Read Gangte GALATI 5 Bible Online

GALATI 5 - Gangte bible

GALATI 5

¹Suok hilo dinga Krista’n ei pawtsak tâk ziekin, ding det unla suok namkawl a chun tâng kit ta kiu!

²Ngaiun! Kei, Paul in na kawm u a ka gen hi, nangmau mawng zektan dinga na kiphal u chun, Krista chuh nang u dingin bangmah phatchuomna hi puo’n a.

³Kuole, zektan dinga kiphalte chengcheng chuh, Dan thu zawp dinga bate ahiu hi tih, ka hettuok sak kit ahi.

⁴Nanguh, Dana thiem chan guote haw! Krista tawh na kikhen tau hi: lungsietna chuh na puksan tau hi.

⁵Ei uh vangin, Pathien Thagau thilhih theihna zâla taksan na’n, diktatna kinepna chuh I ngak ngâl u a.

⁶Krista Isu achun, zektan bangmah a phachuom puoh a, zektan loh le bangmah a phachuom diek puoi; taksanna a, hehpihna nasep vang chuh a phachuom ahi.

⁷Hih vang na hih pha sek u kha uo! Thutak chuh na zawpna dinguh kuo a hun dal? Bangti’n a a hun thep zawh theih?

⁸Zie chuh a hun sampa Pathien hih ei puoi.

⁹“Chawl tawmcha’n, chângthâk tang chuh a pum in a zen suok sek,” a tih guol u khan.

¹⁰Nangmau chungthu a vang bangmah ginlahna ka hun nei puoi. LALPA a I hinnau kipumkhatna ziek chun, bangmah ngaihdan dang na neih uh ka gingcha puoh a; nanguh hun subuoi pên chuh, kuo hita leh, Pathien in gawt tei ding ahi ngâl a.

¹¹Suohpihte, kei hin zektan a pawimawh hi ti a ka na gen zing chun, bangati a sukgimtheih a um zing nalai ding ka him? Khutibang haw chuh a dik a hih chun, Krista kross thu ka gen zieka buoina haw hi sukmang hi ta’n a.

¹²A hun subuoite chuh, amau leh amau kitan bawng leh pha ka sai.

¹³Suohpihte, nang haw suok hilo dinga sap na hi ngâl u a; himahlele, na suok hihloh nau chuh, phehlevo dingin awnthawlna’n mang kiu inla, hehpihna’n kizen tuoh chiet zawu in.

¹⁴“Nangmah na kihehpih guolin na vengte na hehpih ding ahi,” tih Dan thupiek kamkhat hin, Dan thu chengcheng chuh a khaikhawm suok kêi ngâl a.

¹⁵Himahlele, na kikiettuoh uh a, na kinektuoh u chun, chingthei un, khutilochun, kisumangthai tuoh kha’n lau.

¹⁶Khutichun, ziehi ka tih ahi: Thagau ah um un, tichun, phehlevo utna chuh zawp lo ding na hiu hi.

¹⁷Phehlevo hin, thagau dona lam a utcha sek a thagau inle phehlevo dona lam a utcha sek hi. Thil na hih nawp hawu chuh na hih theih lohna dingun, ziehaw chuh a kikalh sek ngâl u a.

¹⁸Himahlele, thagau puih a na um u chun, Dan nuoia um na hita puou hi.

¹⁹Chun, phehlevo thilhihte chuh a kiphuong chil hi; ziehaw chuh: kideihchakna haw, buokna haw, hûkna haw,

²⁰Milim hona haw; dawithiemna haw, kimuhdahna haw, kigaihna haw, kimitthipna haw, lungnatna haw, kilangsehna haw, kibungkhenna haw, kihuihchuomna haw,

²¹kiguol-enna haw, zukhamna haw, zu mun lawpna haw, ahi a; zie tawbang hihte chun tuma’n le a hih sek uh ahi. “Khutibang thilhih chîngte chun, Pathien gam luoh puo’n au,” ti a tuma a ka hun hilh tâksa guol khan tuhin le ka hun hilh na hiu hi.

²²Himahlele, thagau gah vang chuh: hehpihna haw, lawpna haw, kichamna haw, thuokhatna haw, nunnemna haw, phatna haw; taksanumna haw,

²³Kingaihniem na haw, kidêk theihna haw ahi zawi. Khutibang kalh lam chun Dan thupiek himhim a um puoi.

²⁴Chun, Krista Isu a umte chun, phehlevo chuh, a gitloh ngaihtuohna leh a utchakna pum in a khêndên tau hi.

²⁵Thagau a hing I hih u chun, thagau in I hinnau a thunun ding ahi ngâl a.

²⁶Chapo tak in um puoi tingun, kisulungna tuoh ahim, kiguol-eng lâk tuoh ahim inle um diek puoi tiu.