Read Gangte JOSHUA 20 Bible Online

JOSHUA 20 - Gangte bible

JOSHUA 20

¹Chun, LALPA’n Joshua chuh a hopih a,

²“Israel chate kawm ahin, Kihumbitna khuo haw siem un, Mosi manga na kawmuh a ka na gen tâk guol khan.

³Kuole, tawngpalh a mi a na that kha palh chuh, zie tak achun a taihlut theih na dingin, tichun thisan phuba lapa apat chun nanguh dingin kihumbitna hi’n a.

⁴Chun, zie khawpi haw laka khat pên pên achun tailut intin, khawpi kulh kawtkhak ah va ding intin, zie khuo upate kawmah chun a chanchin chuh va tun intin; chun, amau chun khuo sung ah a kawm u ah puilut untin, a lak uh a a chên theihna dingin umna ding chuh pie’n au.

⁵Chun, thisan phubalapa’n a hun delh chun, a thatpa chuh a khuta a na piek ding uh ahi puoi; a inveng chuh tawngpalh a a thah ahi a, tuma’n hawtna a nei puoh ngâl a.

⁶Mipi masanga vaihawm sak dinga a din ma leh zie huna thiempu lien chuh a thih masang sieh zie khuo a chuh a um zing ding ahi; chun zie zawh tieng chuleh mi thatpa chuh amah khuo sung ngêi; a taihdawk san khuo, amah insung ngêi a chuh a lut kit ding ahi, ti’n gen in,” a ti a.

⁷Khutichun Naphtali tâng gama Galili ah Kadesh khuo, Ephraim tâng gama Shekem khuo, Juda tâng gama Kiriath-arba khuo (zie chuh Hebron ahi) haw chuh a guot tau a.

⁸Chun, suohlam ah Jordan gal ah Jerikoh achun Reuben te gama gamthip phaicham a Bezer khuo, Gad te gama Gilead gam ah Ramoth khuo, Manasseh te gam Bashan gama Golan khuo haw chuh a guot u a.

⁹Zie khuo haw chuh ahi Israel chate chengcheng leh a lak u a nam dang umte a ding a guot chuh; kuole mi that khapalh chuh zie tak achun a taihlut a, mipite masanga a chungthu ngaihtuoh masanga thisan phulapa khuta a thih loh na dingin.