Read Gangte 2 KORINTH 7 Bible Online

2 KORINTH 7 - Gangte bible

2 KORINTH 7

¹Khutichun, deihtakte haw, zie thutiem haw chuh I neih ziekun, phehlevo leh thagau buokna chengcheng lak apat, kisuthieng hitiu, Pathien lau kawm takin, thienthona bukim in um hitiu.

²Na lunggil u ah mun nei awt un. Kuomah, a lam lo in ka bawl puou a, kuomah ka sukhawlo puou a, kuomah ka suondawk diek puou hi.

³Nang haw hun mawhsakna dinga zie chuh ka gen ahi puoi: thih a hih leh thi khawm a, hin a hih leh hing khawm dingin, ka lunggil u hin ka hun vawp zing na hiu hi tih, tuma khan ka hun hilh ta kha.

⁴Nang haw ka hun muon zawh dân hi a nasa a, nanguh ka hun suon zie hi a nasai! Buoina tincheng ale, hansanna’n ka dim sek a: kipahna’n ka luong let sek hi.

⁵Makedonia gam ka hungtun tieng nasan u khan le. chawlhdam hun ka nei puou hi. Mun tin ah buoina a um a. midang te tawh kisuolna bang, lungthima lauthawng zing kawmin ka um uh ahi.

⁶Himahleh, mi lungdawngte suhangsan sek pa chun, Tita hungna chun ei hun tîlkhoh ta a.

⁷A hungna zieka ei sukthathawh mai chuh hilo in. himahlele, amah na tîlkhoh danteu a gen chun le, ei hihhalh ahi. Muh nei nawpdan teu, na lungkham danteu, ei panpih dinga na kiguotkhawl zawh danteu, ei hilh uh a, khutichun, tuhin chuh, nasatak in ka kipâk zaw tai.

⁸Ka lehkhathawn khan hun sulungkham mahleng, ka kisik ta puoi: atung vang khan chuh, ka kisik a, zie lehkhathâk khan a hun sulungkham hi tih ka het ziekin; hilele chawmkhat sung mai ahi khah.

⁹Tuhin chuh, ka kipâk hi, suklungkham a na um ziekuh hilo in, lungheina dinga na lungkham ziekuh ahi zawi. Keimauhaw zieka bangmah na chan lawh lohna dingun, Pathien lunglam banga suklungkham in na um ngâl u a.

¹⁰Pathien lunglam banga lungkhamna chun, hukdamna dingin, kisikna lungheina chuh a siem zaw sek a; mihing lungkhamna vang chun, thihna a sem zaw sek hi.

¹¹Tichun, ngaitiem u! Pathien lunglam banga suklungkham a na umna mawng u chun, chittheihna te, sukkhelh neilo na hih uh kigenthiemna te: lunggimnate, lauhnate, lunghelnate, gunchuhnate, thil phalo hihte gawtna dinga kisak zawhna te nangmau ah, a siem nasa na zen e! Ziehaw chengcheng achun, na thieng ui tin na kiphawchien tau ahi.

¹²Khutichun, zie lehkha khah na kawm u ah hun zik mahleng le, diklo taka bawl pa ziek khan ka zik puoh a, a lam lo a thuokpa ziek khan le ka zik diek puoh a; ka chunguh a na gunchuh zieu, Pathien mitmuha phuondawk a a um theihna dingin ka zik ahi zawi.

¹³Zieziekchun, sukbih in ka um ta him uh a; keimau bihna mai hilo in, Tita kipakna ziek hin le, ka kipâk zawsem u a, nang haw cheng chengin a lungthim na sukhalh sak tâk ziekun.

¹⁴A kawmah nanguh bang lam hitaleh, hun suong mahleng le, zahchâkna ka nei ta puoi; zahchâk malak in, bang cheng, na kawmuh a diktaka ka gen sek bang uh khan, Tita ânga ka kisuonnau chuh, thutak a na hi nai.

¹⁵Chun, na bawn u a thu na ngaih zie teu, lau leh kilîng kawma amah na lawp danteu chuh hezing kawmin, a lunggil chuh, nangmau haw lam ah a cheng zawsem tai.

¹⁶Bangakai a, na chunguh a ka kingak theih ziekin, ka kipâk tak zet hi.