Read Gangte GALATI 1 Bible Online

GALATI 1 - Gangte bible

GALATI 1

¹Paul, sawlchak, mihiemte sawl dawk hilo in, mihiem zâla le hilo; Isu Krista leh mithi lak apat a kaithopa, Pathien zâla hi zawpa leh;

²Ka kawma suohpih um cheng chengte apat Galati gama sapchuom umte kawmah:

³Pa Pathien leh I Lalpau Isu Krista kawm apat, lungsietna leh chamna na kawm u ah um hen:

⁴Krista chun, Pathien leh Pa deih lam taka thu zawp in, zie tulai vannuoi gilo lak apat eihaw ei hukdam dingin, amah mawng chuh I gitloh man un a kipie ta a.

⁵Pathien kawm achun lopina kumkhuotuong in um hen. Amen.

⁶Krista hehpihna zâla nanguh hun sampa khah, tu leh tu kikala, chanchin pha chuom lama na petmangsan u hi, mak ka sai!

⁷Himahleh, zie chuh, “Chanchin Pha,” ahi hiel puoh a; nangmau haw hun subuoi in, Krista Chanchin Pha suklamdan nuom, kuote ahim, na lak uh a a um ziekun zie chuh a gen ahi.

⁸Himahlele, keimau in ahim, van apat a hung suk, vânsâwlchâk in ahim, Chanchin Pha ka gen loh uh kha, chanchin pha dang a hung gen u chun, hansie dawl in um u hen!

⁹Ka gen tau a, tuhin hun gen kit ing ka: kuo’nle, na zawpsau lo kha, chanchin pha dang a hung gen u chun, hansie dawl in um u he’n!

¹⁰Ahih leh, tuhin, mihiem sukkipah guo ka him, Pathien sukkipah guo? Mihiemte kawma challat ut ka hi leh? Khutibanga hih ka na guot zing chun, Krista suok hilo ding ka hi.

¹¹Khutichun, suohpihte haw, ka Chanchin Pha gen kha, mihingte apat ahi puoi, tih ka hun hilh na hiu hi.

¹²Mihiemte apat ka muh le ahi diek puoi, mi’n ei hilh le ahi diek puoi. Isu Krista kilâkna zieka mu ka hizaw ngâl u a.

¹³Judate sakhuo ho dân achun malaia ka umdan khah na hezing ngâl u a Khati a Pathien sapchuom haw nasa taka sugimthei a, sukmangthai ka guot sek khah.

¹⁴Chun, ei suonte thuguichin zuih thu a phachuom ka ngaih takluot ziekin, Judate sakhuo hona lam achun, ka chipihte laka ka guolpih tamtak le ka makhelh ta a.

¹⁵Chun, ka nu sung apat a ei kawihchuompa leh, a hehpihna vanga ei sampa Pathien chun,

¹⁶Jentel te laka chanchin pha ka gen theihna dingin, a Chapa chuh, keimah kawma lungkim taka a suklat lai khan,

¹⁷Phehlevo leh thisan tawh kidawp lo in, chuleh, sawlchak ka hih masanga sawlchak na hi sate, Jerusalem khuo a umte kawma le va chieh diek sam lo in; Arabia gam ah ka chieh mang zieng zaw ta a; zie zawh chun, Damaska khuo ah ka vaikit ta a.

¹⁸Chun, kum thum nung in Kiphas veh dingin Jerusalem khuo ah ka va chieh a; a kawmah ni sawm leh ni nga ka nichuong ta a.

¹⁹Sawlchak dangte vang chuh, LALPA suohpih Jakob tihloh, kuomah dang ka mu puoh a.

²⁰Na kawm u a ka hun thu zik hi a dik ahi. Ka lepchieh puoi tih Pathien inle a he ngâl a!

²¹Zie nung chun, Suria leh Kilikia gamte ah ka chieh a.

²²Zie hun lai chun, Judia gama sapchuom umte chun, keimah mimal takin ei he puou hi.

²³Mi dangin a kawm u a, “Malaia eihaw ei sugimtheipa khan, tuhin, taksanna thu, sukmangthai a guot mawng kha, a kikopih tai!” ti a mi dangin a gen mai u chuh a hetuh ahi.

²⁴Khutichun, kei ziekin Pathien a limbawl tau hi.