Read Gangte 1 THESSALONIKA 4 Bible Online

1 THESSALONIKA 4 - Gangte bible

1 THESSALONIKA 4

¹Khutichun suohpihte, a chaihna kêi in, Pathien kipahna lama na hindan ding u chuh, keimauhaw apat in na he tau a. Zie chuh, tu a na hindan bang mah uh hi ahi. Zieziekchun, tuhin, LALPA Isu min in, hih nasa zawsem dingin ka hun ngen un, ka hun tîl uh na hiu hi.

²LALPA Isu zâla thuhilhna ka hun piekteu kha na he ngâl u a.

³Pathien deihlam, na thienthona dinguh chuh ziehi ahi: kideihchakna haihsan un la;

⁴na lak uh a pasal tinin, a zi tawh thiengtho tak leh zahum taka hindan ding kihet chiet u he’n la;

⁵Pathien hephalo, Jentel te banga, utchakna thanghuoia kipie lo in.

⁶Zie lam thu achun, kuoma’n, suohpih te chungah thilhih gilo in, lemchâng hawl kihen. Zie tawbang thil hihte chuh LALPA’n gawt ngêi ding ahi, ti a nasa taka ka hun hetsak masak sau khah ahi ta ngâla.

⁷Pathien in a buok dingin ei sam puoh a, thiengtho taka hing dingin ei sam zaw ahi.

⁸Zieziekchun, kuole zie sinsakna thu khawksalo pa chun, mihiem khawksalo ahi puoh a, Pathien, a Thagau Thiengtho nanguh hun piepa khawksalo ahi zawi.

⁹Taksanna lama na unauteu hehpihna lam thu chuh na kawm u a hun zik a ngai puoi; kihehpih tuoh dingin, nangmau haw mawng, Pathien sinsak in na um ta ngâl u a.

¹⁰Makedonia gama suohpih umte chengcheng chung achun, zie chuh na hih ta him uh a. Khutichun, suohpihte, hih nasa zawsem dingin ka hun nget uh na hiu ui.

¹¹Hindan nuom taka hin ding tup un la, nangmau nasep chiet chuh kibuoipih un la; ka hun hilh masak tak bang u khan, nangmau haw chiet hinna ding kisep dawk guo chiet un.

¹²Khutichun, awilote mitmuh in kilawm takin um thei un na tin uh, bangmah tasam in um puo’n lau.

¹³Himahlele, suohpihte, mi dang kinepna himhim neilote banga na lungkham lohna dingun, ipmute chanchin na het loh uh ka nuom puoi.

¹⁴Isu a thi a, a tho kit tai tih I ginchak ngâl u chun. amah gingcha a na ipmusate chuh, Pathien in Isu tawh kitawn in puikit ding ahi ngâl a.

¹⁵Ziehi, LALPA thu a na kawm u a ka gen uh ahi, eihaw LALPA hung ni tienga a na dam nalaite chun, ipmu te chuh makhelh hiel puoi tiu tih hi.

¹⁶LALPA mawng chuh kiko thawm tawh, vânsâwlchâk chungnung pên aw tawh. Pathien pengkun gi tawh, van a kipata hung kum ding ahi ngâl a. Tichun, Krista gingcha a na thisate chuh hinna ah tho masa’n tin uh;

¹⁷Chun, eihaw, a na hing nalaite hi, vanthamzawl ah LALPA muok dingin amau haw tawh, meitang haw lak akhun lak toh in um hitiu. Khutichun, LALPA kawmah kumlekhuo’n um zing tai tiu.

¹⁸Zieziekchun, zie thu haw hin kitîlkhoh tuoh zing un.