Read Gangte 1 THESSALONIKA 5 Bible Online

1 THESSALONIKA 5 - Gangte bible

1 THESSALONIKA 5

¹Himahlele, suohpihte, zie thil haw hungtunna ding hun leh nikhuo chuh, hun zik sak na kiphamawh puou hi.

²LALPA Ni chuh zan a gucha a hung bangin hungtung ding ahi tih, nangmau haw mawng inle chientakin na he ngâl u a.

³“Muonna leh bitna” ti a a gen lai tak uh leh, numei nauhanat bangin, phulo-halo in, manthaina a chungu ah hungtung intin; suokcha hiel puo’n au.

⁴Himahlele, suohpihte, nanguh vang, zie Ni chun gucha banga a hun huom na dingin, khawthim ah na um puou a,

⁵khawvak chate leh ni chate na hi vek ngâl u a. Zan a um I hi puou a, khawthim a um le I hi diek puou hi.

⁶Zieziekchun, mi dangte bangin ipmu puoi tiu khai! pilkieu in hak zing zawi tiu.

⁷Mi ipmute chuh zan leh ahi a ihmut sek uh; zukhamte chule zan leh ahi a kham sek uh.

⁸Himahlele, eihaw vang suna um I hih ziekun, taksanna leh hehpihna awmphaw chuh ki-âk in, hukdam kinepna chuh lukhuk a mang in; khawthengai zawi tiu!

⁹Pathien in a lungnatna thuok dinga ei tel I hi puou a, I Lalpau Isu Krista zâla hukdamna mu dingin ei tel zawk uh I hi ngâl u a;

¹⁰I thih un le, I hin un le, amah tawh a hung phat leh I chen khawm theihna dingun, I thih sik un a thi ta ngâl a.

¹¹Khutichun, kitîlkhoh tuoh un la, tu a na hih zing bang u hin, kipanpih tuoh chiet un.

¹²Himahlele, suohpihte, na lak uh a semgim leh, LALPA a na lawiupateu leh, nanguh hun hilhte chuh, limbawlna kilawm tak pie a,

¹³A nasep ziek u a hehpih a ngailul mah mah dingin ka hun nget na hiu hi. Na lak u ah kichamna um hen.

¹⁴Ka suohpihte haw, ka hun nget uh na hiu hi, kituok lo taka umte chuh gai un la, mi dawilawkte chuh tîlkhoh un la, zawngkhalte chuh panpih un la, mi chengcheng lak ah thuokhat takin um un.

¹⁵Kuoma’n, kuo gitloh le, gitloh a dinthuk lo dingin chingthei un, na thil kihih sak tuoh na lam uh leh, mi chengcheng chunga na hih sakna lam uh ale, a phata delh zing zawu in.

¹⁶Kipak zing un la;

¹⁷hailo in paucham un la, bang hun ale kipahthu gen zingun.

¹⁸Zie chuh, nangmau lam thu ah, Krista Isu achun Pathien deihlam ahi ngâl a.

¹⁹Thagau chuh sumit kiu in la;

²⁰Thu kigenhaw chule musit diek kiu in.

²¹Thil bang cheng chuh phawchien zawu inla, a phata pawm det un la;

²²Gitloh guola lang cheng lak achun kikiengkawih zawu un.

²³Chun, chamna Pathien mawng chun, lam tin ah hun hih thiengtho hen la; chun, na thagau u leh, na lungthim uh leh, na sapum uh chuh I Lalpau Isu Krista hung tieng leh, paulap bei in a pum in humbit in um hen.

²⁴A hun sampa chuh a taksanum a, hih le hih ina.

²⁵Suohpihte, keihaw nei paucham pih zing un.

²⁶Suohpih cheng chengte khah, châwp thiengtho in nei hun chibai sak un.

²⁷Zie lehkhathâk hi, suohpih cheng chengte kawma sim dingin, LALPA min in ka hun nget na hiu hi.

²⁸I Lalpau Isu Krista hehpihna chuh na kawm u ah um hen.