Read Gangte JOSHUA 13 Bible Online

JOSHUA 13 - Gangte bible

JOSHUA 13

¹Chun, Joshua chuh a hung upa a, a hung têk ten ta a, chun, LALPA’n a kawmah, “Na hung upa a na hung têk ten ta a, gam lak ding lah a tam ten nalai ngâl a,” a ti a.

²Zie gam haw hi ahi lak nailoh chuh: Philistia gam chengcheng leh Geshur te gam chengcheng chuh.

³Aigupta gamgi zul a um Shihor apat a mâllam panga Ekron gamgi tiengin, (zie chuh Kanaan mite gama ngaih ahi; Philistia te lal haw chuh Gaza te, Ashdod te, Ashkelon te, Gath te, leh Ekron te achun a cheng u a,) sim lama Avvim gam le;

⁴Kanaan mite gam chengcheng leh Sidon mite gama Mearah, Amor te gamgi Aphek khuo tiengin.

⁵Chun, Gebal mite gam leh nisuohna lam Lebanon gam chengcheng, Hermon tâng nuoi Baal-gad apat a Hamath khuo lutna tiengin.

⁶Chun, Lebanon apat a Misrephoth-maim mun tiengin, thingtâng gama cheng te chengcheng, Sidon mite chengcheng chuh; amau haw chuh Israel chate masang a hin nawhdawk ing ka ting, thu ka hun piek bang khan Israel te go chan ding siem sak in.

⁷Khutichun zie gam hi nam kuo te leh Manasseh nam kimkhat te gochan in hawp sak in, a ti a.

⁸Chun, Manasseh nam kimkhatte leh Reuben namte leh Gad namte chuh Jordan suohlam panga khan a chanvo dinguh Mosi’n a piek chuh a na chang tau a, LALPA suok Mosi ngêi in a na piek tâk bang khan.

⁹Arnon guom panga um Aroer khuo apat leh guom lailung a khawpi leh, Medeba phaigam chengcheng Debon tiengin;

¹⁰Chun, Amor leng Sihon, Heshbon khuo a vaihawm chuh a khawpi chengcheng, Amon te gamgi tiengin;

¹¹Chun, Gilead gam leh Geshur te leh Maakah te gamgi chin leh Hermon tâng chengcheng leh Bashan gam chengcheng, Salekah khuo tiengin;

¹²Ashtaroth leh Edrei khuo leng chuh Bashan gam leng Og gam chengcheng tawh (ziehaw chuh Rephaim nam um nalai te chuh ahiu), ziehaw chuh Mosi’n a na do a, a na nawhdawk sa ahi.

¹³Amahvang chuh Geshur te leh Maakah te chuh Israel chate chun a nawhdawk puou hi; Geshur te leh Maakah te chuh tu tieng hin Israel te lak ah a cheng zing u a.

¹⁴Levi phungte chuh ahiu hi gochan ding piek loh a um chuh; a kawma a na gen tâksa bang khan LALPA, Israel Pathien dinga mei a thillat te chuh a go chan uh ahi ngâl a.

¹⁵Chun, Reuben nam chuh a inkuon dungzui zel un Mosi’n gam a na pie ta a.

¹⁶Chun, a gamgiu chuh Arnon guom panga um Aroer khuo apat a luiphai lai taka khawpi leh Medeba tângzawl chengcheng ahi a;

¹⁷Heshbon leh zie gama khawpi chengcheng Dibon te, Bamoth-baal te, Beth-baalmeon te;

¹⁸Jahaz khuo te, Kedemoth te, Mephaath te;

¹⁹Kiriathaim te, Sibmah te, guom tâng a Zereth-shahar te,

²⁰Bethpeor te, Pisgah ken kai te, Beth-jeshimoth te,

²¹tângzawl khawpi chengcheng te, Heshbon a vaihawm, Amor te leng Sihon miliente, Midian te leng a um Evi te, Hekem Zur, Hur, Reba te a umnau gam puma Mosi’n a na hih mangthai sate haw kha tawh ahi.

²²Beor chapa Balaam, phunsan thiem chuh Israel chate’n midang a thahteu lak achun chemzâm in a that khawm u a,

²³Chun, Reuben suonte gamgi bul chuh Jordan leh a kimvel chengcheng chuh ahi, zie gam haw leh khawpi te leh khuo haw hih ahi Reuben suonte a dinga a inkuon dân zel un a gochan a a hawp chuh ahi.

²⁴Chun, Mosi’n Gad nam chuh a inkuon dân dungzui zel un gam a pie a.

²⁵Chun, a gamgiu chuh Jazer khuo leh Gilead gam khawpi chengcheng leh Amon suonte gam kimkhat, Rabbah khawpi chin a Aroer tiengin.

²⁶Heshbon apat a Ramath-mizpeh leh Betonim tieng in, Mahanaim apat a Debir gamgi tiengin;

²⁷Chun, guom achun Beth-harem te, Beth-nimrah te, Sukkoth te, Zaphon te, Heshbon leng Sihon gamdangte, Jordan leh a kimvel te, Jordan gal suohlam panga Kinereth Dil tâwp kêi tiengin ahi;

²⁸Ziehaw hi ahi Gad suonte a dinga a inkuon uh bang zel a a gochan uh a a piek chuh, khuo haw leh a khawpi te chuh.

²⁹Chun, Mosi’n Manasseh nam kimkhat te chuh gam a pie a; Manasseh nam kimkhatte dingin ahi a inkuon uh bang zel a a piek chuh;

³⁰Chun, a gamgiu chuh Mahanaim apat a Bashan gam chengcheng Bashan leng Og gam chengcheng leh Bashan gama Jair khawpi chengcheng tawh, zie chuh khuo sawmgup ahi.

³¹Chun, Gilead gam kimkhat leh Bashan a Og lalgam a Ashtaroth te, Edrei te tawh; ziehaw chuh Manasseh chapa Makir suon, Makir suon kimkhatte dingin, a inkuon uh bang zel a guot ahi.

³²Zie Moab phai, Jerikoh zawn, Jordan gal, suohlam pang te hi ahi Mosi’n a gochan dinguh a a na hawp chuh.

³³Levi chite vang chuh Mosi’n gochan ding a pie puoi; a kawm u a a na gen tâksa guol khan LALPA, Israel Pathien kawma thillat te chuh a gochan uh ahi zawi.