Read Gangte JOSHUA 14 Bible Online

JOSHUA 14 - Gangte bible

JOSHUA 14

¹Ziehaw hi ahi Israel chate’n Kanaan gam a a goluoh ding u a a lâk uh, zie chuh thiempu Eleazar, Nun chapa Joshua leh Israel chate inkuo lawiupate’n a gochan dinguh a a na hawp u chuh.

²LALPA’n Mosi kawma thu a na piek bang khan, nam kuo leh nam kimkhat te chanvo ding gam chuh Jordan tumlam pang chuh phunsân in ana hawm tau a.

³Mosi chun nam nih te leh nam kimkhat te kha Jordan suohlam pang a na piek sa ahi ta a, Levi chite chu vang a laku ah gochan ding a pie puou hi.

⁴Joseph suonte chuh nam nih, Manasseh leh Ephraim ahiu a; Levi chite chuh zie gam achun chanvo a pie puou hi, a umna dinguh khawpi haw leh daikieng gancha tatna ding mun leh In leh lo bawlna ding tih loh chuh.

⁵LALPA’n Mosi thu a piek bang khan Israel chate chun a hih u a, gam chuh a hawm u a.

⁶Khutichun, Juda suonte chuh Gilgal a Joshua kawmah a va chieh u a: Keniz mi Jephuneh chapa Kaleb chun a kawmah, “Kadesh-barnea muna Pathien mi Mosi kawma LALPA’n ka chungchâng leh na chungchâng thu a a thu gen khah na he a,

⁷LALPA suok Mosi’n Kadesh-barnea mun apat a gam va entha ding a ei sawl lai khan kum sawmli mi ka hi ta a; chun, ka lunggil a um bang tak chuh a kawmah ka tun kit a.

⁸Himahleh, ka suohpih ka kitawnpihte khan mipite lunggil a su lauthawng u a; kei chun chuh LALPA ka Pathien chuh ka lunggil pumpi’n ka zui a.

⁹Tichun, Mosi’n zie ni chun, ‘LALPA ka Pathien hi na lunggil pumpi a na zuih ziekin na keng a na tawhna gam chuh kumlekhuo’n nang leh na suonte gochan ding hi teitei in a,’ ti’n a kipautiem a.

¹⁰Tuhin, en in, LALPA’n Mosi kawma zie thu chuh a gen apat Israel te gamthipa a vakvaih sung cheng u khan LALPA’n a gen sa bangin kum sawmli leh nga hiel chuh ei dam sak a; tichun ngaitie, tuhin kum sawmgiet leh nga ka hung hi ta a.

¹¹Himahleh, tuni tieng hinle Mosi’n ei sawl lai bang khan ka hât zing a, zielai a kido dinga pawtdawkna leh hungkitna dinga tha ka neih mah bang khan tuhin le ka nei zing a puo!

¹²Khutichun, zie tâng hih, LALPA’n zie ni a a na gen sa khah ei pie ta’n la; zie akhan Anakim te a um u a, a khawpi hawu le a nasa’n, kulh a ûm tup ahi tih zie ni khan na he kha; LALPA chun ei umpih in, amau haw chuh ka delhdawk thei kha mawh die, LALPA’n a na gen bang tak khan,” a ti a.

¹³Khutichun, Joshua chun Jephuneh chapa Kaleb chuh a vangsak a, a gochan dingin Hebron chuh a pie ta a.

¹⁴Tichun, Keniz mi, Jephuneh chapa Kaleb chun LALPA Israel Pathien chuh a lunggil pumpi a zuih ziekin Hebron chuh tuni tieng hin a gochan a hung hi tai.

¹⁵Chun, Hebron chuh tumasang in Kiriath-arba ahi; Arba chuh Anakim te laka mi lienpen ahi. Khutichun gam chuh gâlmuong in a um tai.