma kilâkna thilmuh leh. kilâkna ei piek thu chuh gen ing ka.

²Krista a mi khat ka hêi, zie chuh kum sawm leh kum li ahi ta a; (Zie chuh sapum nei in ahim a um, sapum bei a a um ka he diek puoi, Pathien in a hêi).

³Gen kit ing ka, zie pa chuh Paradise a lâktoh in a um hi tih ka hêi

⁴(zie chuh a tak taka um ahim, a hihloh leh vaulam thil mai ahim-ka he kit ta puoi, Pathien in a hêi), chun, thu a gen theih loh leh, mihiem gen ngei loh haw chuh a zâi tih ka hêi.

⁵Mi, khutibang chanchin mai chuh kisuonpih ing ka ting; himahlele, ka zawnkhalna lo chuh, keimah kisuong puo’ng ka.

⁶Kisuong nuom leng chuh, mingawl hi puo’ng ka; thudik gen ding ka hi ngâl a. Himahlele, kisuong puo’ng ka, khutilochun, mi’n, keia a muh uh ka thilhih leh ka gen a zak sang u a lopi zawn ei ngai kha’n au.

⁷Chun, thilmak ka muh haw zieka chuh, ka kisuon takluot lohna ding leh zie chuh Setan sawlchak in matchâk a ei mat a, ka chapo loh na dingin ka taksa ahin ling ei kipie ahi.

⁸Zie chungchâng thu achun, lâkmang a hih theihna dingin, LALPA kawmah thum vei ka ngên ta a.

⁹Himahlele, amah chun ka kawmah, “Ka lungsietna hi nang dingin a buting ahi, ka thilhih theihna hi na zawnkhalna ahin a puo sukbukim a a um sek,” a ti a. Khutichun, Krista thilhih theihna chuh ka chunga a um theihna’n, kipâk mah mah kawmin ka zawnkhalna haw hi suong zaw tang ka.

¹⁰Zieziekchun, Krista vangin, zawnkhalna banga le, sukmuolpho a umna banga le, tâksapna bang ale, sukgimtheihna banga le, haksatna haw ale kipâk tak in ka um sek hi. Ka zawnkhal cheng leh ahi, ka hât zawk sek hi.

¹¹A ngawl guolin thil ka hih ahi tai, himahleh, nang haw’n ngawl lo thei lo in nei siem uh ahi. Nang haw hi, ka hihna tak phawchien dingte na hi ngâl u a. Kei bangmah hilo mahleng le, sawlchak lien na tihteu chuh ka phaklahna a um diek puoh ngâla.

¹²Sawlchak ka hihna melchikna haw chuh, thuokhatna tincheng nei in, melchikna haw, thilmak haw leh thilhih theihna haw mang in, hih ahi ta kha.

¹³Bang lam ah ahi leh, sapchuom dangte sanga na niem zawk diek nau, nanguh ka hun sukgiksak lohna thu kha a hihloh ngâl leh? Zie thu a ka sukkhelhna chuh ei ngaidam un.

¹⁴Ngaitiem u, tuhi na kawm u a hung dinga, ka kisakzawhna, a thumveina ahi tai; nang haw apat in bangmah ngek puo’ng ka. Ka deihpen chuh nang haw na hiu a, na thil neih uh ahi puoi. Bang hita leh, chate’n nu leh pa ding a khawlkhawm sak dinguh ahi puoh a, nu leh pate’n, chate dinga, a khawlkhawm sak dinguh ahi zawi.

¹⁵Nang haw hun panpihna dinga, ka neih chengcheng leh, keimah ngêi le kimat zawh kêi chuh, ka kipahlam tak ahi ngâla. Ken, nanguh ka hun lungsiet bêk ziek hin, nang haw’n nei lungsiet zo lo deuh na hiu maw?

¹⁶Nang haw a dinga puokgik ka hihloh dân chuh, nang haw’n le hi satei unlau. Himahleh, mi khenkhat in, dawha thuk leh, lepchieh a hun bawl kha ei sa’nau.

¹⁷Bangti’n e? Na kawm u a ka hun sawlte, lemchâng a mang in, thil ka hih ngeia ahim?

¹⁸Tita chuh chieh dingin ka ngên a, chun, suohpih dangte khat tawh ka sawl khawm ahi. Tita chun, nang haw apat in lemlawh nei in na gen uh ahim? Amah leh kei chuh, lungthima thiltup kibang leh, tawih dân kibang taka um hilo ka hiu hi?

¹⁹Tu sung cheng hin, nangmau haw kawma, keimau kithien-hawnna thu gena nei ngaih uh ka hih tuok u a. Kei hiel puou hi! Krista achun, Pathien maikawk a thugen ka hiu hi. Zieziekchun, deihtakte haw, thil ka hih takphawt u hi, nangmau-haw phatna ding ngên ahi zawi.

²⁰Ka hung tienga, bang em ti a ka deih banga nanguh ka hun muh loh a, kei le, na deih bang u a nei muh loh u a; bang em ti a kigaihna bang, kimitthipna bang, lungnatna bang, kilangsehna bang, kigensietna bang, kihoguk nuomte bang, kiletsak takluotna bang, buoina bang hung um kha’na tih leh;

²¹Na kawm u a ka hungkit phat leh, ka Pathien in, na laku a, ei hih muolpho in, tuma sanga thil hihkhielte laka thil buok, kideihchak leh hûkna te leh kipawlna thanghuoi taka gilo a kisiklote ziek chun, kap gêt kha’ng ka tih ka lau hi.