Read Gangte 1 THESSALONIKA 1 Bible Online

1 THESSALONIKA 1 - Gangte bible

1 THESSALONIKA 1

¹Paul leh Silvanas tawh Timothe apat chun: Pa Pathien leh, LALPA Isu Krista sapchuom, Thessalonika khuo a umte kawmah: Lungsietna leh chamna um hen.

²I Pathien u leh, Pa ma achun, taksanna zieka na thilhih hawu, hehpihna zieka na sepgim zie hawu leh, LALPA Isu Krista kineppihna zieka na thuokhat zie hawu khah hezing in,

³ka pauchamnau haw achun na min uh lo in, nangmau haw, na bawnchau a dingin Pathien kawmah kipahthu ka gen zing sek ui.

⁴Suohpih, Pathien hehpihte haw, tendawk na hih zieu chuh ka heu a;

⁵Khati a, ka Chanchin Pha genteu khah, thu maia na kawmuh tung lo a, thilhih theihna leh Thagau thiengtho tawh thudik hetna bukim tawh a hungtun tâk khah. Nangmau haw makhuo ding khuol a, bang tawbang mi ka hih uh na he ngâl u a.

⁶Chun, keimauhaw leh LALPA umdan late na hiu a, chun, thuokgim mah mah leu chin le, Thagau thiengtho apat a thu hung chuh kipâk takin na na pawm tau a.

⁷Khutichun, Makedonia leh Akaia gama gingchate chengcheng ettawn na hung hi tau kha.

⁸Chun, LALPA thu chuh nangmau haw apat a, Makedonia gam leh Akaia gama a kithan dawk mai hilo in, Pathien a na taksan zieu chule muntin ah a kithang suok ta ngâl a. Zieziekchun, keihaw dingin bangmah gen beh a ngai ta puoi.

⁹Mipite haw chun, nang haw ka hung vehthak lai a nei na lawp dân u leh, Pathien hing leh diktak ho dinga, milim pathien apat na kihei kit danteu leh,

¹⁰A Chapa, mithi lak apat a kaih thawh. Pathien lungnat hungtung ding apat a ei hukdawk pên, a Chapa Isu, van apat a a hung ding na ngak uh a gen sausau uh ahi.