Read Gangte JOSHUA 10 Bible Online

JOSHUA 10 - Gangte bible

JOSHUA 10

¹Chun, hiti hi ahi a, Jerusalem leng Adoni-zedek chun Joshua’n Jerikoh leh a leng uh chunga a hih guolin Ai khuo leh a lengte le zo in a that vek hi tih chuh a na he ta a. Gibeon mite’n le Israel chate tawh kichamna siem in a laku ah a chêng ui tih thu le a he ta a.

²Zie thu chun Jerusalem a mite chengcheng chuh a lau tau a, a ziek chuh Gibeon khuo chuh khawpi leng nei dangte sang chun a lienzaw a, Ai khuo sangin a lien zaw a, a mite chule kido thiem ngencha a hih ziekun.

³Khutichun, Jerusalem lengpa Adoni-zedek chun Hebron leng Hoham, Jarmuth leng Piram, Lakish leng Japhia leh Eglon leng Debir te haw kawmah,

⁴“Hung unla, ei hung panpih tiem u, Gibeon va do hitiu: Joshua leh Israel chate tawh kichamna a bawl ta ngâl u a,” ti’n a thuthak a.

⁵Khutichun Amor te leng nga, Jerusalem leng, Hebron leng, Jarmuth leng, Lakish leng, Eglon leng te chuh a kikhawm u a, a sepaihteu chengcheng tawh a va chiehto u a, Gibeon khuo ûmkimvel in a do tau a.

⁶Chun, Gibeon mite chun a giehmun uh Gilgal a Joshua kawmah, “Na suokte hi ei thahtham ki’n, kintakin ka kawm u ah hung to inla, ei hung hukdawk inla, ei hung panpih in; thingtâng gama chêng haw Amor lengte ei do dingin a kikhawm ui,” ti’n mi a sawl u a.

⁷Khutichun Joshua leh a kawma galdo mi chengcheng te leh mihat hangsan haw chengcheng chuh Gilgal apan chun a va chieh to tau a.

⁸Chun, LALPA’n Joshua kawmah, “Amau chuh kihcha hiel ki’n, na khut ah ka pie tai; a lak uh a mi kuomah na ma a ding thei um hiel puo’n au,” a ti a.

⁹Chun, zan in Joshua leh sepaihte chuh Gilgal apat in Gibeon ah a chieh tau a, Amor te chuh thakhat in a va do ta a.

¹⁰Chun, LALPA’n Israel te masang achun Amor te chuh a hihbuoi ta a, Israel te chun Gibeon khuo achun tamtak a that u a, Beth-horon chieh tohna lam lampi ah a delh u a, Azekah leh Makedah khuo tiengin a that zel tau a.

¹¹Chun hiti hi ahi a, Amor te chuh Israel te masanga a taihsiet uh a, Beth-horon apat a chieh sukna lampi a a um lai u chun LALPA’n van apat in giel lientak takin Azekah khuo tiengin a vak seh sak a, tichun, a thiu a; Israel chate’n chemzâm a a satlup sang un giel sehlup chuh a tamzaw hiel tau hi.

¹²Tichun, LALPA’n Amor te chuh Israel chate khuta a piek ni chun Joshua’n LALPA kawmah thu a gen a; Israel te mitmuh ngêi in; “Nisa, Gibeon chungah ding zing inla; Thapi, nangle, Aijalon phaizawl ah kichawl in,” a ti a.

¹³Tichun, a melmateu chunga phuba a lak zawh macheng u chun, nisa chuh a ding zing ta a, thapi chule a kichawl ta a. Zie thu hi Jashar lehkhabu a zik sa hilo ahim? Tichun nisa chuh vanlaizawl ah a um zing ta a, ni khat pumlum chuh tum guo lo in a um hi.

¹⁴Chun, LALPA’n khutibanga mihing aw a ngaihthak ni chuh masang in a um kha mawngmawng puoh a, a nung inle a um kha diek puoi; LALPA’n Israel chate chuh a do pih ahi ngâl a.

¹⁵Chun, zie zawh chun, Joshua leh sepaihte chuh a giehmun uh Gilgal ah a vaikit tau hi.

¹⁶Chun, Amor leng ngate chuh a taimang uh a, Makedah kawlpûk ah a kiselgu tau a,

¹⁷Chun, leng ngate chuh muhdawk ahi tau a, Makedah kawlpûk a kiselgu ahiu, ti’n Joshua a hilh u a,

¹⁸Tichun Joshua’n, “Kawlpûk kawtkhak achun suong lientak tak liklut unla, a ngak ding le kawih un;

¹⁹Nang haw vang chuh um kiu un, Na melmateu chuh delh zel unla, a nungdalte khah that unla; a khuou ah lut sak hiel kiu un; LALPA na Pathien un na khut u ah amau haw chuh a hun pie ta ngâl a,” a ti a.

²⁰Joshua leh Israel chate’n a thah lai u chun khenkhat te chuh kulhpi bang nei khawpi te achun a tailut man u a.

²¹Mi chengcheng chuh Joshua kawm lam ah Makedah achun gâlmuong takin a hungkit tau hi; tichun, Israel chate kalh in thu kam khat chale kuoma’n a gen puou hi.

²²Khutichun, Joshua’n “Kawlpûk kawtkhak khah hun hawng unla, leng ngate khah kawlpûk apat khah ka kawmah hun pui un,” a ti a.

