Read Gangte KOLOSSA 2 Bible Online

KOLOSSA 2 - Gangte bible

KOLOSSA 2

¹Nangmau haw leh, Laodikei khuo a umte leh, taksa a ka mel mu khalo te chenga dingin, bangti tienga nasa’n a ka hun bawlsak hâm hâm tih hi, he leu chin ka nuom mah mah ngâl a.

²Zie chuh, hansanna a a dim u a, lungsietna a a kikankhawm u a, lungmuonna hauhsakna bukim, hetchetna diktak zieka um chuh a neih theihna dingun ka hih ahi. Khutibang hin Pathien thuguk, Krista ngêi chuh he thei un au.

³Amah chuh Pathien chitna leh hetna go selguk hawnna chabi chuh ahi ngâl a.

⁴Kuoma’n mûkthiema a hun thepthak lohna dingun ziehaw chuh ka hun hilh ahi.

⁵Taksa’n na kawm u ah um kimahlengle, kipâk taka um in, na kitûp zieu leh Krista na taksan det zieu en in, thagau achun na kawm u ah ka um zing ngâl a.

⁶Krista Isu chuh LALPA a na pawm tâk ziekun, amah tawh kipumkhat in hing tau un.

⁷Amah achun zung thuk taka khawh in, na hinnau chuh amah a lemto in, na taksannau achun hung hât deuh deuh tau in, sinsak a na um tâk bang u khan. Chun, kipah thugenna ngen a dim in hung um zawu in.

⁸Chingthei un! khutilochun, kuo’nle, Krista thu bang hilo in, mihiemte thuguichin leh, vannuoi lehkhabul bangin, a chitgukhahnau leh kithepna maimai in gâl kaih in hun kai kha’n au.

⁹Pathien hihna bukim chuh Krista mihinna achun a um ngâl a.

¹⁰Chun, amah achun hinna bukim chuh piek in na um tau hi. Amah chuh thagau lam vaihawm leh thuneihna sangpen a um a hi ngâl a.

¹¹Krista tawh pumkhata um in, zektan na hung hi tau a, mihiemte khuta zektan hilo in, Krista a zektan, sapum gilo thilhih theihna apat pawtdawk sak na hi tau hi.

¹²Khutichun, baptist a na um un, Krista tawh vuih in na um tau a, zie baptist mah achun, thihna apat a kaithopa, Pathien thilhih theihna taksanna ziek chun, Krista tawh kaihthawh in na um tau hi.

¹³Khatvei chuh, na gitlohnateu ziek leh, Jentel dân neilote na hih ziek un, thagau lama thi na hiu a. Himahlele, tuhin, Pathien in Krista tawh a hun sukhin khawm na hi tau hi. Pathien in I gitlohnateu chuh. ngaidam in,

¹⁴batna lehkha leh dân thupiek a zik cheng chuh, kross a khêndên in, a thaimang vek ta ngâl a.

¹⁵Krista chun lalna leh thuneihnate chuh hâwk tha’n, zie kross achun ziehaw chuh zo in, a zawhna chuh tângphuong takin a etsak ta a.

¹⁶Khutichun, nek thu ah ahim, dâwn thu ah ahim, kut ni thu ah ahim, tha thak matna thu ah ahim, chawlhni mat thu ahim ah kuoma’n hun awimawh kihen.

¹⁷Ziehaw chuh tunung a thil hungtung dingte lim mai a hii, a tak vang chuh Krista ahi.

¹⁸Kuoma’n kilâkna chuombîk mu a kingai in ahim, a mah kingaihniem lêm thawh in ahim, vânsâwlchâkte ho ka hi ti a a hun demsiet dinguh kiphal kiu in. Zie tawbang mi chuh, a mihiem ngaihtuohnau achun chawmlo kal a mût manga um in;

¹⁹Taksa luchangpen Krista chuh tudet lo in a um sek ui. Krista thunuoi achun taksa pumpi chuh chawm let a um in, a kizawpna leh tukmatnahaw a chuh kankhawm a um in, tichun, Pathien in a deih bang tak chun a khangto sek ahi.

²⁰Vannuoi Lehkhabul chuh Krista tawh na thih khawm pih uh a hih tâk chun, bang zieka zie khawvel a hing nalai banga um zing na hiu hi? Bang zieka zie danhaw,

²¹“Khawih khawih ki’n la, tep le tep diek ki’n la, tham le tham kha diek ki’n” tih hi zawp zing nalai na hiu hi?

²²Zie tawbang thil chengcheng chuh mat kawm a beimang ding a hi a, mihiem siem kawm dân leh sinsakna a hi ngâl a.

²³Zie tawbang dante chuh, vânsâwlchâkte hona apat a chitna um leh, kingaihniem lim thawh maimai leh, taksa kipawngbawlna apat a hung um dingin a kilawm a; himahleh taksa utchakna apat a kithununna dingin bangmah phatchuomna a nei diek puoi.