Read Gangte GALATI 3 Bible Online

GALATI 3 - Gangte bible

GALATI 3

¹Aw Galati gama mi ngawlte haw! kuo hun dawih ngawl na hiu hi? Na maikawk uh a Isu Krista khetdên a chientaka latsak a hih mai zên tawh!

²Ziehi nei hilh un: Dan thilhihte ziekin ahi, Thagau chuh na muh uh. na zak u a na taksan ziekun?

³Hiti lâwm lâwm hin na ngawl u maw? Pathien Thagau a pan ta ngâl in, tisa a zo ding na hiu maw?

⁴Na thil hetsa cheng cheng teu khah bangmahlo mai ahi maw? Bang ahim khat bêk chuh hi tei ding a!

⁵Chun, na kawm u a Thagau hun piepa Pathien khan, Dan thilhih haw ziekin ahi, na zak uh a na taksan ziekun, na lak uh a thilmak a hih sek khah?

⁶Abraham thil chante kha ngaihtuoh tiem u; Pathien Lehkha thu’n, “Abraham in Pathien a taksang a, chun, zie a taksanna chuh Pathien in diktat in a sang hi,” tih ahih guol khan.

⁷Khuti a hih kal sieh chuh, taksanna neite chuh Abraham suon diktakte chuh ahiu hi, tih na het dinguh ahi.

⁸Pathien Lehkhathu’n, “Pathien in Jentel te chuh taksanna ziekin, amah tawh kicham in siem ina,” tih a genlawk sa ahi ngâl a. Khutichun, Pathien Lehkhabu chun Abraham kawma chuh Chanchin Pha chuh gendawk in, “Nangmah achun, namtin vangsak ina,” ti’n a gen ta a.

⁹Abraham in zie chuh a gingcha a, vangsak in a um a, zie guol mah chun, a gingcha chengcheng te chule vangsak in a um ui.

¹⁰Dan thilhih a kinga taphawtte chuh, hansie nuoia um ahi “Dan Lehkhabu a kizik chengcheng zawp lo taphawt chuh, hansie nuoia um ahiu hi!” tih zik ahi ngâla.

¹¹Himahleh, Pathien mitmuh in, kuomah, Dan thilhih zieka thiem chang a um puou hi tih, a kichien hi; Pathien Lehkhabu mah in, “Mi diktat chuh, taksanna’n hing ina,” a ti ngâla.

¹²Dan chun taksanna tawh bangmah kimatna a nei puoh ngâl a. “Kuole, Dan in hih dinga a thilphutte hih bukimte chuh hing un au,” a ti zaw ahi.

¹³Himahlele, Krista chuh I sik uh a hansiedawl a um in; Dan hansie lak apat chuh ei tandawk tai; Pathien Lehkha thu chun, “Thing a kikhai ta chuh, hansiedawl ahiu,” ti a a gen guol khan.

¹⁴Krista’n zie chuh, Pathien in Abraham kawma vangsakna a tiem khah Krista zâla Jentel te kawma piek a hih a, taksanna zieka Pathien Thagau tiem chuh I muh theihna dingun a hih ta ngâla.

¹⁵Suohpihte haw, mihing kal thu mang in tehkalna gen ta leng: Mihing nih in thil bang ahim khat chunga kithutuok a, kitiemna a zik zawh tak u leh, kuoma’n zie chuh a phel puou a, beh le a behlap kit diek ta puou hi.

¹⁶Zie tawbang mah chun, tuhin le, Pathien in Abraham leh a suon kawmah thutiem a na nei hi. Pathien Lehkhabu’n mi tampi huop in, “Suonte” a ti puoh a, mi khat mai gen in, “Na suon kawmah,” a ti zaw ahi; zie mi khat tih umzie chuh, “Krista,” tihna ahi.

¹⁷Chun, hiti ahi ka tih ahi, Pathien in Abraham tawh thugawlh a bawl a, zie chuh vawppha zing dingin thu a tiem hi. Dan, kum zali leh sawmthum nunga kipie chun, zie thugawlh chuh a hihsie thei puoh a, Pathien thutiem chule a hihmang thei kit puoi.

¹⁸Chun, goluoh ding chuh Dan thupiek ziek hita leh, thutiema kinga hi ta puo’n tin; Pathien in Abraham kawma, thilpiek chuh, thutiem ziekin a na pie ngâl a.

¹⁹A hih leh, Dan thiltup chuh bang ahi leh? Abraham suon, thutiemna pên pa chuh a hungtun masang chenga, thil hihkhelh cheng chuh suklata a um theihna dingin Dan chuh behlap a um ahi zawi. Dan chuh vânsâwlchâkte manga palai khuta sukdet a um ahi.

²⁰Chun, palai himhim, mi khat thilhih na ah a um thei puoh a, Pathien vang chuh khat ahi.

²¹A hihloh leh, Dan chun Pathien thutiem haw chuh a dodal hi leh? Naisai lo e! Mi suhing thei Dan piek in um ta leh; zie Dan zawpna ziek chun mi, Pathien tawh kichama siem in um ta ding ahiu hi.

²²Himahlele, Pathien Lehkhathu’n, khawvel pumpi chuh, gitloh thilhih theihna thu nuoi ah a um vek tau a; khutichun Isu Krista taksanna zieka thutiem chuh, a gingcha chengte kawma pieka um ahi, a ti ngâl a.

²³Himahlele, taksanna thu a hungtun makhan, zie taksanna hungtun masang sieh chuh Dan nuoia chun, thil chengcheng chuh khakkhum in a um hi.

²⁴Khutichun, taksanna zieka thiem I chan theihna dingun, Dan chuh Krista kawm lama ei kaihuoi ahung hi a;

²⁵Himahlele, tu a taksanna a hungtun nung hin, Dan kaihhuoina nuoi ah I um ta puou hi.

²⁶Krista Isu tawh pumkhata um in, taksanna ziekin Pathien chate na hi vek ngâl u a.

²⁷Krista tawh pumkhat a baptist na hi tau a; tuhin, Krista hinna a chuh thuom na hi tau hi.

²⁸Khutichun, Juda leh Grik kal a kilamdanna a um ta puoh a, suok leh suok lo kal a le, numei leh pasal kal a le a um diek ta puoi; na bawn u chun Krista achun pumkhat na hung hi tau hi.

²⁹Chun, Krista a na hih u chun, Abraham suon, thutiem dungzui a goluoh dingte na hiu hi.