²³Khutichun kawlpûk kawt chuh a hawng u a, leng ngate, Jerusalem leng, Hebron leng, Jarmuth leng, Lakish leng leh Eglon leng haw chuh kawlpûk apat chun a hun puidawk u a.

²⁴Zie leng haw chuh Joshua kawma a hun puihdawk phet u chun, Joshua’n Israel mite chengcheng chuh a sam khawm a, a kawma chieh galdo mite laka lawiupate kawm achun, “Hung nai unla, zie lengte ngâwng hi na kêng un tawh un,” a ti a, tichun a hung nai u a, a ngâwng u chuh a keng un a tawh tau a.

²⁵Chun, Joshua’n a kawm u ah, “Lau kiu unla, lungkie hiel kiu un; hattak leh hangsan takin um un; na melmateu chungah LALPA’n hitibang hin hih zel ding ahi,” a ti a.

²⁶Chun, zie zawh chun Joshua’n lengte chuh a that a, thing nga chungah a khâi a; tichun nitâk tiengin thinglek achun a kikhai u a.

²⁷Chun, hiti hi ahi a, ni tum ding kuon in Joshua’n thu a pie a, thinglek apat chun a lathau a, a kiselguknau kawlpûk akhan a paih lut u a, kawlpûk kawtkhak chuh suong lientak takin a sin u a, tuni tieng hin le a um zing nalai hi.

²⁸Chun, Joshua’n zie ni chun Makedah chuh a la a, a lengpau pum in chemzâm in a that a: zie khuo a um chengcheng te chu tawh a satlum suok kêi a, khat chale sît a nei hiel puoi; tichun Jerikoh khuo leng chunga a hih bang mah khan Makedah khuo leng chung ale a hih ta a.

²⁹Chun, zie zawh chun Joshua chuh Israel te chengcheng tawh Makedah apat in Libnah khuo lam ah a chieh u a, Libnah khuo chuh a do u a;

³⁰Tichun, LALPA’n zie khuo chuh a lengpau pum in Israel te khut ah a pie ta a. Zie khuo chuh do in a sunga um chengcheng te chuh chemzâm in a satlum suok u a; a sunga mi khat chale sît mawngmawng a nei puou; Jerikoh khuo leng chunga a hih mah bang khan zie khuo leng chung achun le a hih u a.

³¹Chun, zie zawh chun Joshua leh Israel te chengcheng chu tawh Libnah khuo apat in Lakish khuo lam ah a chieh u a, panmun a khawh u a, a do tau a.

³²Tichun, LALPA’n Lakish khuo chuh Israel te khut ah a pie a, ani nih ni’n a luoh tau hi. Libnah khuo chunga a hih bang khan. Zie khuo chuh do in a sunga um chengcheng te chuh chemzâm in a satlum suok kêi tau hi.

³³Khutichun, Gezer khuo leng Horam chuh Lakish khuo panpih dingin a hung to a; Joshua chun amah leh a lawite tawh khatchale sit lo hielin a na that a.

³⁴Chun, Joshua chuh Israel te chengcheng chu tawh Lakish apat in Eglon khuo lam ah a chieh u a, a va ûmkimvel u a, a do tau a;

³⁵Chun, zie ni chun a la tau a, Lakish khuo chunga a hih bang khan, a sunga um chengcheng te chuh chemzâm in a satlum suok kêi tau hi.

³⁶Zie nung chun, Joshua chuh Israel te chengcheng chu tawh Eglon khuo apat in Hebron khuo lam ah a chieh to u a; a do tau a;

³⁷Tichun a la tau a, zie khuo leh a lengpau leh a khawpel chengcheng leh, a sunga um chengcheng te chuh chemzâm a do in a satlum suok kêi u a, Eglon khuo chunga ahih mah bang khan khatchale sit mawngmawng a nei puou a, a khuo chuh a susie suok kêi a a sung a um chengcheng chuh a satlum suok kêi hi.

³⁸Chun, Joshua leh Israel te chengcheng chuh Debir khuo lam ah a vaikit u a, a do tau a.

³⁹Tichun, a khuo leh a lengpau leh, a khawpel chengcheng chuh a lau a; chemzâm in a do u a, a sunga um chengcheng chuh a satlum suok kêi u a; khatchale sit mawngmawng a nei puou: Hebron leh Libnah khuo chunga a hih bang khan, Debir khuo leh a lengpau chung ale a hih ta a.

⁴⁰Khutichun Joshua’n, thingtâng gam chengcheng te, sim lam gam te, phai gam te, tuinak nei gam te chuh a bawnin a susie veka, a lengteu chengcheng chuh a satlum suok kêi a, khatchale sit mawngmawng a nei puoi. LALPA, Israel Pathien thupiek bangin a hing tapoh chuh a hihchimit suok kêi ta a.

⁴¹Chun, Joshua chun Kadesh-barnea apat a Gaza tiengin, Gosen gam chengcheng tawh Gibeon tiengin a hihsie suok kêi a.

⁴²Zie lengte chengcheng leh a gam uh chuh, LALPA, Israel Pathien in Israel te chuh a do pih ziekin, Joshua chun tumkhat in a la suok kêi ta a.

⁴³Zie zawh chun Joshua leh Israel te chengcheng chuh a giehmun uh Gilgal a chun a vaikit vek tau hi.