Read Gangte JOSHUA 19 Bible Online

JOSHUA 19 - Gangte bible

JOSHUA 19

¹Chun, phunsân nihvei na chuh Simeon chungah, Simeon namte chungah a inkuon bang zel un a kie kit a; a chanvo u chuh Juda phungte chanvo lak ah a na tel ta ahi.

²A chanvo ding u a pieka umte chuh Beer-sheba, Sheba, Moladah,

³Hazar-shual, Balah, Ezem,

⁴Eitolad, Bethul, Hormah,

⁵Ziklag, Beth-markaboth, Hazarsusah,

⁶Beth-lebaoth leh Sharuhen haw ahi, khawpi sawmlethum a khawneu haw tawh ahi;

⁷Ain, Rimmon, Ether leh Ashan; khawpi haw li a khawneu haw tawh;

⁸Zie khawpi vela khawneu chengcheng Baalath-bear simlam a Ramah tieng ahi. Ziehaw hi Simeon phungte a inkuon dungzui uh a chanvo ding uh a piek chuh ahi.

⁹Chun, Simeon suonte chanvo chuh Juda suonte chan lak apat in a kiladawk a; a ziek chuh Juda suonte chanvo chuh amau a dingin a lien taluo a, zieziekchun Simeon suonte chun Juda suonte chanvo lak ah chanvo a nei ui.

¹⁰Chun, phunsân thumveina chuh Zebulun namte chung ah a kie a, a inkuon dungzui zelin, a chanvo uh gamgi chuh Sarid tieng ahi.

¹¹Chun, a gamgiu chuh tumlam pang ah Maralah tiengin a chieh zel a, Dabbesheth a va tunga; chun, Jokneam kawma luicha a va tung a.

¹²Chun, Sarid apat in suohlam pang ni suohna lam ah Kisloth-tabor gamgi tieng in a kâwi to a; Dab-erath ah a pawt a, chun, Japhia ah a chieh to kit hi.

¹³Zie apat chun suohlam pang ah Gath-hepher leh Ethkazin ah a chieh zel a, Neah lam zuonin Rimmon ah a pawt a.

¹⁴Chun, gamgi chuh mâllam ah Hannathon ah a kikuol phei kit a; Iphtahel phai ah a tâwp hi.

¹⁵Kattah, Nahalal, Shimron, Idalah leh Bethlehem; khawpi haw sawmlenih a khawneu haw tawh ahi.

¹⁶Ziehaw hi ahi, Zebulun suonte a inkuon uh bang zel a a chanvo dinguh a guot chuh; zie khawpi leh a khawneu haw chuh.

¹⁷Chun, phunsân liveina chuh Issakar namte inkuon chungah a inkuon uh bang zelin a kie kit a;

¹⁸Chun, a gamgiu chuh Jezreel, Kesulloth, Shunem,

¹⁹Hapharaim, Shion, Anaharath,

²⁰Rabbith, Kishion, Ebez,

²¹Remeth, Engannim, Enhadah, Bethpazez;

²²Chun, gamgi chun Tabor, Shahamah leh Betshemeah a va su a, tichun a gamgiu tawpna chuh Jordan ahi a, khawpi leh a khawpel haw chuh sawmlegup ahi.

²³Ziehaw chuh ahi Issakar phungte a inkuon uh bang zel a a chanvo dinguh a guot chuh; khawpi haw leh a khawneu haw tawh.

²⁴Chun, phunsân ngaveina chuh Aser namte chungah a inkuon uh bang zelin a kie kit a.

²⁵A gamgi tieng u chuh Helkath, Hali, Beten, Akshaph,

²⁶Allammelek, Amad leh Mishal haw ahi; tumlam pang ah Karmel leh Shihorlibnath a va tung a.

²⁷Chun, suohlam pang ah Bethdagon ah a kikuol to a, Zebulun leh mâllam pang ah Iphtahel guom ah Beth-emek leh Neiel a va tunga; mâllam pang ah Kabul tiengin;

²⁸Ebron, Rehob, Hamon, Kanah, Sidon lienzaw tieng pha hielin a chieh zel a.

²⁹Chun, gamgi chuh Ramah ah leh Tura khawpi kulh nei ah a kikuol phei a; gamgi chuh Hosah ah a kikuol phei zel a; tichun Akzib gam Tuisuohgiet ah a pawt hi.

³⁰Ummah, Aphek leh Rehob; khawpi haw sawmnih leh nih a khawneu haw tawh ahi.

³¹Ziehaw hi Aser phungte a inkuon dungzui zela a chanvo u chuh ahi; zie khawpi haw leh a khawneu haw chuh.

³²Chun, phunsân gupveina chuh Naphtali namte chung ah a inkuon uh bang zelin a kie kit ta a.

³³Chun, a gamgi tieng u chuh Heleph apat, Za-anannim gangpi apat, Ad-aminekeb leh Jabneel apat haw ah Lakkum tiengin ahi; Jordan ah a tâwp hi.

³⁴Chun, gamgi chuh tumlam pang ah Aznoth Tabor ah a chieh suk a, zie apat chun Hukkok ah a chieh a; simlam ah Zebulun a va tunga, tumlam ah Aser a tung a, chun, suohlam ah Juda gama Jordan a va tung a.

³⁵Chun, khawpi kulh nei haw chuh Ziddim, Zer, Hammath, Rakkath, Kinereth,

³⁶Adamah, Ramah, Hazor,

³⁷Kadesh, Ederi, Enhazor,

³⁸Iron, Migal-el, Horem, Beth-anath leh Beth-shemesh ahi a; a khawpi leh a khawpel haw sawmlekuo ahi.

³⁹Ziehaw hi Naphtali phungte a inkuon dungzui zela a chanvo u chuh ahi, khawpi haw leh a khawpel haw tawh.

⁴⁰Chun, phunsân sagihveina chuh Dan namte chung ah a inkuon dungzui zelin a kie a;

⁴¹chun, a chanvo uh gamgi chuh Zorah, Eshtaol, Ir-shemesh,

⁴²Shallabin, Aijalon, Ithalah,

⁴³Elon, Timnah, Ekron,

⁴⁴Eitekeh, Gibbethon, Baalath,

⁴⁵Jehud, Beneberak, Gathrimmon,

⁴⁶Mejarkon leh Rakkon leh Joppa huop sung gam haw tawh ahi.

⁴⁷Dan suonte chun a gam uh chuh amau a dinga neu a sak phet u chun Lashem ah a chieh to u a, a va do u a, a la tau a, mipite chuh chemzâm in a that u a, amau gam in a um ta a. Zie chun a chêng ngâl tau a, a puu Dan minlo in Leshem chuh Dan a sa tau hi.

⁴⁸Ziehaw hi Dan namte a inkuon dungzui zel a a chanvo uh, a khawpi haw leh a khawpel haw chuh ahi.

⁴⁹Khutichun, a chanvo dinguh gam haw chuh a hawp zawh phet un, Israel chate chun Nun chapa Joshua chule a laku ah chanvo a siem sak u a;

⁵⁰LALPA thupiek bang a khawpi a nget, Ephraim tâng gam a Timnath-Serah khuo ngêi chuh a pieu a; chun khawpi chuh a siem a, zie tak achun a um ta a.

⁵¹Ziehaw hi thiempu Eleazar, Nun chapa Joshua leh Israel chate nam a inkuon lawiupate’n Shiloh a LALPA masanga a kikhawp khawmna puon-In kawtkhak a phunsân a a chanvo dinguh a hawp sak u chuh ahi, khutichun gam chuh a hawm zo tau hi.