Read Gangte PHILIPPI 4 Bible Online

PHILIPPI 4 - Gangte bible

PHILIPPI 4

¹Zieziekchun, ka suohpih deihtak leh ngaihtak, ka kipahna leh ka lallukhukte haw; khutibang chun LALPA achun ding det un, ka deihtakte.

²LALPA achun lungthim kibang pu dingin, Euodia leh Suntuki le ka ngên ahi.

³A hi, nang le ka namkawl puokpih tak tak, ka hun chiel na hi, Chanchin Pha nasepna lama ei hah panpih numeite khah panpih ah. Klemen tawh, ka seppih dang, Hinna lehkhabu a min chuongte kha tawh.

⁴LALPA achun kipâk zingun, ti kit zel sek ka, kipâk un!

⁵Na dawhhatnau chuh mi chengcheng het hi he’n. LALPA chuh hung pai ding a hi ngâl a.

⁶Bangmah ah lungkham kiu in; bang chengah paucham leh ngenin, kipahthu gen tel zelin, na ngetna hawu chuh Pathien kawmah hetsak in um zaw hen.

⁷Tichun, Pathien, lungmuonna lungthim himhim a het sen loh khan, na lunggil u leh ngaihtuohna hawu chuh Krista Isu achun hun ven sak na’n a.

⁸A chaihna kêi in suohpihte, a dik ta cheng, a zahum ta cheng, a thutak ta cheng, a thiengtho ta cheng, a deihum ta cheng, a thanpha ta cheng, phatna a um a, pahchakna a um phawt chun, ziehaw chuh ngaihtuoh un.

⁹Na thil sin hawu, na thil muh hawu, na thil zak hawu, keimah a na thil muh hawu khale, zie tawbang ngêi kha hih sek un; tichun, lungmuonna Pathien chun nanguh hun umpih hen.

¹⁰Himahlele, nei ngaihtuoh seknau chuh, tu a hun sawttak nunga na hun vel suklat kit tâk ziekun, LALPA achun ka kipâk hi. Nei ngaihsak ta puou ui ti ka hi puoh a, a suklatna ding hun khan na neih loh ziekuh a hi zawi.

¹¹Ka tâksap thu gen vang ka hi puoi: kei chun chuh bang tawbang in um leng le lungkim zel ka sin ta ngâl a.

¹²Neucha a umdan ka thiem a, lien taka umdan le ka thiem a; thil tin cheng leh thil bang chengah tai leh vah, gilkiel a umdan, kiningting leh tasam tak a umdan thuguk chuh ka he dawk ta ngâl a.

¹³Ei suhatpenpa achun thil bang cheng ka hih thei ahi.

¹⁴Himahlele, ka lunggimna haw a nei na lunggimpih hawu hi na hih phau hi.

¹⁵Chun, nanguh, Philippi mite haw Chanchin Pha tun tûng laia, Makedonia gam apat ka pawtdawk lai khan, nang haw ngâllo chun, sapchuom lawikhat cha’n le, thilpiek leh muh lam achun ei panpih puou hi tih nang haw mawng le a hete na hiu hi.

¹⁶Chun, Thessalonika khuo a ka umlai khan le, ka tâksapna awnghu dingin, khatvei mai hilo in, nih vei to na hun thak u kha.

¹⁷Thilpiek chuh hawl ka hi puoh a, gah, nangmau haw lama pung ding chuh hawl ka hi zawi.

¹⁸Himahleh, thil bangkim ka nei a, ka nei tai, nei hun thilpiekteu gimlim, kithawihna deihum, Pathien pawm tâk leh kipahlam tak chuh, Epaphrodita khut apat in ka na mu ta a, ka kiningting tai.

¹⁹Chun, ka Pathien chun, Krista Isu achun, na tâksapna tin chenguh hun huksak ding ahi.

²⁰Tichun, I Pathien u leh, I Pau kawm achun kumkhuotuong in lopina chuh um hen. Amen.

²¹Krista Isu a mi thiengtho tin cheng, ka chibai ei na piek sak un: Ka kawma suohpih umte hin a hun chibai na hiu ui.

²²Mi thiengtho chengcheng te’n a hun chibai u a, Kaisar inkawte laka mite diek hin a hun chibai na hiu hi.

²³LALPA Isu Krista lungsietna chuh na bawn u a kawmah um hen.