Read Gangte 2 KORINTH 13 Bible Online

2 KORINTH 13 - Gangte bible

2 KORINTH 13

¹Nang haw kawma ka hungna ding, tuhi a thum veina ahi tai. Pathien Lehkhathu’n, “Mawhchansakna thu taphawt chuh, hetpih nih ahim, thum ahim bêkin a hetpih tei ding ahi,” ti a a gen guol in.

²Na lak uh a tuma sanga na gilote leh, mi dangte kawmah ka hun gen nuom ahi; ziehi, na kawm u a ka hung, a nih veina khan ka gen ta a; hilele, tu a na kawm u a ka um loh lai hin le hun gen kit ing ka: ka hungkit tak le chuh, kuomah cha, gawtna apat suokcha lo ding ahi.

³Krista mawng chun, kei ei mang in thu a gen hi tih, phawtchien na nawp tak phawt u chuh, hechien un lau. A hun ngaihtuoh phat chuleh, zawngkhal hiel puo’n tin; na laku ah, a thilhih theihna etsak zaw’na.

⁴Amah chuh zawnkhalna ziekin, kross chungah khetdên in um mahleh, Pathien thilhih theihna ziekin a hing kit ta ngâla. Amah tawh pumkhata um in, kei u le ka hât puou a; himahleh, nang haw tawh kalthu achun Pathien thilhih theihna zieka, a hinna kikawppih dingte I hi ngâl u a.

⁵Taksanna achun na um nau em, nangmau mawng kikhuol sek unla, nangmau mawng kiphawchien sek un. Krista Isu chuh nangmau ah a um hi tih hechien lo na hiu em? Deihlo na hih loh ngâl u chun,

⁶keihaw vang chuh, lawhsam in ka um puou hi tih, hun he’n lau, tih ka gingchai.

⁷Chun, thil himhim na hih gitloh lohna dingun Pathien kawmah ka ngên sek uh a; zie chuh, kei uh ka lawhting ui tih suklatna ding hilo in, keihaw lawhsam bangin um mahleng un le, nang haw’n thil dik na hih theihna dingun ka tih zawk uh ahi.

⁸Thutak dodal dingin, thu dik lo bangmah ka hih thei puou hi.

⁹Kei uh ka zawnkhal lai uh ale nanguh na hât u chun ka kipâk sek uh a puo. chun, na hung phatbukimna ding u le ka ngên sek ui.

¹⁰Zieziekchun, suksietna ding hilo a, siemphatna ding zawk a LALPA’n ei piek thuneihna dungzui a nanguh ka hun vau lohna dingin na kawm u a ka um loh peta zie thu hi ka hun zik ahi.

¹¹A tawpna dingin, suohpihte, chibai! ka hun ngetna hi ngaithau unla; Pha bukim in um guou in, kituok takin um unla; thamuong takin um un. Hehpihna leh, chamna Pathien chuh na kawm u a um ding ahi.

¹²Suohpih kilungsiet na a kichawp thiengtho in khat leh khat kichibai un.

¹³Mithiengthote chengcheng hin a hun chibai ui.

¹⁴LALPA Isu Krista lungsietna te, Pathien hehpihna te leh, Thagau Thiengtho kivawppihna te chuh na bawn uh a chungah um hen. Amen.