Read Gangte GALATI 2 Bible Online

GALATI 2 - Gangte bible

GALATI 2

¹Tichun, Kum sawmleli a kivei nung in, Barnabas leh Tita chuh kitawnpih in, Jerusalem khuo achun ka va chieh kit ta a.

²Pathien in ka kawma chiehna ding thu a phuon ziekin ka va chieh ta a. Tichun, lawiupa deuhte kikhawp chuom na achun, Jentel te kawma ka Chanchin Pha tângsappih sek hi ka va hilh ta a. Malaia ka nasep hi henla, tupet a ka nasep hileh, a thawna a um zing ka deih puoh ngâla.

³Ka kitawnpih Tita chule Grik mi himahleh, zektan dinga pawng nawh in a um diek puoi,

⁴Mi khenkhat in pawngbawl a tan sak vang a nuom nau hi. Zie tawbang mite chuh, suohpih lêm, Krista Isu tawh I kipumkhatna zal u a, I zalennau hih entha dinga, I lak uh a a gûka hung kithawlh lutte chuh ahiu hi. Ziete chun, suok a mat ei nuom zing u a,

⁵Himahleh, Chanchin Pha Thudik hi, nangmau a dinga vawp bita a um zing theihna dingin, amau haw khuta chun mit phetkal khat chale ka kipie lut puou hi.

⁶Chun, milien deuha a ngaihteu chule, kei tawh kilamdanna a neih chuom diek loh ziekun ziehi ka gen ahi; Pathien in, pawlam latdan in vai a hawm puoh ngâl a, zie milien haw chun le, ngaihdan thak bangmah ei pie chuom diek puou hi, tih ka gen ahi.

⁷Khutih nak sangin, Pathien in, Peter chuh zektante kawma Chanchin Pha gen dinga a guot ahi tih a mu ngâl u a.

⁸Peter chuh, zektante laka Chanchin Pha gen dinga Pathien thilhih theihna a guota a um guol mah khan keile zektan lohte kawma Chanchin Pha gen dinga guota um ka hi ngâla.

⁹Chun, Jakob leh Peter leh Johan lawiupa deuhte chun vang, zie nasep hi Pathien in ei pie chuom bîk ahi tih a heu a. zieziekchun, sem khawm vek ka hih uh melchikna dingin, Barnabas leh kei chuh khut changlam in ei chibai uh ahi.

¹⁰A nget pên u chuh a pawl lak uh a chagahte ka hetzing dinguh ahi a. zie chuh ken le hih ka guot sek mawng chuh ahi.

¹¹Himahleh, Peter chuh Antiokei khuo a a hung lai in, awihmawh um taka a um ziekin, mipi lak ngêi ah ka na vauhilh ta a.

¹²Jakob in mi khenkhat a sawlteu chuh a va tun mau in. Peter chun, Jentel te kawmah an a ne sek a. Himahlele. a tun phet u chun, zektan ding phasate chuh a lauh ziekin, tel kit talo in, a kikiengkawih san ta a.

¹³Khutichun, Juda mite chule, a na dawilawk tau a, tichun, Barnabas nasan chule a dawihlawknau chun puih mang in a na um hiel ta a.

¹⁴Tichun, Chanchin Pha thutak bangin a um chieh puou hi tih ka muh phetin, a bawnchau a masanga chun, Peter kawmah, “Nang, Juda mi na hi ngâl a, Judate um banga umlo a, Jentel te banga um zaw ngâl in. bangti dana, Jentel te chuh, Judate um banga um sak na guot hâm sek a?” ka ti a.

¹⁵Kei u vang, pienna lama chun, “Jentel migilo,” a tihteu chuh hilo in, Juda mi mawng ka hi ngâl u a.

¹⁶Himahleh, Dan thilhih ziekin mi, hukdam in a um puoh a, Isu Krista taksanna ziek mai in mi, thiemchang a um ahi zawu hi tih, I he ngâl uh a. Eihaw’n le, Dan thilhih ziek hilo in, Krista taksanna zieka thiem changa I um theihna dingun, Krista chuh I ginchak uh ahi ngâl a. Dan thilhih haw ziekin kuomah, thiem chang himhim um ding ahi puoh ngâl a.

¹⁷Krista tawh kipumkhatna zâla thiem changa I um guot nasan u ale, Jentel te guola gilo a sim I hih u chun, Krista chuh gitloh hun umsakpa tihna a hi dem? Hi naisai lo e!

¹⁸Dana thilhihte, ka suksietsa kha, sapha kit ta leng, kei chuh, kuo ahim khat dân bawhsie chu tawbang hilo ding ka him!

¹⁹Dan thupiek tawh kisai lam thil himhim achun, kei ka thi ta a; Dan thupiek mah chun ei suklup ahi tai, ti a chuh, Pathien ding maia ka hin zawk theihna dingin.

²⁰Krista kawmah khetdên in ka um ta a, himahlele, ka hing hi, himahleh, keimah vang ka hi ta puoh a; Krista chuh keimah ah a hing zaw tai. Zie hinna, tu a ka hinna mawng hi, Pathien Chapa, ei lungsiet a keia dinga A hinna piepa taksanna mah achun ka hing ta ngâla.

²¹Pathien hehpihna chuh bangmah lo ka suoh sak puoh ngâl a. Himahleh, Dan thilhih zieka Pathien tawh kichama a um theih chun, Krista thihna chuh bangmahlo hi’n a.