Read Gangte EPHESI 1 Bible Online

EPHESI 1 - Gangte bible

EPHESI 1

¹Paul, Pathien deihlam a Krista Isu sawlchak chun; Krista Isu a mi taksanum, mi thiengtho Ephesi khuo a umte kawmah:

²Pathien I pau leh LALPA Isu Krista kawm apat, lungsietna leh chamna na kawm u ah um hen.

³I Lalpau Isu Krista leh Pa chuh pahchak in um hen! Amah chun, vanmun haw akhun Krista achun thagau lam vang sakna tincheng tawh vang ei pie a.

⁴Hehpihna leh thiengtho leh nuolna beia amah masanga I um theihna dingun, leisiet kisiem ma pek a Krista a ei na telsa him I hi ngâl u a.

⁵A hehpihna ziekin, Pathien in, Krista zâla a cha hi dinga ei na guotsa him ahi a, zie chuh amah kipahlam leh, a thiltup mâwng ahi.

⁶A hehpihna lopitak ziek leh, a Chapa deihtak chuh thilthawnpiek a ei piek tâk ziekin Pathien chuh pakchai tiu.

⁷Krista thisan ziekin amah achun I kitatnau I nei tau a, a lungsietna hauh dungzuia I sukkhelhnau ngaihdamna chuh.

⁸Zie hehpihna chun ama’n ching tak leh khânhe takin ei vuk uh ahi; a nawp lam thuguk I kawm uh ah ei hetsak in phat bukimna khawsak tienga a nawp lam (bangakai, van a thil umte, leichung a thil umte le Krista a gawp khawm ding chuh) ama’n hih a guot bang khan, amah mâwng achun ahi.

⁹Krista a sukbukim a um ding thuguk chuh eihaw ei hetsak ta a.

¹⁰Zie thiltup, Pathien in a hunbi a hungtun phat a a sukbukim ding chuh, thilsiem chengcheng leh, van a thil umte, leia thil umte, Krista nuoia a kawih khawmna hun ding chuh ahi.

¹¹Thil chengcheng hi Pathien guonggalh bang leh tih banga um ahi a; Pathien in, atûng apat a a na guotsa pansan in, Krista tawh kipumkhatna zâla amah mite hi dingin ei na tel ta ngâl a.

¹²Zieziekchun, eihaw Krista na kineppih masate hin, Pathien lopina chuh pakchai tiu.

¹³Nang u le, hukdamna a hun pui, Chanchin pha thudik na zak u khan Pathien mite na hi tau kha. Krista na gingchau a, chun, Pathien in amah a na hih uh etsakna dingin, thagau Thiengtho a tiem ngeia chuh mawhuol nam khum na hi tau hi.

¹⁴Zie Thagau chuh, Pathien in a mite kawma a thutiem chuh pie ngêi ding ahi tihna ahi a; chun, Pathien in amah a te chuh tatdawkna bukim pie ngêi ding ahi tih ei hêtchet sak hi. A lopina chuh pakchai tiu!

¹⁵Zieziekchun, ken le LALPA Isu na taksanna thuu leh, Pathien mi thiengthote na lungsietna thuu ka zak akipat,

¹⁶Nang haw a dinga Pathien kawma kipah thugen ka hai puoh a, Ka pauchamna ah ka hun hezing a;

¹⁷chun, I Lalpau Isu Krista, Pa lopitak kawm achun, amah na kawmuh a a hung kilak a, na het theihna dingun, chitna thagau hun pie dingin ka ngên sek hi.

¹⁸Na lungthim mit hawu sukvaka a hung um a, amah sapna kinepna haw, a mite kawma a tiem, go luoh ding lopi hauh zie haw, leh

¹⁹amah gingchate chunga a thilhih theihna lopi ziehaw tawh. Zie thilhih theihna, eihaw a sem pên chuh,

²⁰Krista thihna apat a a kaih thawh lai a hatna lopitak leh, van mun haw a a changlama a chut laia, thilhih theihna kha tawh kibang ahi.

²¹Krista chun, van muna vaihawmte, thuneihna chengcheng te, hatna te, lalna chengcheng leh min chengcheng chungah, tuhun mai hilo in, hun hungtung kit ding ale, vai a hawm ngâl a.

²²Pathien in thil chengcheng chuh Krista keng nuoi ah a kawih ta a, chun, bang cheng chunga luchang dingin, sapchuomte kawm achun a pie tai.

²³Sapchuomte chuh Krista sapum ahiu a, Pathien bukimna mâwnga amah kisubukimpa ngêi chuh.