Read Gangte KOLOSSA 3 Bible Online

KOLOSSA 3 - Gangte bible

KOLOSSA 3

¹Khutichun, Krista a kaihthawh a na um tâk u chun, chunglam, Pathien changlama chu, Krista umna a thil umte chuh hawl un.

²Chunglama thil um haw achun na lungthim uh nga chak un, leia thil um haw achun nga lo in.

³Na thi tau a, na hinnau chuh Pathien achun Krista ah selgûk in a um ngâl a.

⁴Krista a na hinnau tak tak chuh a hung kiphuon tieng leh, nanguh le amah kawmah lopi takin kiphuong ta’n lau.

⁵Khutichun, na sapum kahawu, leia um haw hi sulum un: kideihchakna haw buokna haw, hûkna haw, gitloh lungveina haw, huoihamna haw, (huoihamna chuh milim hona ahi ngâl a);

⁶Zie thil haw ziek chun ahi, Pathien lungnat chuh awilo chate chunga a tun sek hi.

⁷Nang haw le, malai a zie thil haw a chuh na hin lai u khan, ziehaw achun na um sek u khah.

⁸Tuhin vang nangun le, zie thil haw, kinuoisiehna haw. lungnatna haw, kihawtna haw, zahmawh haw, na kam u a pawt, kam zahmawh haw hi sumang un. Kigaihna leh lungnatna thu chuh na laku ah gen le kigen kihen.

⁹Lepchieh in kithem tuoh kiu inla, mihiem lui chuh a thilchîn haw pum in na hâwk tha tau a,

¹⁰Mihiem thak chun na kivan ta ngâl u a. Zie mihiem thak chuh hetna bukim nei dingin, a siempa mah banga siem thak a um a hii.

¹¹Zie tak achun Grik mi leh Juda mi, zektan leh tan loh, nam chuom te, Skuthia mite, suok leh suok lo tih a um ta puoi; Krista chuh bang cheng hi zaw’n, bangakaia le a um hi.

¹²Khutichun, Pathien mi tel, mi thiengtho leh deih takte bangin, kilungsietna lunggil haw, zahngaihna haw, kingaihniemna haw, lungchuolna haw, thuokhatna haw chun kivan un.

¹³Kuo’n le, kuo chung hita leh thukhawk nei ta leu chin kidawh tuoh in, kingaidam tuoh un la; LALPA’n nanguh a hun ngaihdam bang tak khan ngaidam thuk un.

¹⁴Chun, ziehaw chengcheng chung achun hehpihna behlap un, zie chuh thil chengcheng kankhawmna bukim chuh a hi ngâla.

¹⁵Chun, Krista lungmuonna chun na lunggil u ah vaihawm he’n; khutibang hi ding chun sapum pumkhata Pathien in a hun sap na hi ngâl u a. Kipak in um zing un.

¹⁶Krista thu chuh a hauhsakna chengcheng tawh na lunggil u ah cheng zing he’n. Mitin chuh chitna tin cheng in sinsak in hilh un. Pahchakna la haw, Pathien la haw, leh thagau lam la sau in la; lunggil a kipahthu gen kawmin Pathien chuh na lunggil u ah lasak sak un.

¹⁷Chun, na hih tak uh chuh, thugen in ahim, thilhih in ahim, amah zâla Pa Pathien kawma kipahthu gen kawmin, LALPA Isu min in hih vek un.

¹⁸Zite haw, nangmau pasalte kawm chiet ah kitulut un, zie chuh LALPA a umte hih ding dawl ahi ngâl a.

¹⁹Pasalte haw, na ziteu hehpih un la, a chungu ah husie kiu in.

²⁰Chapangte haw, bangakai ah na nu leh na pateu thu’n nung un, zie chuh LALPA achun kipah-um ahi ngâl a.

²¹Pate haw, na chateu sunuok kiu in, dân leh dawilawk kha’n au.

²²Suokte haw, taksa a na lawiupateu thu’n bangakai ah nung un la, mihiem sukipakte mai banga mit na sem lo in, LALPA na zah ziek u a lungthim diktak pu’n hih zawu in.

²³Na hih takphawt u chuh, mihiem a ding banga hih lo in, LALPA a ding banga hih zaw’n, lungthim dik takin hih zawu in.

²⁴LALPA’n a mite dinga kipahman a kawih chuh hun pie ngêi ding a hi tih hezing un. A na nasep uh, na puu tak tak chuh Krista a hi zaw ngâl a.

²⁵Himahleh thil diklo hihte chuh a thilhih dungzui u a chuh ditthuk a um ding ahiu a; Pathien in mitin chunga kibang taka vaihawmna nei ding a hi ngâl a.