Read Gangte 2 KORINTH 6 Bible Online

2 KORINTH 6 - Gangte bible

2 KORINTH 6

¹Chun, kei u hi Pathien naseppihte ka hiu a, chun, nang u chun, Pathien hehpihna chuh bangmahlo a na kawih mai lohna dingun ka hun nget na hiu hi.

²“Hun kipah-um ah ka hun hungaih a, Hukdamna ni ah ka hun panpih hi,” a ti ngâl a. Ngaitiem u, tuhi pawm hun chuh ahi a; ngaitiem u, tuhi hukdamna ni chuh ahi.

³Zie zenviela ka pannau ahin, kuoma’n diklo taka ka hih uh a muh lohna dingun, kuomah kipalpaihna ding hih ka guo puoh ngâl u a.

⁴Buoina nasatak thuokna bang ale, thawkhatna bang ale, dahumna bang ale, taksapna bang ale, Pathien zenviel te ka hihnau sulang zaw’n, bangakai ah mi mittung a um ka guo zaw sek ui.

⁵Zep in ka um u a, suongkul a lutna leh thubuoi na le; na hah sep a sem in, ipmu lo leh an nelo khawp in ka um sek uh ahi.

⁶Keimau mawng in Pathien zenviel te ka hihnau chuh, thienthona te, hetna te, thawkhatna te leh nunnemna te chun ka sulang sek ui. Thagau thiengtho leh lungsietna diktak leh,

⁷thudik ka genteu leh Pathien thilhih theihna ngêi in tawh. Ka dona ding u leh, keimauhaw kivenna dingin diktatna gâlvan chuh ka mang ui.

⁸Limbawl leh sukmuolpho in ka um u a; gaih leh pahchakna ka tuok zel sek ui. Lepchieh a ngawh in ka um u a: thu diktak gen zing ngâl in;

⁹Hetkhaklohte banga bawl in ka um u a, mi cheng cheng het hi ngâl in; a thisa banga ngaih ka hiu a, himahleh. na muh guol u hin, ka hing zel uh ahi. Gawt in um mahleu hing, suklup in ka um puou hi;

¹⁰Suklungkham in ka um u a, kipâk zing ngâl in; chagah taka kilang ngâl in, mi tamtak neihzawh sak ngâl in; bangmah neilo bang in, thil cheng cheng ka nei ngâl u a.

¹¹Aw Korinth mite haw! na kawm u ah kichien takin ka hun gen uh ahi; nang haw lam ah ka lungthim uh ka hawng lien ui.

¹²Nang haw lama ka lunggilteu khâk chuh, kei uh ka hi puou a, keihaw lama lungthim khâk chuh nang haw na hi zawu hi.

¹³Tichun, nang haw ka hun piek banga ei pie thuk dingin, chate kawma gen bangin, ka hun gen ahi, nanguh le kihawng lien un.

¹⁴Awilo mite tawh kituok takin namkawl puo khawm kiu in: Diktatna leh gitlohna’n banga kikawpna a neih uh? A hihloh leh, khawthim leh khawvak in le banga kivawpna a neih uh?

¹⁵Belial leh Krista’n le banga kituokna a neih uh? A hihloh leh, awi leh leh awilo chun banga chankhawm a neih uh?

¹⁶Milim haw leh Pathien Ho-In inle banga kituokna a neih uh? Eihaw vang, Pathien hing Ho-In I ngâl u a: Pathien in, “Kei, amau lak ah cheng ing ka ting, Amau tawh kitawn ing ka: Chun, a Pathien uh hi’ng ka ting, Amau haw le ka mite hi’n au,” a tih bang khan.

¹⁷Zieziekchun, “A lak uh apat hung pawt unla. A chuom in um un. Thil buok himhim le tham kiu.” LALPA’n a tii. khutichun, “Nanguh hun lawp ing ka ting,

¹⁸Nanguh dingin Pa hi’ng ka ting. Nanguh le, kei dingin chanu, chapa hi’n lau,” LALPA, Bangakai hihtheipa chun a tii.