Read Gangte PHILIPPI 2 Bible Online

PHILIPPI 2 - Gangte bible

PHILIPPI 2

¹Khutichun, Krista a na hinnau chun a suhat in, a lungsietna chun a hun thamuon sak na hiu hi. Thagau a kivawp khawm in, kilainat in na kilungsiet tuoh ngâl u a.

²Zieziekchun, lungthim kibanga um in, hehpihna kibang nei in; kithutuok a lungkhata um in, ka kipahna subukim dingin ka hun nget na hiu hi.

³Nangmau a ding mai ngaihtuoh a kiletsak zieka bangmah hih lo in. mi tinin kingainiem takin, amah sanga mi dang phazaw’n ngai chiet he’n;

⁴nangmau a mai en lo in, midang te a ding le en zawu in.

⁵Zie lungthim, Krista Isu a um sek kha nangmau ah um hen:

⁶Amah vang chun Pathien banga um a, Pathien tuka um chuh thil thaklah theih in a ngai puoh a.

⁷Mihiemte banga hung pieng in, suok tawbang in a kingainiem a, a mah leh amah a kisudawng zaw ta a.

⁸Chun, mihiem mellepâng hung pu’n, a kingainiem a, thih chanpha a thu zawp in a hung um ta a, kross a thihna ngêi chuh.

⁹Zieziek tak chun Pathien in amah chuh chungnung pên a khun chawisâng in. min lak laka min chungnung pên chuh a pie ta a.

¹⁰Khutichun, Isu min limbawlna dingin, van a mi chengcheng te, lei chunga mi chengcheng te leh, leinuoi a mi chengcheng te chuh khupdin un tin,

¹¹tichun, Pa Pathien lopina dingin, Isu Krista chuh Lal ahi, ti’n lei tin chengin phuong chiet un au.

¹²Khutichun, ka deihtakte haw, gen na ngaih zing sek bang u khan, ka um pet maia sem lo in, tu a ka umloh kal hin sem zawu un la, lau leh kilîng kawmin nangmau haw hukdamna chuh sem dawk un.

¹³Amah kipahlam hih ut ding leh thu zawp dinga nangmau a sem pên chuh Pathien a hi ngâl a.

¹⁴Zie khawvel sietna laka cheng leh mi gilote laka hih, Pathien cha, sietna bei leh thiengtho na hung hih theihna ding un,

¹⁵thil bang cheng chuh phunchiek lo leh nielkalh lo in hih un. Amau haw kawma hinna thu na piek sawn lai u chun.

¹⁶Vana aksite guol khun vak un. Khutibang achu na hih u chun, Krista Ni khuo achun nang haw ziekin suon ding nei ing ka, a ziek chuh, ka thilhih leh ka nasep chengcheng teu chuh a thâwn ei puoi tih a suklat ding ziekin.

¹⁷Ka hinna thisan chuh, Pathien kawma na taksan kithawihnau thillat chunga chuh sunthak ding hita lele, kipâk ing ka; chun, na bawnchau in ka hun kipahpih na hiu hi.

¹⁸Khutibang mah chun, nang haw le kipâk un la, nei kipahpih thuk zawu un.

¹⁹Himahlele, na chanchin uh ka heta, sukhat a ka um theihna dingin. LALPA lemsak a hih chun, chawmlo kal a Timothe hi na kawm u a hun sawl ka kinem hi.

²⁰Zie tawbang lungthim pu na khankhuou ding lungthim tak taka hun ngaihtuoh sak ding hi kuomah ka nei puoh ngâl u a.

²¹Mi dang cheng chun la, Isu Krista ding hawl lo in, amau haw a ding ngên a buoipih chiet ngâl u a.

²²Himahlele, amah hi chuh phawtchien a a um tâk zie na heu a, chapa’n a pa a zen bangin, Chanchin Pha nasepna lam ah ei seppih sek a hi kha.

²³Khutichun, ka chanchin ding ka het tieng leh, amah hi hun sawl zieng leng ka tih ahi.

²⁴Chun, keimah mawng le, chawmlo kal a na kawm u a hung vak zieng chuh LALPA achun ka kinem hi.

²⁵Himahlele, Epaphrodita, ka suohpihpa, ka naseppih; ka sepaih chanpih leh na thangko uh, ka thil tâksapna chenga ei panpih sek pa hi na kawm u a hun sawl kûl in ka hêi.

²⁶Amah chun na bawn un a hun ngai mah mah ngâl a, a damlo a hi tih na na zak ziekun a lungkham ten mai hi!

²⁷Thi vanga na a hi ngêi ngut a, himahlele, Pathien in amah chuh a khuotuoh a, amah chung mah ah hilo in, lungkhamna chunga lungkhamna zawksem ka neih lohna dingin, kei ei lungsiet le a hi kawm hi.

²⁸Khutichun, amah hi na muh kit tieng u a na kipah theihna dingun leh, kei lungkhamna le atawm zawk theihna dingin ka hun sawl kin deuh a hi.

²⁹Zieziekchun, amah hi LALPA a suohpih bangin kipâk takin a na lawp un la; zie tawbang mi hi limbawl un,

³⁰a ziek chuh, nang haw mawng in na piek theih loh uh, Krista nasepna lama chuh ei panpih in, amah hinna ngêi chuh thi vang hiela lauhthawng um in a um ngâl a.