Read Gangte 1 THESSALONIKA 3 Bible Online

1 THESSALONIKA 3 - Gangte bible

1 THESSALONIKA 3

¹Khutichun, ka thuok zawh tâk loh phet u chun, Athen khuo ah keimau mai nutsieh in um leng pha’na ka ti tau a.

²Timothe, ka suohpihpau, Krista Chanchin Pha lama Pathien zenvielpa hi ka hun sawl tau hi. Amah chuh nang haw hun suhat ding leh, na taksanna lam u a hun panpih a,

³Zie sukgimtheihna thuokna zieka hi kuomah na kihei kit lohna dingun. Nangmau haw mawng in le, zie sukgimtheihna haw hi, keihaw dinga Pathien phasak lam a hi tih na he ngâl u a.

⁴Na kawm u a ka umlai u khan, sukgimtheih thuok ding I hiu ui tih ka gensau ahi a; khutibang mah chun a tung a, zie chuh na heu kha.

⁵Zieziekchun, ka thuok zawh tâk loh nung un, Setan in hun thempai kha’n na tin uh, ka sepgimnau chuh mawk mai hi kha’na ti’n, na taksan zieu ka na het theihna dingun, Timothe hi ka hun sawl uh ahi.

⁶Tuhin, Timothe chuh na kawm u apat hung kitin, na taksan zieu leh na lungsietnau, thu kipah-um tak chuh ei hun puok sak kit ta a. Amah chun, nei hetzing danteu leh, nang haw hun muh ka nawp guol mah un, muh nei nuom mah mah ui tih ei hilh a.

⁷Zieziekchun suohpihte, ka buoinau leh ka thuokgimnau cheng chengah, na taksannau thu ziekin, lungbih takin ka um tau hi.

⁸Tuhin chuh ka hing tau, na hinnau a LALPA tawh kipumkhata na din det phawt u hin chuh!

⁹Tuhin chuh, nang haw ziekin Pathien kawmah kipahthu ka gen thei tau hi. Nang haw zieka amah a kipahna ka neih ziek u hin, amah chuh ka pakchau hi.

¹⁰Na mel uh ei muh sak kit ding leh, taksanna lama na tâksap awnguh hun huksak dingin ka lungthim pumpiu in, asûn-azan in ka paucham sek ui.

¹¹Tichun, I Pathien u leh Pa mawng leh, I Lalpau Isu chun, na kawm u a hungna dingin lampi ei guonggalh sak ta hen!

¹²Chun, nangmau haw lama hehpihna ka hauh bangun, nangmau haw lama kihehpih tuohna leh, mi chengcheng lama hehpihna chuh, LALPA’n hun hihpun sak in, hun gahsuoh sak ta hen!

¹³Khutichun, I Lalpau Isu chuh, a mi thiengthote chengcheng tawh a hung tieng leh, I Pathien u leh I Pau masang achun, na lunggil hawu thiengtho leh paulap bei in hun sudet thei ina.