Read Gangte 2 KORINTH 5 Bible Online

2 KORINTH 5 - Gangte bible

2 KORINTH 5

¹I umnau lei In hi kiphie mahlele, van ah in, khuta sak loh, kumsawt a um ding, Pathien kawm apat in det chuh I nei ui tih I he ngâl u a.

²Van apat a I chênna dinguh ina chuh, a thuoh a kivan ding utcha tun tun in, I thum I tau sek nau a;

³khutibanga a thuoh a kivan tieng chuleh, sangawn in um ta puoi tiu.

⁴Ei uh, zie phehlevo sapum ina I um sung u hin I khuoisa nau a, puon silh lo a um I nawp ziekuh ahi puoh a; puon kisilh thuoh a um I nawp ziekuh ahi zawi, zie thithei hi, hinna valh zawh a a um theihna dingin.

⁵Chun, khutia sukdanglam a um dinga ei guonggalhpa chuh Pathien ahi a; amah chun, eihaw dinga ei kawihkhawl sak ahi tih melchikna dingin, a Thagau chuh ei pie ahi ngâl a.

⁶Khutichun, hangsan takin ka um zing sek uh ahi. Zie phehlevo sapum in a I um sung cheng u chuh, LALPA In apat gamla taka um I hiu hi tih I he ngâl u a.

⁷Muh theih a chieh hilo in, taksanna a chieh I hi ngâl u a.

⁸Hangsan takin I um uh a, chun, zie phehlevo sapum in hi taihsan a, LALPA tawh ina um chuh I nuom zaw ngâl u a.

⁹Zieziekchun, zie I In uh ahin um in, um kileng, amah kipahlam a um guo hâm I hi sek ui.

¹⁰Mitin in, sapum a thil bawlte, a sie a pha, I bawl bang uh a, I muh chiet theihna dingun; Krista vaihawmna chutphah masanga kilak chiet ding I hi ngâl u a.

¹¹Khutichun, LALPA lauhna zie he’n, mi dangte chuh ka zawl sek uh ahi. Pathien in ei he suok vek a, nang haw’n le, na lungthim tak uh a nei hetuh ka kinem hi.

¹²Na kawm u a kigenphat kit guo ka hi puou a, lunggil phalam hilo a, kam sung maia kisuongte chuh dâwn khân na het theihna dingun, keihaw nei kisuonpih theihna dinguh phatak hun piek ka guo zawu ahi.

¹³Ka ngawl u leh Pathien vangin ahi a, ka chit u leh, nangmau a ding ahi ngâl a.

¹⁴Krista hehpihna chun ka chamlo a ei sawl ahi; hiti hin ka heu hi: Mi chengcheng thih sik in mi khat a thi a, ziezieka chuh mi chengcheng thi ahiu hi.

¹⁵A hingte chuh amau dinga a hin tâk loh uh a; a thih sik uh a thi pa leh thokitpa dinga chuh a hin tâk zawkna dingun, mi chengcheng thih sika thi ahi zawi.

¹⁶Zieziekchun, tu a thak hin, kei un vang, mihiemte etdan guolin kuomah vaihawm ta puo’ng kau. Mihiemte etdan guolin, Krista chuh na vaihawm sak ta mahleu hing le, tuhin chuh ka hih ta puou.

¹⁷Zieziekchun, kuole. Krista a um chuh, a kisiemthak a hung hi ta a, thil lui chengcheng chuh a mang ta a, ngaitiem u; a hung thak kit tai!

¹⁸Ziehaw chengcheng chuh Pathien thilhih ahi a, amah chun, melma hihna apat in. Krista zalin amah tawh kicham in ei siem a; mi dangte le amah tawh kichama siemna dinga, zenvielna nasep chuh ei pie tai.

¹⁹Khati a, Pathien in, Krista-ah chun mihing chengcheng hi amah tawh kicham in a siem a, a sukkhelhna hawu chuh, sukkhelhna a san sak lo in, kichamna thu ei piek zawk uh ahi.

²⁰Khutichun, Krista sika palai ka hiu a, Pathien in keimauhaw ei mang in a hun nget na hiu hi tih theih ahi. “Pathien tawh na kicham un,” ti a Krista sika ka hun nget na hiu hi.

²¹Amah a chuh, mi diktat I hung hih theihna dingun, gitloh himhim helo hiel pa chuh, Pathien in eimau haw ziekin, gilo in a siem ta ngâl a.