Read Gangte 1 THESSALONIKA 2 Bible Online

1 THESSALONIKA 2 - Gangte bible

1 THESSALONIKA 2

¹Suohpihte, nang uh ka hung vehthaknau kha a thâwn puoi tih, nangmau haw ngêi in na he ngâl u a.

²A thâwn hih malak in, Thessalonika khuo a na kawmuh a ka hung masang u a, Philippi khuo a sukgimtheih leh zahhuoi taka bawla ka umdanteu kha na heu a. Dodalna nasatak um mahleh, ka Pathien un amah apat a Chanchin Pha chuh gen dingin hansanna ei pie a.

³Na kawm u a ka thugen u hi, thil diklo apat ahim, utna thiengtho lo apat ahim a hi puoh a; kuomah lepbawl guo le ka hi diek puou hi.

⁴Khutichuh hizaw lo in, Pathien in Chanchin Pha vawp sak dinga a phasak lam ka hih ziekun, gen dinga a deih haw chauh chuh ka gen zaw sek uh ahi. Zieziekchun, mihiem te sukkipak ka guo puou a, himahleh, lunggil enchien pa Pathien chuh sukkipak ka guo zaw sek uh ahi.

⁵Na kawm u ah pahchak lêm thu ahim, lunggil huoihamna melhkhuhna thute ahim tawh ka hung ngei puou ui tih na heu a, Pathien le ei hetpihtu ahi!

⁶Kuomah kawm apat pahchak lawh ka guo puou a, Krista sawlchak ka hihna ziek u a nang haw chunga thil ngêk nei thei himahleu ung le,

⁷nang haw apat ahim, a hihloh leh mi dangte chunga le, bangmah ka ngek puou ui. Na kawm u a ka um tieng u leh, nute’n a chateu a dâwn bangun, nunnem takin ka um sek u kha.

⁸Nanguh ka hun lungsiet bêk ziekun, Pathien apat a Chanchin Pha ka hun hilh mai uh hilo in, keimauhaw hinna ngêi le hun piek ka nuom hiel uh ahi. Ka hun deih mah mah uh na hiu ui!

⁹Suohpihte, ka sep chawl zieu leh, ka sepgim danteu kha na hezing ui; na lak uh a kuomah ka sukgiksak lohna dingun, a sun a zan a sem in, Pathien Chanchin Pha ka hun hilh sek uh na hiu kha.

¹⁰Nanguh, gingchate chunga thiengtho tak leh dem umlo taka ka umzieu kha, nang haw ei hetpihte na hiu a, zie tawbang mah chun Pathien in le ei hetpih hi.

¹¹Amah gam leh lopina a hun sam lut pa, Pathien kipahna zawng a na hin theihna ding un, pa’n a chate chunga a hih bangin, hun tîlkhoh a,

¹²hun lungmuon a, hun hettuoksak zinga, na chung chiet u a ka hih zieu kha na he ngâl u a.

¹³Chun, zieziek hin Pathien kawmah kipahthu ka gen zing sek uh ahi: keihaw apat a Pathien thu na zak uh, na pawm lai u khan, mihiem thu pawm in na pawm puou a, Pathien thu pawm a na pawm zawk ziekun; zie chuh a dik him ngâl a. Nanguh, a gingchate chunga sempa chuh Pathien ahi.

¹⁴Suohpihte, Judia gama Pathien sapchuom, Krista Isu a umte chunga thiltung kha nang haw chung ale hungtung ahi. Amau haw chun Judate laka a thuok bangun, nangun le, nangmau gama mite lak ah na thuok sek ngâl u a.

¹⁵Ziete chun LALPA Isu leh thiemgaute that in, keihaw le ei sugimthei u a. Pathien a sukipak puou a, mi chengcheng le a kikalhpih sek ui.

¹⁶Jentel te kawma hukdam a hung hih theihna ding u a, thu ka gen ding nasan uh ei khap sek uh a hi kha! Khutibanga chuh hihin, a gitloh tehnau chuh a sudim tau ui. Khutichun, Pathien lungnatna chuh a chungu ah a huoisie thei pên in a hungtung tai!

¹⁷Himahlele, suohpihte, sawtlo cha a dingin kikhen mahleu hing, lunggil lama kikhen lo in, na mel uh muh kit ding ngaklah takin ka hah bawl mah mah sek ngâl u a!

¹⁸Na kawm u a hungkit nuom ka hiu hi. Kei Paul ngêi hinle nihvei tak hung ka na guo ta a, himahlele, Setan in ei na dal sek hi.

¹⁹LALPA Isu a hung tienga, zawhna ka kisuonpih ding u chuh, thil dang bangmah ahi puoh a, nang haw mawng hi, ka kinepnau, ka kipahnau chuh na hi ngâl u a.

²⁰Nang haw hi ka kisuonpih u leh, ka kipahnau na hi takzet uh a puo!