Read Gangte EPHESI 5 Bible Online

EPHESI 5 - Gangte bible

EPHESI 5

¹Khutichun, a cha deihtakte bangin, Pathien umdan, late hiu in.

²Chun, Krista’n, a hun hehpih a, gimlim a dingin, Pathien kawma thillat leh kithawihna a I sik uh a a kipiek guol khan, hehpihna ah um un.

³Himahlele, nanguh Pathien mipite na hi tau a, zieziekchun, kideihchak leh buokna chengcheng, huoihamna tawh, na laku ah gen le kigen puok kihe’n.

⁴Chuleh, nang haw dingin thumanloh gen haw, zahmawh haw, chiemnuih thute gen chuh a kilawmlo ahi. Ziehaw hih sang chun, Pathien kawmah kipahthu gen zawu in.

⁵Mi deihchak nuom leh, buok leh huoiham himhim chun, (mi huoiham chuh milim ho mi ahi tihna ahi) Krista leh Pathien gam achun chan neilo ahiu hi tih na he ngâl u a.

⁶Kuoma’n, thumanloh mai in hun thêm kiu heh. Zie thil haw ziek chun Pathien lungnatna chuh, awilo chate chungah a hungtung sek ngâl a.

⁷Zieziekchun, amau haw chuh kipawlpih kiu in.

⁸Ma khan khawthim na hiu a, tuhin vang chuh LALPA achun khawvak na hung hi tau hi. Khutichun, khawvak chate banga na um dinguh ahi;

⁹khawvak gahte chuh: phatna haw, diktatna haw leh thudik ahi.

¹⁰LALPA sukkipak na ding lam chuh ngaihtuoh un.

¹¹Chun, khawthim a um mite’n thil manloh a hihna hawu achun telna himhim nei kiu in. Tel malak in, a mawhnau hetsak zawu in.

¹²(A gûka a thilhih sekteu chuh a gen le zahchâk a um sek ngâla a.)

¹³Chun, thil chengcheng chuh, khawvak a suklat a hih tieng leh, a hihna diktak chuh a hung kilang dawk sek ngâl a;

¹⁴thil khawvak a suklata um ta chuh, vak a hi sek hi. Zieziekchun ahi, “Nang ipmu, hak inla, mithi lak apat tho in; Tichun, Krista chun hun salhvak ina,” ti a gena a um khah.

¹⁵Khutichun, mi chinglote banga um lo in, miching te banga um zaw’n, na umdan u ah chun chingthei un.

¹⁶Ni khuo haw hi a phatloh ziekin, phat kizenpetcha hi kichâwk zel un.

¹⁷Zieziekchun, ngawl kiu inla, LALPA deihlam bang ahi, tih na he zawu in.

¹⁸Chun, uain kham in um kiu inla, zie tak a chun kidêklohna a um ngâl a; Thagau a dim in um zawu in.

¹⁹Pahchakna la haw, Pathien la haw, chun, thagau lam la haw a nanguh leh nang uh kiho tuoh in, LALPA chuh na lunggil u ah la sak sak un.

²⁰I Lalpau Isu Krista min in, Pathien, Pa mawng kawm achun bangakai chungah kipahthu gen zingun.

²¹Krista na limbawlnau in kitulut tuoh chiet un.

²²Zite haw, LALPA kawma na kituklut bang u hin, nangmau pasalte kawmah kitulut un.

²³Krista chuh sapchuom haw luchang ahih a, sapum hukdampa ahih bangin, pasal chuh numei luchang ahi ngâl a;

²⁴Khutichun, sapchuom haw Krista kawma a kituklut tawbang u hin, zite chuh bangakai ah amau pasalteu kawma a kituklut dinguh ahi.

²⁵Pasalte haw, na ziteu hehpih un, Krista’n sapchuom haw a hehpih a, a sik uh a amah a kipiek bang khan.

²⁶Sapchuomte chuh tuia silthien nunga Pathien kawma a thu a lat thiengtho a hih theihna’n;

²⁷Chun, amah kawm mawng a chuh sapchuomte chuh, thiengtho tak, hawihtak leh demkailo buok beklo a leh, tinlahna dang him nei lo a a kipiek theihna dingun zie chuh a hih ahi.

²⁸Khutibang mah in pasalte’n le, amau sapum bangin, amau zite chuh a hehpih dinguh ahi. Kuole, a zi hehpih chuh amah kihehpih ahi.

²⁹(Kuoma’n amah taksa a haw kha puoh a, khutih malak in, a vak un, a duot zawk sek uh ahi. Krista’n sapchuom haw a vaka, a duot bang tak hin;

³⁰eihaw hi a sapum kahaw I hi ngâl u a.)

³¹Pathien Lehkha’n, “Pasal in a nu leh a pa nusieh intin, a zi tuchak intin, tichun pumkhat hi ta’n au,” a tih guol khan.

³²Zie Pathien Lehkha thu a hin, thuguk kisel thuk tak mai a um a, himahleh, ken chuh Krista leh sapchuom haw thu ka gen ahi.

³³Zieziekchun, na lak uh ah kuon le, amah a kihehpih bangin a zi hehpih henla; chun, zi chun le a pasal zahbawl chiet u hen.