Read Gangte EPHESI 4 Bible Online

EPHESI 4 - Gangte bible

EPHESI 4

¹Khutichun, kei, LALPA nasep zieka suongkul lut pa hin ka hun nget na hiu hi: Pathien in a hun sap laia, na hindan dinguh, a tih haw kha tawh kituok in hing un.

²Kingainiem tak leh, nunnem tak leh, thuokhat takin um zingun. Na kilungsietnau chuh, dawhtheih na’n etsak un.

³Chamna kikankhawmna, thagau in a hun piek kha vawp pha dingin theihtawp in bawl un.

⁴Kinepna, Pathien in a hun sapna kha, khat mai a hih guolin, taksa pum leh thagau khat mai a um ngâl a.

⁵LALPA khat mai, taksanna khat mai, baptist khat mai ahi;

⁶mi chengcheng Pathien leh Pa chuh khat mai um a, thil chengcheng sempa leh, bangakai sunga le um chuh ahi.

⁷I bawnu a kawmah, Krista thilpiek chuh, I kiphu bang zel un piek I hi chiet ngâl u a.

⁸Pathien Lehkhabu’n, “Chunglama a va kal lai khan Galhing kimante chuh salin a pui a, Mihiemte kawma le Thilpiek haw chuh a pie a,” a tih kha.

⁹Tichun, “A va kal” kiti hi bang tihna ahi leh? Zie umzie chuh, a lei mun niem pên ah a hung kum suk a.

¹⁰Khutichun, a hung kumsukpa chuh, khawvel hi ama’n a luoh dim theihna dinga, van chengcheng chunglam pek a va kalpa mah kha ahi.

¹¹Amah mah chuh, “mihingte kawma Thilpiek,” piepa chuh ahi; khenkhatte chuh sawlchak dingin a guot a, khenkhat chuh thiemgau dingin, khenkhat chuh, belampu ding leh khenkhat chuh sinsaktu dingin a guot a.

¹²Ziehaw chuh, Krista sapum siem bukimna dinga, Pathien mite kiguotkhawlna dinga piek ahi.

¹³Khutichun, I taksannau leh Pathien Chapa hetna lam achun, mun khata luong khawm in; Krista bukimna sânzie chuh pha’n, mi piting hung hi tai tiu.

¹⁴Chuleh, milem hatte sinsakna, amau muhdawk kawmte zawnchitna huih in, muntin cheng a tawh lawn viel chapang hi ta puoi ting uh;

¹⁵hehpih a thudik tak gen in, bangakai ah amah ah khanglien thei zawi tiu, amah chuh luchang ahi ngâl a, Krista ngêi chuh.

¹⁶Amah thuneihna nuoi achun, taksa bâk tinte chuh suktuoh in a uma, taksa pumpi chuh kizawpmat te chun zawp in a um a, tichun, bâktinte chun a hun sep tieng u leh, taksa pumpi chuh a hung khang lien a, tichun, lungsietna’n, amah leh amah a hung kitung ding sek hi.

¹⁷Khutichun, LALPA min in ka hun vauhilh na hiu hi: Jentel te chuh lungthim manloh pua a um bangun um ta kiu inla,

¹⁸a lungthimteu chuh a thim ta ngâl a. A ngawl u leh a lungthim uh tâk ziekin, amau haw chun Pathien ei piek hinna ahin chanvo a nei puou hi.

¹⁹Ziete haw chun kihetdawk theihna himhim a neih takloh ziekun; thil buok tin cheng pap taka hih dingin hûkna ah a kipumpiek tau hi.

²⁰Himahleh, nanguh vang chun, Krista chanchin na hetuh kha khutibang chuh ahi puoi!

²¹A chanchin na za ta ngêi u a, chun a nungzuite na hih tâk ziek u khan, Isu a thudik um kha sinsak in na um uh ahi.

²²Khutichun, malai a na umdan uh mihiem lui, a milem utna zieka sie deuh deuh kha hâwk dawk unla,

²³na lungthim uh thagau achun, a thak in um unla;

²⁴mihiem thak, thutak diktatna leh thienthona, Pathien tawbanga siem khan kivan un.

²⁵Khutichun, zuou gen hai in, eimah insak inthangte kawmah thu diktak gen chiet hitiu; kika tuoh chiet I hi ngâl u a.

²⁶Lungnau unla, gitloh vang chuh gilo kiu; na lungnat u chuh nisa’n tumpih kihen

²⁷Diabol chuh mun awt hiel kiu in.

²⁸Gucha chun gu ta kihen la; tasamte kawma piek ding a neih theih zawkna dingin, khuta thilpha sem in gim zaw he’n.

²⁹Na kam u ah thu phalo himhim pawt kihe’n, a kûl zie bang zela siem pha dingin thu pha pawt zaw hen, a ngaithate ding a lungsietna a hung hih theihna dingin.

³⁰Chun, Pathien Thagau Thiengtho chuh sulungkham kiu in, tatna ni tienga dingin amah a chuh mawhuol kinam na hi ngâl u a.

³¹Khatna haw, lungnatna haw, kinuoisiehna haw, lungdamlohna haw, kigensietna haw leh gitlohna chengcheng chuh haihsan in um hen.

³²Chun, nunnem a, lungthima kizahngaihtuoh takin um zing un la, Pathien in Krista a nanguh a hun ngaihdam guolin, kingaidam tuoh un.