Read Gangte 2 KORINTH 4 Bible Online

2 KORINTH 4 - Gangte bible

2 KORINTH 4

¹Pathien in a hehpihna zieka zie na hi ka sep dinguh a ei piek ahi a, zieziekchun, ka lungkie puou hi.

²Thuguk leh thil zahchâk um te chuh kawih mang in, lepchieh takin na ka sem puou a; Pathien thu le milemna’n ka mang diek puou hi. Thudik hetsak in, Pathien mitmuh in, mi tin sie leh pha hetna mit tunga um ka guo zaw sek uh ahi.

³Himahlele, Chanchin Pha ka gen sek uh hi, khuha a um chun, beimang dingte achun ahi, khuha a um sek.

⁴Zie khawvel pathien hin a lungthim teu a sukdûk ziekin, a gingcha puou hi. Krista lopina, Pathien batpih ngêi, Chanchin Pha eng chun amau haw a salh theih lohna dingin a siem sek hi.

⁵Ka thugen u hi keimau chanchin ahi puoh a, Krista Isu chuh LALPA ahi tih ka gen zaw sek uh a, chun, keimau ngêi hile, Isu vangin na sawntawlawi uh ka hiu tih ka gen zawk sek uh ahi.

⁶Krista mel a Pathien lopina eng chuh ei hetsak dingin, “Thim apat eng vak dawk ina,” tipa Pathien chun ka lunggil uh ei salh vak sak ta ngâl a.

⁷Himahlele, zie thilhih theihna lopitak chuh, kei uh a um hilo in, Pathien a um ahi zawi tih suklatna dingin; zie thagau lam go chuh, kei uh leibel tawbang mai hin ka vawp zawk uh ahi.

⁸Ning tin apat nehchintuoh in ka um u a, himahleh, sukgawp in ka um puou hi; lungdawng in ka um u a, hilele, ka lung uh ka khie diek puou hi;

⁹sukgimtheih in ka um u a, hilele, taihsan in ka um puou hi; khetpaih in ka um u a, hilele, sukmangthai in ka um puou hi.

¹⁰Hun tinin, ka sapum uh thithei ahin Isu thihna chuh ka puo zing uh a; ka taksau ahi Isu hinna chuh muh a a um theihna dingin.

¹¹Ka hin sung cheng u hin, Isu zieka thi dingin, lauhthawng-um takin ka ding zing uh a, Isu hinna le, ka sapum uh thithei ahi a kilat theihna dingin.

¹²Khutichun, keimau ahin thihna’n a sem sek a, nangmau a chun hinna’n a sem sek ahi.

¹³Pathien Lehkhathu’n, “Ka gingcha a, zieziekchun ka gen ahi,” a tih khah. Zie taksanna lungthim mawng chuh pu’n, kei u’nle ka gingchau a, thu ka gen sek uh ahi.

¹⁴LALPA Isu, hinna a kaithopa Pathien chun, eihaw le Isu tawh ei kaitho intin, nang haw tawh a umna a chuh ei puikhawm ding ahi, tih ka he ngâl u a.

¹⁵Zie thil bang cheng hi nangmau haw phatna ding ahi a, chun, Pathien hehpihna chuh mi tam zawsem chunga sukpuna a um guol zelin, Pathien lopina dingin, kipahthu nasa zawsem in gen un au.

¹⁶Zieziek tak hin ka lungkie puou hi. Ka phehlevo sapum u hi sie tiltil mahleh, ka thagau lam hinnau vang, ni chengin siemthak in a um zel ahi.

¹⁷Chun, zie buoina neucha, mitphetlohkal a beimang ding ka thawk u hin, zie buoina sanga leh tamtak a nasa leh, kumsawt a lopina mun achun ei tun ding ahi ngâl a.

¹⁸Khutichun, muh theih te hi en lo in, thil muh theih loh haw chuh ka en zaw sek uh ahi. Thil muh theih haw hi chawmkhat sung ding ahi a, thil muh theih loh haw vang chuh kumsawt a ding ahi ngâl a.