Read Gangte GALATI 6 Bible Online

GALATI 6 - Gangte bible

GALATI 6

¹Suohpihte, mi khatto, sukkhelh nei a um u a, a thiemmawhna kiman dawk henla hileh, nanguh, thagau mite haw, “Thepna tuok khang ka ie,” ti a kivengpha kawmin, khutibang mi chuh lungnem takin tungding kit un.

²Na puokgik hawu chuh kidawntuoh un, khutichun, Krista Dan thu chuh zawp hi’n lau.

³Mi, amah bangmah hi sâm lo a, milien deuha a kingaih chun, amah kithem ahi.

⁴Mitin in, amah thilhih phawchien chiet zawu hen, zie tieng chuleh, mi dang chungah hilo in, amah chung mah ah suon ding nei thei ina.

⁵Mitin in amah puok kipuok chiet ding ahi ngâl a.

⁶Thu sinsak dawng pa chun, a sinsakpa kawm apat a, a thu muh chengcheng chuh mi dangte kawmah pie sawn hen.

⁷Nangmau kithem kiu in! Kuoma’n Pathien chuh a ngawl bawl thei puoh ngâl a. Mi’n, a theh tâk chuh, zie mah chuh ât ding ahi ngâla.

⁸Amah phehlevo deihlam a thehpa chun, phehlevo a um sietna chuh ât intin; Thagau lama thehpa chun chuh, thagau lama um, kumsawt hinna ât ding ahi.

⁹Zieziekchun, thilpha hih chim puoi tiu; I kithahdah loh u chun chuh, a hun taka ât ding I hi ngâl u a.

¹⁰Khutichun, hunlemchang I neih dungzui zel un, mi chengcheng chungah thilpha hih hitiu; taksanna a I inkawteu chungah hih deuh pên hitiu.

¹¹Keimah khut ngeia, lehkha na kawm u a, khauh tak taka ka hun zik hi en un!

¹²Phehlevo pawlam kisukhawihna hawl ta chun, zektan dingin a hun sawl hâm hâm sek uh ahi. Zie chuh bangmah dang ziek ahi puoh a; Krista kross zieka sukgimtheihna a thuok lawh lohna ding ziek chauh uh ahi.

¹³Zektan te nasan chun le, Dan thu chuh a zawp diek puou a; na phehlevo chunguh a, melchikna um zieka chuh, kiletsak a nawp ziekun, zektan dingin a hun deih sek uh ahi.

¹⁴Kei chun chuh, I Lalpau Isu Krista kross lo chuh ka suon loh ding zie mai chuh; zieziekchun, khawvel hi kei dingin khetdên ahi ta a, keile khawvel a dingin khetdên ka hi tai.

¹⁵Siemthak kitna lo chuh, zektan hi bangmah ahi puoh a, zektan loh le bangmah ahi chuom diek puoi.

¹⁶Zie tawbang ngaihdan zui ta chengte chunga chun kichamna leh kikhawtuohna um hen la, amau haw leh Pathien mipite chung ngeia tawh um ta hen!

¹⁷Tu a thak hin kuoma’n ei subuoi ta kihen; ka sapum a mapawn umte hin, Isu suokpa ka hih a sulang ngâl a.

¹⁸Suohpihte haw, LALPA Isu Krista hehpihna chuh, na bawn uh a chungah um zing ta hen. Amen.