Read Gangte 2 KORINTH 2 Bible Online

2 KORINTH 2 - Gangte bible

2 KORINTH 2

¹Himahlele, keimah tumin vang ziehi ka na tup chakkêi ahi, lungkham kawmin chuh na kawm u ah hungkit ta puo’ng ka.

²Ken, nanguh ka hun suklungkham chun, kuo a, ei sukipak ding leh? Ka suklungkhampa mah kha hi ding ahi ngâl a.

³Zieziek tak chun ahi, zie lehkha hi ka hun zik na kawmuh a ka hung a, ei sukipak dingte apat a chuh, suklungkham a um ka nawp loh ziekin. Kei kipahna chuh, nang haw kipahna le ahi tih ka hun ginchak hawn na hi ngâl u a.

⁴Mitthi tamtak luong kawmin. lungkham dahum leh, thawmhau mah mah kawma ziehi ka hun zik ahi; zie chuh, suklungkham a na umna dinguh hilo in, na chunguh a hehpihna nasa zawsem ka neih hi, na het theih zawkna dingun ahi.

⁵Chun kuo’nle, mi a suklungkham chun, kei mai chunga hih ahi puoh a, na bawn u a chunga hih ahi zawi. (Zie chuh, a hih takluot lohna dingin ka gen ahi).

⁶Khutibang mi chuh, na lak uh a mi huntieng in a gawt chuh a hun hi.

⁷Khutichun, gawt kit tâk sangin, na ngaihdam u a, na lungmuon zawk ding uh ahi; khutilochun, bang em ti’n, mi khutibang chuh, a lungkham takluotna’n valh zo kha’na.

⁸Zielang tak chun, amah chunga na lungsietnau chuh sudet dingin ka hun nget na hiu hi.

⁹Zieziek hin le ka hun zik ahi; patepnate a chuh na din zawh u leh, bangakaia thu na zawp u leh, na zawp loh uh ka phawtchien theihna dingin.

¹⁰Bang lam hita leh, mi na ngaihdam u chuh, ken le ka ngaidam sek hi. Chun, ka ngaihdam tak tak chun, nangmau haw ziekin, Krista achun, bang hita leh, ka ngaihdam ahi tai.

¹¹Khutilochun, Setan in I chungu ah a khut hun lek ding ahi, a thil ngaihtuoh haw chuh I haih puoh ngâl u a.

¹²Chun, Troas khuo ka tun phat chun, zie taka Chanchin Pha genna ding chun, LALPA’n kawt ei hawn sak hi’n ka mu ngêi a.

¹³Himahleh, ka suohpih Tita ka muh loh ziekin, ka lungthim chuh nasatak in a lungkham a. Khutichun, zie a mipite chuh kampha’n ka tha a, ka pawt a, Makedonia gam ah ka chieh ta a.

¹⁴Himahlele, Krista gâl zawhna a ei uh ei pui zing pa leh, eimau haw manga. mun tina amah hetna gimlim hetsakpa Pathien kawm achun kipahthu um hen.

¹⁵Hukdam a um laite ding chun, Pathien kawma Krista gimlim lat tawbang I hiu a, mangthai a um te ding chun, thihna gu gim I na hiu a.

¹⁶Beimang dingte chun, thihna gu gim I na hiu a, hukdam dingte chun, hinna gimnam I hiu hi. Zie tawbang hi ding chun kuo a ting zo ding?

¹⁷Mi tamtakin Pathien thu hi dawha bawl a, sumkawlveina guola a mat sek guol un, ei uh vangin I mang puou a; mi thutak, Pathien sawl bangin, Pathien mit muh achun, Krista suok bangin thu I gen zaw sek uh ahi.